သတင်းများ

ရှမ်းပြည်နယ်ဝန်ကြီးချုပ်နှင့် မြန်မာနိုင်ငံဆိုင်ရာ သံအမတ်ကြီး H.E Mr.Ronen Gilor အဖွဲ့နှင့် လက်ခံတွေ့ဆုံ

တောင်ကြီး ဒီဇင်ဘာ   -   ၂၀

302

ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ်ဒေါက်တာလင်းထွဋ်၊ ပြည်နယ်စိုက်ပျိုးရေး မွေးမြူရေးနှင့် ဆည်မြောင်း ဝန်ကြီးဦးစိုင်းလုံကျော်၊ ပြည်နယ်သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီး ဒေါက်တာညီညီအောင်၊ ပအိုဝ်း ကိုယ်ပိုင်အုပ်ချုပ်ခွင့်ရဒေသဦးစီးအဖွဲ့ဥက္ကဋ္ဌဦးခွန်စံလွင်၊ အစိုးရအဖွဲ့အတွင်းရေးမှူးနှင့်အတူ ဒီဇင်ဘာ(၂၀)ရက် မွန်းလွဲ(၁)နာရီ ကတောင်ကြီးမြို့ ရှမ်းပြည်နယ်အစိုးရရုံး ပြည်နယ်ဝန်ကြီးချုပ်၏ (call)ခန်းမ၌ မြန်မာနိုင်ငံဆိုင်ရာ သံအမတ်ကြီး H.E Mr. Ronen Gilor ဦးဆောင်သောအဖွဲ့နှင့် လက်ခံတွေ့ဆုံကြောင်းသိရသည်။

ထို့သိုတွေ့ဆုံရာတွင် ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ်ဒေါက်တာလင်းထွဋ်မှ ယခုလိုသံအမတ်ကြီးအဖွဲ့ ကိုကြိုဆိုပါကြောင်းနှင့် လာရောက်ကူညီမှုပေးသည့်အတွက် ကျေးဇူးတင်ရှိပါကြောင်း၊ မိမိတို့အစိုးရအဖွဲ့နှင့် မိတ်ဆက်ပေး မည်ဖြစ်ကြောင်း ပြောကြားဆွေးနွေးသွားသည်။ 

ဆက်လက်၍ အစ္စရေးသံအမတ်ကြီး H.E Mr.Ronen Gilor မှ ပင်ဖြစ်တွင် အစ္စရေးနိုင်ငံမှ စီးပွားရေးလုပ်ငန်းရှင်များရှိပါ ကြောင်း၊ စိုက်ပျိုးရေး၊ ပညာရေး၊ ကျန်းမာရေးကိစ္စရပ်များ၊ ရေသန့်လုပ်ငန်းကိစ္စရပ်များအပြင် စိုက်ပျိုးရေးကို အဓိကဆွေးနွေး သွားမည်ဖြစ်ကြောင်း၊ ရှမ်းပြည်နယ်တွင် အစ္စရေးနိုင်ငံတော်မှ လာရောက်ပံ့ပိုးကူညီရန် လာရောက်ခြင်းဖြစ်ကြောင်း၊ ရှမ်းပြည်နယ်သည် ပြည်နယ်များထဲတွင်အကြီးဆုံးဖြစ်ပြီး ကျန်းမာရေးနှင့်ပတ်သက်၍ ဆရာဝန်များနှင့် ပူးပေါင်းဆောင်ရွက် ပေးနေပါကြောင်း၊ ရှမ်းပြည်နယ်သည် ရာသီဥတုရော ပတ်ဝန်းကျင်အနေအထားပါ ပြောင်းလဲနေသောကြောင့် သီးနှံစိုက်ပျိုး ဆောင်ရွက်ရန်ရှိပါကြောင်း ဆွေးနွေးသွားသည်။

ထို့နောက် ပြည်နယ်စိုက်ပျိုးရေး မွေးမြူရေးနှင့်ဆည်မြောင်းဝန်ကြီးမှဆွေးနွေးရာ ယခုလိုအဆွေတော်နှင့် တွေ့ဆုံရ သည်မှာဝမ်းသာပါကြောင်းနှင့် ရှမ်းပြည်နယ်တွင် သရက်သီးကို အများဆုံးစိုက်ပျိုးပြီး နည်းပညာများ လိုအပ်နေပါသေးကြောင်း ဆွေးနွေးကာ ပအိုဝ်းကိုယ်ပိုင်အုပ်ချုပ်ခွင့်ရဒေသဦးစီးအဖွဲ့ဥက္ကဋ္ဌဦးခွန်စံလွင်မှ အဆွေတော်နှင့်တွေ့ဆုံရသည်မှာ အတိုင်းမသိ ဝမ်းသာပါကြောင်း၊ အဆွေတော်၏သတင်းကို မိမိ၏စီးပွားရေးမိတ်ဆွေတစ်ဦးမှ သိရှိထားပါကြောင်း၊ မိမိတို့ဒေသတွင် ထောပတ်ကို အဓိကစိုက်ပျိုးပါကြောင်း၊ ထောပတ်ကိုနောက်ထပ် အပင်(၅၀၀၀)စိုက်ပျိုးနေပြီး ဒေသထွက်မျိုးကို စမ်းသပ် စိုက်ပျိုးနေကြောင်း ဆွေးနွေးသွားသည်။

၎င်းနောက် ပြည်နယ်ဝန်ကြီးချုပ်ဒေါက်တာလင်းထွဋ်က အဆွေတော်အဖွဲ့အား ကျေးဇူးအများကြီးတင်ရှိပါကြောင်းနှင့် အမှတ်တရလက်ဆောင်ပစ္စည်းများ အပြန်အလှန်လဲလှယ်ကြကြောင်းသိရသည်။

မောင်မောင်သန်း(တောင်ကြီး)

09−250132943

 

(၆၂)ကြိမ်မြောက် ကမ္ဘောဇတံခွန်စိုက်ဖလား ဂေါက်သီးရိုက်ပြိုင်ပွဲ ဖွင့်ပွဲကျင်းပ

တောင်ကြီး ဒီဇင်ဘာ   -   ၁၉

301

ရှမ်းပြည်နယ် တောင်ကြီးမြို့ အေးသာယာ ဂေါက်ကလပ်တွင် ကျင်းပပြုလုပ်သည့် (၆၂)ကြိမ်မြောက် ကမ္ဘောဇ တံခွန်စိုက်ဖလား ဂေါက်သီးရိုက်ပြိုင်ပွဲကို ဒီဇင်ဘာ(၁၉)ရက် နံနက်(၇)နာရီက ဖွင့်ပွဲကျင်းပသည်။

ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ်ဒေါက်တာလင်းထွဋ်က နိုင်ငံတော်၌ တစ်မျိုးသားလုံးကျန်းမာကြံ့ခိုင်ရေး နှင့်ပညာရည်မြင့်မားရေးကို လူမှုရေးဦးတည်ချက်ထားရှိဖော်ဆောင်လျက်ရှိပြီး ကျန်းမာကြံ့ခိုင်ရေးအတွက် အားကစားကဏ္ဍ ဘက်စုံဖွံ့ဖြိုးတိုးတက်စေရန်အတွက် အားကစားမြှင့်တင်ခြင်းသည် နိုင်ငံတော်ကိုကာကွယ်တည်ဆောက်ခြင်းဖြင့် ကြိုးပမ်း ဆောင်ရွက်နေသည်ကို အားလုံးသိရှိပြီးဖြစ်ကြောင်း၊ ဂေါက်သီးအားကစားသည် ကမ္ဘာပေါ်တွင်ထင်ရှားသော အားကစားနည်း တစ်ခုဖြစ်သလို ကျန်းမာကြံ့ခိုင်မှု၊ စည်းကမ်းရှိမှု၊ ကိုယ်ကျင့်သိက္ခာထိန်းသိမ်းမှု၊ နည်းစနစ်ကျွမ်းကျင်မှုကိုပါ လေ့ကျင့် ပျိုးထောင်နိုင်သည့် အားကစားသမားများရရှိနိုင်ရေးအတွက် ဆောင်ရွက်ခဲ့သည့် အစီအစဉ်တစ်ခုဖြစ်ပါကြောင်း၊ ရှမ်းပြည်နယ် အားကစားကဏ္ဍများ ဘက်စုံဖွံ့ဖြိုးတိုးတက်ရေး၊ တိုင်းရင်းသားပေါင်းစုံ ချစ်ကြည်ရင်းနှီးရေးကိုရည်ရွယ်ပြီး ကမ္ဘောဇဖလား ဂေါက်သီးရိုက်ပြိုင်ပွဲကို ၁၉၅၆ခုနှစ်မှစတင်ကာ lnter District Golf Tournament ဆိုသည့် ဖလားဖန်တီးပြီး တောင်ကြီးမြို့၊ ကျိုင်းတုံမြို့၊ လားရှိုးမြို့များတွင် နှစ်စဉ်အလှည့်ကျ ကျင်းပခဲ့ပါကြောင်း၊ ပြိုင်ပွဲတွင် ရှမ်းပြည်နယ်တစ်ဝှမ်းလုံးက အားကစား သမားများ ပါဝင်ယှဉ်ပြိုင်ခဲ့ပါကြောင်း၊ ၂၀၁၁ခုနှစ် ကျိုင်းတုံကမ္ဘောဇဖလား ဂေါက်သီးရိုက်ပြိုင်ပွဲမှစတင်ပြီး ရှမ်းပြည်နယ် အစိုးရအဖွဲ့မှ ဦးဆောင်ကျင်းပခဲ့ပါကြောင်း၊ ယနေ့ကျင်းပသည့် ပြိုင်ပွဲတွင် ပြိုင်ပွဲဝင်အမျိုးသား အသင်းပေါင်း(၆၁)သင်း၊ အမျိုးသမီး(၈)သင်းမှ စိတ်ပါဝင်စားစွာဖြင့် လာရောက်ယှဉ်ပြိုင်ခဲ့ကြသည့်အတွက် ပြိုင်ပွဲဝင်အားကစားသမားများအားလုံးကို လှိုက်လှဲစွာကျေးဇူးတင်ရှိပါကြောင်း၊ ၂၀၁၉ခုနှစ် (၆၂)ကြိမ်မြောက် ကမ္ဘောဇတံခွန်စိုက်ဖလား ဂေါက်သီးရိုက်ပြိုင်ပွဲ အောင်မြင်စွာ ကျင်းပရေးလိုအပ်သည်များကို ဝိုင်းဝန်းကူညီဆောင်ရွက်ပေးကြသည့် ကမ္ဘောဇကုမ္ပဏီနာယကကြီးဦးအောင်ကိုဝင်း၊ ပြိုင်ပွဲ ကျင်းပရေးဆပ်ကော်မတီအသီးသီးမှတာဝန်ရှိသူများ၊ ပြိုင်ပွဲကျင်းပနိုင်ရေးအတွက် ဝိုင်းဝန်းလှူဒါန်းပေးကြသော အလှူရှင်များ အားလုံးနှင့် တောင်ကြီး အေးသာယာ ဂေါက်ကလပ်မှ တာဝန်ရှိသူများအားလုံး ကျေးဇူးအထူးတင်ရှိပါကြောင်း၊ ကမ္ဘောဇ တံခွန်စိုက်ဖလားကြီးကို ဆွတ်ခူးနိုင်ရေးအတွက် အစွမ်းကုန်ကြိုးပမ်းယှဉ်ပြိုင်ကြရန် ပြောကြားသွားသည်။

ဆက်လက်၍ ပြိုင်ပွဲကို SMOKE BALL ဖြင့် အရှေ့ပိုင်းတိုင်းစစ်ဌာနချုပ် တိုင်းမှူးဗိုလ်ချုပ်လင်းအောင်၊ ရှမ်းပြည်နယ်အစိုးရအဖွဲ့ ပြည်နယ်လုံခြုံရေးနှင့်နယ်စပ်ရေးရာဝန်ကြီးဗိုလ်မှူးကြီးလှဦး၊ ပြည်နယ်လူမှုရေးဝန်ကြီး ဒေါက်တာ မျိုးထွန်း၊ ပြည်နယ်လမ်းပန်းဆက်သွယ်ရေးဝန်ကြီးဦးခွန်ရဲထွေး၊ ရှမ်းပြည်နယ်အစိုးရအဖွဲ့ အတွင်းရေးမှူးဦးစိုးစိုးဇော်တို့မှ ဖွင့်လှစ်ပေးပြီး၊ ပြည်နယ်ဝန်ကြီးချုပ်ဒေါက်တာလင်းထွဋ်က ပြိုင်ပွဲဝင်အသင်းများအား လိုက်လံနှုတ်ဆက်ကြကြောင်း သိရှိရသည်။

မောင်မောင်သန်း(တောင်ကြီး)

09−250132943

 

ရှမ်းပြည်နယ်အစိုးရအဖွဲ့ပြည်နယ်ဝန်ကြီးချုပ်နှင့် သြစတြေးလျနိုင်ငံသံအမတ်ကြီး H.E Ms.Andrea Faulkner အဖွဲ့နှင့်လက်ခံတွေ့ဆုံ

တောင်ကြီး ဒီဇင်ဘာ-၁၀

296

ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ် ဒေါက်တာလင်းထွဋ်၊ ပြည်နယ်စိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီး ဦးစိုင်းလုံကျော်၊ ဗမာတိုင်းရင်းသားလူမျိုးရေးရာဝန်ကြီး ဒေါက်တာ အောင်သန်းမောင်၊ အစိုးရအဖွဲ့ညွှန်ကြားရေးမှူးနှင့်အတူ ဒီဇင်ဘာ(၁၀)ရက်မွန်းလွဲ(၂)နာရီခွဲက တောင်ကြီးမြို့ ရှမ်းပြည်နယ်အစိုးရရုံး ပြည်နယ်ဝန်ကြီးချုပ်၏ (call)ခန်းမ၌ မြန်မာနိုင်ငံဆိုင်ရာ သြစတြေးလျသံ အမတ်ကြီး H.E Ms. Andrean Faunlkner ဦးဆောင်သောအဖွဲ့နှင့် လက်ခံတွေ့ဆုံကြောင်းသိရသည်။ 

ထိုသို့တွေ့ဆုံရာတွင် သြစတြေးလျသံအမတ်ကြီး H.E. Ms. Andrean Faunlkner က ရှမ်းပြည်နယ်ရှိ ပညာရေးဖွံ့ဖြိုးတိုးတက်ရေးနှင့် တိုင်းရင်းသားရေးရာကိစ္စရပ်များနှင့်စပ်လျဉ်း၍ ဆွေးနွေးလိုကြောင်း၊ ရှမ်းပြည်နယ်အစိုးရအဖွဲ့အနေဖြင့် ဦးစားပေးဆောင်ရွက်ရမည့်ကိစ္စရပ်များလည်း သိလိုကြောင်း ဆွေးနွေး သွားသည်။ 

ဆက်လက်၍ ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ် ဒေါက်တာလင်းထွဋ်က ယခု သြစတြေးလျသံအမတ်ကြီးအနေဖြင့် လာရောက်တွေ့ဆုံသည့်အတွက် ကျေးဇူးတင်ရှိပါကြောင်း ရှမ်းပြည်နယ်တွင် စိုက်ပျိုးရေး၊ မွေးမြူရေးလုပ်ငန်းများနှင့် ခရီးသွားလုပ်ငန်းများ ဆောင်ရွက်နေပါကြောင်း သြစတြေးလျနိုင်ငံအနေဖြင့် မြန်မာနိုင်ငံကို အကြံကောင်းအသိဉာဏ်ကောင်းများ ပေးပါက လှိုက်လှိုက် လှဲလှဲကြိုဆိုပါကြောင်း ပြောကြားဆွေးနွေးသွားကြောင်း သိရသည်။ 

မောင်မောင်သန်း(တောင်ကြီး) 

09250132943

 

ရှမ်းပြည်နယ်စိုက်ပျိူးရေးစုံညီပွဲတော်ကျင်းပရေး ဒုတိယအကြိမ်လုပ်ငန်းညှိနှိုင်းအစည်းအဝေး

တောင်ကြီး ဒီဇင်ဘာ   -   ၁၇

300

ရှမ်းပြည်နယ်စိုက်ပျိူးရေးစုံညီပွဲတော် (Shan State Agriculture Symposium) ကျင်းပနိုင်ရေး ဒုတိယအကြိမ် လုပ်ငန်းညှိနှိုင်း အစည်းအဝေးကို ဒီဇင်ဘာ ၁၇ ရက် ညနေ ၃ နာရီက တောင်ကြီးမြို့၊ ရှမ်းပြည်နယ်အစိုးရရုံး အစည်းအဝေးခန်းမ၌ကျင်းပကြောင်းသိရသည်။

အခမ်းအနားတွင် ရှမ်းပြည်နယ်အစိုးရအဖွဲ့ ပြည်နယ်စိုက်ပျိုးရေး၊ မွေးမြူရေးနှင့် ဆည်မြောင်း ဝန်ကြီး ဦးစိုင်းလုံကျော်မှ ၂၀၁၉ ခုနှစ် ဒီဇင်ဘာ ၂၂ ရက်တွင်ကျင်းပမည့် ရှမ်းပြည်နယ် စိုက်ပျိူးရေး စုံညီပွဲတော်နှင့် ပတ်သက်၍ ရှင်းလင်းပြောကြားပြီး၊ ပြည်နယ်စိုက်ပျိုးရေးဦးစီးဌာန ပြည်နယ်ဦးစီးမှူး ဦးတင်ဦးကြိုင်မှ ရှမ်းပြည်နယ်စိုက်ပျိူးရေး စုံညီပွဲတော် ကျင်းပရေးဆောင်ရွက်ထားရှိမှုအခြေအနေအား ရှင်းလင်းရာ တက်ရောက်လာကြသည့် ကော်မတီဝင်များမှ အထွေထွေဆွေးနွေးကြကြောင်းသိရသည်။

မောင်မောင်သန်း(တောင်ကြီး)

၀၉-၂၅၀၁၃၂၉၄၃

 

ဂမ်ဘီယာနိုင်ငံက မြန်မာနိုင်ငံအပေါ် အပြည်ပြည်ဆိုင်ရာတရားစွဲဆိုလျှောက်ထားမှုကို သွားရောက်ဖြေရှင်းသည့်ကိစ္စနှင့်စပ်လျဉ်း၍ နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အား ထောက်ခံပွဲများ တောင်ကြီးမြို့၌ပြုလုပ်

တောင်ကြီး      ဒီဇင်ဘာ   -   ၁၀

295

နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်သည် ဂမ်ဘီယာနိုင်ငံက မြန်မာနိုင်ငံအပေါ် အပြည်ပြည်ဆိုင်ရာ တရားရုံး (ICJ) ၌ တရားစွဲဆိုလျှောက်ထားမှုအား ဦးဆောင်သွားရောက်ဖြေရှင်းသည့် ကိစ္စနှင့် စပ်လျဉ်း၍ လူထုထောက်ခံပွဲကို ဒီဇင်ဘာ (၁၀) ရက် နံနက် (၉)နာရီခွဲက တောင်ကြီးမြို့ ရေအေးကွင်းရပ်ကွက်ရှိ မြကန်သာပန်းခြံရှေ့မှ ဗိုလ်ချုပ် အောင်ဆန်းလမ်းအတိုင်း ချီတက်၍ ဗိုလ်ချုပ် ပန်းခြံ၌ ကျင်းပသည်။

အဆိုပါထောက်ခံပွဲတွင် နိုင်ငံတော်၏အတိုင်ပင်ခံပုဂ္ဂိုလ် ဦးဆောင်သည့်အဖွဲ့အား ထောက်ခံကြောင်း “ WE STAND WITH OUR LEADER ” “ နိုင်ငံတော်၏ အကျိုးစီးပွားကာကွယ်ရန် နိုင်ငံသားတိုင်းတွင် တာဝန်ရှိသည် ” စသည့် ကြွေးကြော်သံများဖြင့်အင်အား (၃၀၀၀)ကျော်ခန့် ဗိုလ်ချုပ်အောင်ဆန်းပန်းခြံ အထိ ချီတက်၍ နိုင်ငံတော်အလံအား အလေးပြုကာ နိုင်ငံတော်သီချင်းသီဆိုကြပြီး အခမ်းအနားကို အောင်မြင်စွာ ရုပ်သိမ်းလိုက်သည်။

နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နှင့်အဖွဲ့အား ထောက်ခံပွဲတွင် ရှမ်းပြည်နယ် အစိုးရအဖွဲ့ ပြည်နယ်ဝန်ကြီးချုပ် ဒေါက်တာလင်းထွဋ် ဦးဆောင်သောအစိုးရအဖွဲ့ဝင် ဝန်ကြီးများ၊ လွှတ်တော်ကိုယ်စားလှယ်များ၊ ဌာနဆိုင်ရာများ၊ နိုင်ငံရေးပါတီများ၊ ဘာသာပေါင်းစုံအဖွဲ့များ၊တိုင်းရင်းသား ပေါင်းစုံအဖွဲ့များ၊ တောင်ကြီးခရိုင်အတွင်းရှိ တောင်ကြီး၊ ကလော၊ ရပ်စောက်၊ ဖယ်ခုံ၊ ဆီဆိုင်နှင့် လွိုင်လင် ခရိုင်အတွင်းရှိ နမ့်စန်၊ ပင်လုံမြို့နယ်ရှိ ပြည်သူများ၊ CSO အဖွဲ့ အစည်းများ၊ ရဟန်းပျိုအဖွဲ့အား၊ အ.ထ.က (၄)တောင်ကြီးမှ ဘင်ခရာတပ်ဖွဲ့များ ပါဝင်ချီတက် ထောက်ခံကြကြောင်း သိရှိရသည်။

မောင်မောင်သန်း(တောင်ကြီး)

 ၀၉ - ၂၅၀၁၃၂၉၄၃

 

ဒုတိယအကြိမ် ရှမ်းပြည်နယ်လွှတ်တော် (၁၇)ကြိမ်မြောက်ပုံမှန်အစည်းအဝေး(ပထမနေ့ )ကျင်းပ

တောင်ကြီး  ဒီဇင်ဘာ ၁၆

299

ဒုတိယအကြိမ်ရှမ်းပြည်နယ်လွှတ်တော် (၁၇)ကြိမ်မြောက် ပုံမှန်အစည်းအဝေး (ပထမနေ့ ) ကို ဒီဇင်ဘာ (၁၆) ရက် နံနက် (၁၀)နာရီအချိန်က ရှမ်းပြည်နယ်လွှတ်တော် အစည်းအဝေးခန်းမ၌ ကျင်းပ ကြောင်း သိရသည်။ 

အစည်းအဝေးတွင် ပြည်နယ်လွှတ်တော်ရုံး ဒုတိယညွှန်ကြားရေးမှူးချုပ် ဒေါ်နန်းမိုခမ်းက အခမ်းအနားမှူးအဖြစ် ဆောင်ရွက်ပြီး၊ ပြည်နယ်လွှတ်တော်ဥက္ကဋ္ဌက အစည်းဝေးတွင်တက်ရောက်ခွင့်ရှိသူ လွှတ်တော်ကိုယ်စားလှယ် (၁၄၀ )ဦး ရှိသည့်အနက် ခွင့်ပန်ကြားသူ( ၁၅ )ဦးရှိပြီး အစည်းအဝေးသို့ ( ၁၂၅ )ဦး တက်ရောက်သဖြင့် ( ၈၉.၂၉ )%  ရှိသောကြောင့် အစည်းအဝေး အထမြောက်ကြောင်းနှင့် (ပထမနေ့) အစည်းအဝေး စတင်ကျင်းပကြောင်းကြေညာသည်။

ဆက်လက်၍ ပြည်နယ်လွှတ်တော်ဥက္ကဋ္ဌ ဦးစိုင်းလုံးဆိုင်က နှုတ်ခွန်းဆက် စကား ပြောကြားကာ ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ် ဒေါက်တာလင်းထွဋ်က ပြည်နယ်လွှတ်တော်သို့ မိန့်ခွန်းပြောကြား၍ ပြည်နယ်ဝန်ကြီးချုပ်၏ မိန့်ခွန်းကို  ပြည်နယ်လွှတ်တော်မှ မှတ်တမ်းတင် ကြောင်း ပြည်နယ်လွှတ်တော်ဥက္ကဋ္ဌက ကြေညာသည်။

  ထို့နောက် အစည်းအဝေး မတက်ရောက်နိုင်သော ပြည်နယ်လွှတ်တော် ကိုယ်စားလှယ်( ၁၅ )ဦးတို့ အတွက် ပြည်နယ် လွှတ်တော် ကိုယ်စားလှယ်များစိစစ်ရေးကော်မတီ ဥက္ကဋ္ဌ၊ နမ့်စန်မြို့နယ်မဲဆန္ဒနယ် အမှတ်(၁) ပြည်နယ်လွှတ်တော် ကိုယ်စားလှယ် ဦးလင်းအောင်ဆွေက ခွင့်ပန်ကြားပြီး၊ ပြည်နယ် လွှတ်တော်မှ သဘောတူကြောင်းနှင့် အစည်းအဝေးအထမြောက်မှုကို လွှတ်တော်မှ အတည်ပြု ကြောင်း ကြေညာ၍ ပြည်နယ်လွှတ်တော် ကိုယ်စားလှယ်( ၁၂ )ဦးမှ ကြယ်ပွင့်ပြ မေးခွန်း( ၁၅ ) ခုနှင့် အဆို(၁)ခုမေးမြန်းခြင်း ဆောင်ရွက်ကြောင်းသိရသည်။ 

ဒုတိယအကြိမ် ရှမ်းပြည်နယ်လွှတ်တော် (၁၇)ကြိမ်မြောက် ပုံမှန်အစည်းအဝေး (ပထမနေ့) အခမ်းအနားသို့ ပြည်နယ်လွှတ်တော်ဥက္ကဋ္ဌ၊ ပြည်နယ်ဝန်ကြီးချုပ်၊ ပြည်နယ်လွှတ်တော် ဒုတိယဥက္ကဌ၊ ပြည်နယ်ဥပဒေချုပ်၊ ပြည်နယ်စာရင်းစစ်ချုပ်၊ ပြည်နယ်လွှတ်တော် ကိုယ်စားလှယ်များ၊ တပ်မတော်သား ပြည်နယ်လွှတ်တော် ကိုယ်စားလှယ်များနှင့် လေ့လာသူများ တက်ရောက်ကြကြောင်း သိရှိရသည်။

 

မောင်မောင်သန်း(တောင်ကြီး)

၀၉၂၅၀၁၃၂၉၄၃

အသက်(၁၆)နှစ်အောက် အခြေခံပညာ ကျောင်းပေါင်းစုံ ကျောင်းသားအားကစားပွဲတော် ဖွင့်ပွဲကျင်းပ

တောင်ကြီး ဒီဇင်ဘာ   −   ၁၀

294

၂၀၁၉−၂၀၂၀ ပညာသင်နှစ် ရှမ်းပြည်နယ် အသက်(၁၆)နှစ်အောက် အခြေခံပညာ ကျောင်းပေါင်းစုံ၊ ကျောင်းသား အားကစားပွဲတော် ဖွင့်ပွဲအခမ်းအနားကို ဒီဇင်ဘာ(၉)ရက် နံနက်(၈)နာရီက တောင်ကြီးမြို့ သစ်တောရပ်ကွက်ရှိ ပြည်နယ် ဘောလုံးအားကစားကွင်း၌ ကျင်းပခဲ့ကြောင်းသိရသည်။

အခမ်းအနားတွင် ရှမ်းပြည်နယ်အစိုးရအဖွဲ့ ပြည်နယ်လူမှုရေးဝန်ကြီး ဒေါက်တာမျိုးထွန်းက အားကစားဖြင့် နိုင်ငံ၏ ဂုဏ်သိက္ခာကို မြှင့်တင်လျက်ရှိပါကြောင်း၊ အားကစားလုပ်ငန်းကို သာမန်အမြင်ထက် အမြော်အမြင်ကြီးမားရန် လိုအပ်ပါကြောင်း၊ ပထမအကြိမ် ကျောင်းသားအားကစားပွဲတော်ကို ၁၉၉၀ ပြည့်နှစ်တွင် ဧရာဝတီတိုင်းဒေသကြီး ပုသိမ်မြို့၌ စတင်ကျင်းပခဲ့ပြီး နှစ်စဉ်အလှည့်ကျ တာဝန်ယူကျင်းပလာခဲ့ရာမှာ ချင်းပြည်နယ်၊ ဟားခါးမြို့အပြီးတွင်  ကျောင်းသားအားကစားပွဲတော်ကို ရပ်နား သွားခဲ့ပါကြောင်း၊ ယခုအခါ ၂၀၁၉−၂၀၂၀ ပညာသင်နှစ်တွင် ကျောင်းသားအားကစားပွဲတော်ကို ပြန်လည်စတင်ကျင်းပလာခြင်း ဖြစ်ပါကြောင်း ပြောကြားသည်။

ထို့နောက် ပြိုင်ပွဲဝင်အားကစားသမားများက အားကစားသစ္စာဓိဌာန်ရွတ်ဆိုကြပြီး ကွင်းအတွင်းမှ ပြန်လည်ထွက်ခွာ ကြသည်။

ဆက်လက်၍ တောင်ကြီးခရိုင်အသင်းနှင့် မူဆယ်ခရိုင်အသင်းတို့ ယှဉ်ပြိုင်ကစားနေမှုကို ပြည်နယ်လူမှုရေးဝန်ကြီး ဒေါက်တာမျိုးထွန်း၊ ရှမ်းပြည်နယ် ပညာရေးညွန်ကြားမှူးနှင့်ဝန်ထမ်းများ၊ ပြည်နယ်၊ ခရိုင်၊ မြို့နယ်အဆင့် ဌာနဆိုင်ရာတာဝန် ရှိသူများ၊ ကျောင်းအုပ်ကြီးများနှင့် ဆရာ၊ ဆရာမများ၊ အသင်းအုပ်ချုပ်သူများနှင့် နည်းပြများ၊ ပြိုင်ပွဲဝင်အားကစားသမားများ၊ အားကစားဝါသနာရှင်များက ကြည့်ရှုအားပေးကြသည်။

အဆိုပါ ပြိုင်ပွဲသို့ ရှမ်းပြည်နယ်အတွင်းရှိ  ခရိုင်(၈)ခရိုင်မှ အမျိုးသား၊ အမျိုးသမီး  ဘောလုံးပြိုင်ပွဲဝင်(၈)သင်း၊ ဘော်လီဘောပြိုင်ပွဲတွင် အမျိုးသား၊ အမျိုးသမီး(၈)သင်း၊ ပိုက်ကျော်ခြင်းပြိုင်ပွဲတွင် အမျိုးသား(၈)သင်းနှင့် ပြေးခုန်ပစ်ပြိုင်ပွဲ များဖြင့် ဒီဇင်ဘာ(၁၃)ရက်နေ့အထိ ကျင်းပသွားမည်ဖြစ်ပြီး ပြိုင်ပွဲတွင်အကောင်းဆုံး အားကစားသမားများနှင့် ထူးချွန်သူများ ရွေးချယ်ကာ နေပြည်တော်တွင် ကျင်းပပြုလုပ်မည့် ကျောင်းပေါင်းစုံ အားကစားပွဲတော်သို့ ဝင်ရောက်ယှဉ်ပြိုင်သွားမည်ဖြစ် ကြောင်းသိရသည်။

အစရ(ရှမ်း)

 

ရှမ်းပြည်နယ် ဓါတ်ပုံအသင်း နှစ်ပတ်လည်အထိမ်းအမှတ်ကျင်းပ

တောင်ကြီး ဒီဇင်ဘာ   -   ၁၆

298

၂၀၁၉ခုနှစ် ရှမ်းပြည်နယ် ဓါတ်ပုံအသင်း နှစ်ပတ်လည်အထိမ်းအမှတ်ကို ဒီဇင်ဘာ(၁၃)ရက် ညနေ(၆)နာရီက တောင်ကြီးမြို့ Classic Hall ခန်းမ၌ ကျင်းပသည်။

ရှမ်းပြည်နယ်အစိုးရအဖွဲ့ ဗမာတိုင်းရင်းသားလူမျိုးရေးရာဝန်ကြီး ဒေါက်တာအောင်သန်းမောင်က ရှမ်းပြည်နယ် ဓါတ်ပုံအသင်း၏ ပရဟိတစိတ်နှင့် ပူးပေါင်းပါဝင်ဆောင်ရွက်ပေးခဲ့သည့် ရှမ်းပြည်နယ်အစိုးရအဖွဲ့က ကြီးမှူးကျင်းပသော တောင်ကြီးအထူးဓမ္မသဘင်တွင် (၅)ရက်တိုင်တိုင် ညစဉ်မပျက်မကွက်ဓါတ်ပုံမှတ်တမ်းများ ရိုက်ကူးပုံဖော်ပေးခဲ့သည့်အတွက် ရှမ်းပြည်နယ်အစိုးရအဖွဲ့ကိုယ်စား ရှမ်းပြည်နယ် ဓါတ်ပုံအသင်းကို ကျေးဇူးတင်ရှိပါကြောင်း၊ ငြိမ်းချမ်းရေးတရားပွဲ မြို့လုံးကျွတ် ဆွမ်းဆန်စိမ်း လောင်းလှူပွဲတွင်လည်း ဓါတ်ပုံမှတ်တမ်း ရိုက်ကူးပေးခဲ့သည့်အတွက် မှတ်တမ်းတင် ဂုဏ်ပြုပါကြောင်း၊ အသင်းသူ၊ အသင်းသားများ၏ စည်းလုံးညီညွှတ်မှုကို ဒီထက်မကပိုပြီး ကျစ်လစ်ခိုင်မာသည့် အင်အားတစ်ခုဖြစ်ရန်နှင့် အတွင်းရန်၊ အပြင်ရန်တို့ကိုလည်း စည်းလုံးညီညွှတ်မှုအင်အားဖြင့် အောင်မြင်ကျော်လွှားနိုင်အောင် ဆောင်ရွက်ကြရန် ပြောကြား သည်။

ဆက်လက်၍ ရှမ်းပြည်နယ် ဓါတ်ပုံအသင်း ဥက္ကဋ္ဌဦးမောင်ကြီးက အသင်း၏လှုပ်ရှားဆောင်ရွက်မှုများအား ရှင်းလင်း ပြောကြားပြီး၊ မိမိမြို့နယ်အတွင်း ဓါတ်ပုံပညာပြန့်ပွားအောင် ဆောင်ရွက်ပေးသူများနှင့် ရှမ်းပြည်နယ် ဓါတ်ပုံပညာအသင်းအား ပံ့ပိုးကူညီသူများ၊ ရှမ်းပြည်နယ် ဓါတ်ပုံအသင်းမှ လပတ်ဓါတ်ပုံပြိုင်ပွဲတွင် ဆုရရှိသူများ၊ ရှမ်းပြည်နယ် ဓါတ်ပုံအသင်း နှစ်ပတ်လည် အထိမ်းအမှတ်၏ မြန်မာနိုင်ငံလုံးဆိုင်ရာ ဖိတ်ခေါ်ပြိုင်ပွဲ ဆုရရှိသူများနှင့် အကောင်းဆုံးဆု ရရှိသူများတို့ကို ရှမ်းပြည်နယ်အစိုးရအဖွဲ့ဝင် ဗမာတိုင်းရင်းသားလူမျိုးရေးရာဝန်ကြီး ဒေါက်တာအောင်သန်းမောင်နှင့် တာဝန်ရှိသူများမှ ဆုချီးမြှင့် ပေးကြသည်။

ထို့နောက် ဓါတ်ပုံပြိုင်ပွဲတွင် ဆုရရှိသူများကိုယ်စား ၂၀၁၉ခုနှစ် အကောင်းဆုံးဓါတ်ပုံပညာရှင်ဆုရရှိသူ ကျော်နိုင်လင်း (လရိပ်ပြာ)မှ ကျေးဇူးတင်စကားပြောကြားပြီး၊ ရှမ်းပြည်နယ် ဓါတ်ပုံအသင်း ဒုတိယဥက္ကဋ္ဌ ဦးအောင်ကြည်ဦးမှ နိဂုံးချုပ်စကား ပြောကြားကြောင်းသိရသည်။

မောင်မောင်သန်း(တောင်ကြီး)

09−250132943

 

ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ်ဖလား မြို့နယ်ပေါင်းစုံ မီနီမာရသွန်ပြိုင်ပွဲကျင်းပ

တောင်ကြီး ဒီဇင်ဘာ - ၁၀

293

၂၀၁၉ ခုနှစ် ဒီဇင်ဘာ ၈ ရက် နံနက်(၆)နာရီအချိန်တွင် TSDP အစီအစဉ်အရ ကျင်းပပြုလုပ်သော ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ်ဖလားတွင် ကျောင်းအခြေပြု အသက်(၁၆)နှစ်အောက် အမျိုးသားဘောလုံးပြိုင်ပွဲ၊ ဘတ်စကတ်ဘော၊ ပိုက်ကျော်ခြင်း၊ စက်ဘီး၊ မီနီမာရသွန် အားကစားပြိုင်ပွဲများကို ရှမ်းပြည်နယ် (မြောက်ပိုင်း) လားရှိုးမြို့တွင် ကျင်းပကြောင်းသိရသည်။

ဆက်လက်၍ TSDP အစီအစဉ်အရ ကျင်းပပြုလုပ်သော ရှမ်းပြည်နယ်အစိုးရအဖွဲ့ ပြည်နယ် ဝန်ကြီးချုပ်ဖလား မြို့နယ်ပေါင်းစုံအားကစားပြိုင်ပွဲကို အုပ်ချုပ်သူနည်းပြ(၁၀၀)ဦးမှ ဦးဆောင်၍ အားကစားနည်း(၅)မျိုးပါဝင်ကြောင်းသိရှိရသည်။ ထိုပြိုင်ပွဲတွင် ရှမ်းပြည်နယ်(မြောက်ပိုင်း)ရှိ မြို့နယ်(၁၇) မြို့နယ်မှ အားကစားသမား (၁၅၄၁)ဦး ပါဝင်ယှဉ်ပြိုင်ခဲ့ကြပါသည်။

ထို့နောက် အခမ်းအနားသို့ ပြည်နယ်လူမှုရေးဝန်ကြီး ဒေါက်တာမျိုးထွန်း၊ ခရိုင်အုပ်ချုပ်ရေးမှူး ဦးအောင်ချို၊ ရှမ်းပြည်နယ်အားကစားနှင့်ကာယပညာဦးစီးဌာနမှ ဒုတိယညွှန်ကြားရေးမှူး ဦးတင်ထွန်း၊ မြို့နယ်အုပ်ချုပ်ရေးမှူး ဦးအာကာလင်း၊ ခရိုင်လက်ထောက်ညွှန်ကြားရေးမှူး ဦးလှိုင်ဌေးအောင်နှင့် ခရိုင် မီးသတ်ဦးစီးမှူး ဦးမျိုးထွဋ်ဦးတို့မှ ဆုများအသီးသီး တက်ရောက်ချီးမြှင့်ပေးခဲ့ကြကြောင်း သိရှိရသည်။

အစရ(ရှမ်း)

 

ကလောမြို့နယ်၊ ဟဲဟိုးမြို့တွင် ရွေ့လျားဝန်ဆောင်မှု လုပ်ငန်းဆောင်ရွက်နေမှုအား ရှမ်းပြည်နယ်ဝန်ကြီးချုပ် ကြည့်ရှုအားပေး

ဟဲဟိုး ဒီဇင်ဘာ - ၁၁

297

ရှမ်းပြည်နယ်(တောင်ပိုင်း)၊ တောင်ကြီးခရိုင်၊ ကလောမြို့နယ်၊ ဟဲဟိုးမြို့တွင် ဒီဇင်ဘာ ၁၁ ရက် နံနက် ၁၀ နာရီခွဲက ဟဲဟိုးမြို့၊ မြို့လယ်ဓမ္မာရုံ၌ ရွေ့လျားဝန်ဆောင်မှုလုပ်ငန်းဆောင်ရွက်နေမှုအား ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ်ဒေါက်တာလင်းထွဋ်၊ ပြည်နယ်ဝန်ကြီးများနှင့် သက်ဆိုင်ရာ ပြည်နယ်အဆင့်တာဝန်ရှိသူများနှင့်အတူ သွားရောက်ကြည့်ရှုအားပေးခဲ့ကြောင်းသိရသည်။

ဒေသခံပြည်သူများ၏လိုအပ်ချက်များဖြစ်သော လမ်းကိစ္စရပ်များ၊ မြို့နယ်စည်ပင်သာယာရေး ကိစ္စရပ်များ၊ ပြည်တွင်းအခွန်ကိစ္စရပ်များ၊ ကျန်းမာရေး၊တိုင်းရင်းဆေး၊ မြို့နယ်လယ်ယာမြေစီမံခန့်ခွဲရေးနှင့် စာရင်းအင်းဦးစီးဌာန၊ ကုန်းလမ်းပို့ဆောင်ရေး၊ မြန်မာနိုင်ငံရဲတပ်ဖွဲ့၊ လူဝင်မှုကြီးကြပ်ရေးနှင့် အမျိုးသား မှတ်ပုံတင်ရေး ဦးစီးဌာန၊ မြန်မာ့လျှပ်စစ်ဓါတ်အားဖြန့်ဖြူးရေးနှင့် မြို့နယ်အထွေထွေအုပ်ချုပ်ရေးဦးစီးဌာန တို့မှ လုပ်ငန်းများကို အချိန်နှင့်တပြေးညီဆောင်ရွက်ပေးကြပြီး၊ ရွေ့လျားဝန်ဆောင်မှုလုပ်ငန်းတွင် ဆောင်ရွက်ပြီးစီးခဲ့သော နိုင်ငံသားစိစစ်ရေးကတ်ပြားများ၊ အိမ်ထောင်စုဇယားများ၊ လယ်ယာမြေ ပုံစံ(၇) များ၊ ယာဉ်မောင်းလိုင်စင်များတို့ကို ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ် ဒေါက်တာလင်းထွဋ်၊ ပြည်နယ်ဝန်ကြီးများနှင့်တာဝန်ရှိသူတို့က ဒေသခံပြည်သူများအား ပေးအပ်ခဲ့ကြသည်။

ဆက်လက်၍ ပြည်နယ်ဝန်ကြီးချုပ်နှင့် တာဝန်ရှိသူတို့သည် ဟဲဟိုးမြို့ရှိ လေသာတောင်ဘုရားစေတီ သို့ တက်ရောက်ဖူးမျှော်ကြည်ညိုကြပြီး၊ ရှမ်းပြည်နယ်အစိုးရအဖွဲ့မှ အလှူငွေကျပ် သိန်း(၂၀)ကို ပေးအပ် လှူဒါန်းရာ အဆိုပါဘုရားဂေါပကမှ လက်ခံရယူပြီးနောက် အင်းခေါင်းဆည်(ဟဲဟိုး)ရှိ စိုက်ပျိုးရေးခြံသို့ သွားရောက်ကြည့်ရှုလေ့လာခဲ့ကြောင်းသိရသည်။

မောင်မောင်သန်း(တောင်ကြီး)

 

တောင်ကြီးခရိုင်၊ မြို့နယ်ဥပဒေရုံးနှင့် အရာထမ်းအိမ်ရာ အဆောက်အဦသစ် ဖွင့်ပွဲကျင်းပ

တောင်ကြီး ဒီဇင်ဘာ   −   ၉

291

တောင်ကြီးခရိုင် ဥပဒေရုံး၊ မြို့နယ်ဥပဒေရုံးနှင့် အရာထမ်းအိမ်ရာ အဆောက်အဦသစ်ဖွင့်ပွဲကို ဒီဇင်ဘာ(၉)ရက် နံနက် (၁၀)နာရီက တောင်ကြီးမြို့အထွက်(၂)မိုင် ကံကြီးရပ်ကွက်ရှိ တောင်ကြီး−ဟိုပုံးသွား ကားလမ်းဘေး၌ ကျင်းပကြောင်းသိရ သည်။

ဆက်လက်၍ ပြည်ထောင်စုရှေ့နေချုပ် ဦးထွန်းထွန်းဦးက အဖွင့်အမှာစကားပြောကြားပြီး ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ်ဒေါက်တာလင်းထွဋ်က ရှမ်းပြည်နယ်ဥပဒေရုံးတောင်ကြီးခရိုင်နှင့် မြို့နယ်ဥပဒေရုံးတို့သည် ကိုယ်ပိုင်ရုံး မရှိသည့်အတွက် အထွေထွေအုပ်ချုပ်ရေးဦးစီးဌာန၏ အဆောက်အဦ၌ ရုံးခန်းများဖွင့်လှစ်ဆောင်ရွက်ခဲ့သည်ကို သိရှိရပါကြောင်း၊ အဆောက်အဦတစ်ခုတည်းတွင် ရုံး(၃)ရုံးစုပေါင်းဖွင့်လှစ်ဆောင်ရွက်နေရ၍ နေရာမလုံလောက်သဖြင့် လုပ်ငန်းအဆင်မပြေမှု များရှိခြင်းကြောင့် ခရိုင်နှင့်မြို့နယ်ဥပဒေရုံး မြေနေရာခွင့်ပြုရန် ရှမ်းပြည်နယ်အစိုးရအဖွဲ့ကို ရှမ်းပြည်နယ်ဥပဒေချုပ်ရုံးက တင်ပြခဲ့ပါကြောင်း၊ ၂၀၁၇ခုနှစ် ဇွန်လ(၉)ရက်နေ့တွင် ကျင်းပပြုလုပ်သော ရှမ်းပြည်နယ်အစိုးရအဖွဲ့ ပုံမှန်လုပ်ငန်းညှိနှိုင်း အစည်းအဝေးအမှတ်စဉ်(၃/၂၀၁၇) တွင်ဆွေးနွေးခဲ့ပြီး ဧရိယာ(၀.၆၈၀)ဧကရှိ ယခုမြေနေရာကို ခွင့်ပြုခဲ့ပါကြောင်း၊ တောင်ကြီးမြို့ တွင်ဥပဒေရုံးများအတွက် ပထမဦးဆုံး မြေနေရာချထားပေးနိုင်ခဲ့တာဖြစ်ပါ၍ ရှမ်းပြည်နယ်အစိုးရအဖွဲ့အနေဖြင့်လည်း ဝမ်းမြောက် မိပါကြောင်း၊ အဆောက်အဦဆောက်လုပ်ရန် ဘတ်ဂျက်တောင်းခံသဖြင့် ၂၀၁၈−၂၀၁၉ခုနှစ် ဘဏ္ဍာရေးနှစ်တွင် ခရိုင်နှင့် မြို့နယ်ရုံးအဆောက်အဦနှင့် (၃)ခန်းတွဲ RC (၁)ထပ်၊ အရာထမ်းအိမ်ရာအတွက် ငွေလုံးငွေရင်းအသုံးစရိတ် ခွင့်ပြုခဲ့ပါကြောင်း၊ တင်ဒါခေါ်ယူဆောင်ရွက်ခွင့်ပြုခဲ့ပြီး ရှမ်းပြည်နယ်ဥပဒေချုပ်ရုံးက ဆက်လက်ဆောင်ရွက်ခဲ့ရာ ယခုလိုအဆောက်အဦသစ်များ ပေါ်ပေါက်လာခြင်းဖြစ်ကြောင်း၊ ယခုလိုဖြည့်တင်း ဆောင်ရွက်ပေးနိုင်ခဲ့သည်နှင့်အညီ ဥပဒေရုံးများကလည်း တရားစီရင်ရေး ကဏ္ဍတွင်ဖြောင့်မတ်မှန်ကန်စွာ ပါဝင်ဆောင်ရွက်ပြီး အုပ်ချုပ်ရေးကဏ္ဍတွင်လည်း ဥပဒေနှင့်အညီကောင်းမွန်သော အကြံဉာဏ် များပေးခြင်း၊ ပူးပေါင်းပါဝင်ဆောင်ရွက်ခြင်းဖြင့် အထောက်အကူပြုကြရန် ပြောကြားသွားသည်။

ထို့နောက် ရှမ်းပြည်နယ်ဥပဒေအရာရှိဦးဇော်ဇော်ထွေးက အဆောက်အဦနှင့်စပ်လျဉ်း၍ ရှင်းလင်းတင်ပြပြီး ရှမ်းချယ်ရီ တောင်တန်းကုမ္ပဏီ မန်နေးဂျင်းဒါရိုက်တာ ဦးစိုးလင်းက အဆောက်အဦနှင့်ပတ်သက်သည့် စာရွက်စာတန်းများကို ပြည်နယ် အရာရှိဦးဇော်ဇော်ထွေးထံ လွှဲပြောင်းပေးအပ်ကာ  တောင်ကြီးခရိုင် ဥပဒေရုံးနှင့် တောင်ကြီးမြို့နယ် ဥပဒေရုံးသစ်အဆောက်အဦ ကိုပြည်ထောင်စုရှေ့နေချုပ်ဦးထွန်းထွန်းဦး၊ ရှမ်းပြည်နယ်ဝန်ကြီးချုပ် ဒေါက်တာလင်းထွဋ်၊ ရှမ်းပြည်နယ်ဥပဒေချုပ် ဦးတင်ဦး တို့မှဖဲကြိုးဖြတ်ဖွင့်လှစ်ပေး၍ ရုံးဆိုင်းဘုတ်အား စက်ခလုပ်နှိပ်ဖွင့်လှစ်ပေးကာ ဆိုင်းဘုတ်ကမ္မည်းမော်ကွန်းကို အမွှေးနံ့သာ ပက်ဖြန်းပေးကြပြီး အမှတ်တရလက်ဆောင်ပစ္စည်းများ ပေးအပ်ခဲ့ကြောင်းသိရသည်။

၎င်းနောက် ပြည်ထောင်စုရှေ့နေချုပ်ဦးထွန်းထွန်းဦး၊ ပြည်နယ်ဝန်ကြီးချုပ်ဒေါက်တာလင်းထွဋ်နှင့် တာဝန်ရှိသူတို့သည် ပအိုဝ်းကိုယ်ပိုင်အုပ်ချုပ်ခွင့်ရဒေသ ဟိုပုံးမြို့တွင် ခရိုင်ဥပဒေရုံးဖွင့်ပွဲ အခမ်းအနားကိုတက်ရောက်၍ အသီးသီးအမှာစကား ပြောကြားကြပြီး ရုံးဆိုင်းဘုတ်ဖွင့်ပွဲကို ပြည်ထောင်စုရှေ့နေချုပ်ဦးထွန်းထွန်းဦး၊ ရှမ်းပြည်နယ်ဝန်ကြီးချုပ် ဒေါက်တာလင်းထွဋ်၊ ပအိုဝ်းကိုယ်ပိုင်အုပ်ချုပ်ခွင့်ရဒေသဦးစီးအဖွဲ့ဥက္ကဋ္ဌဦးခွန်စံလွင်တို့က ဖဲကြိုးဖြတ်ဖွင့်လှစ်ပေး၍ ဆိုင်းဘုတ်ကမ္မည်းမော်ကွန်းကို အမွှေးနံ့သာပက်ဖြန်းပေးကြကာ ကုမ္ပဏီတာဝန်ရှိသူတစ်ဦးမှ အဆောက်အဦနှင့်ပတ်သက်သည့် စာရွက်စာတန်းများကို ပြည်နယ် အရာရှိဦးဇော်ဇော်ထွေးထံ လွှဲပြောင်းပေးအပ်ကာ အမှတ်တရလက်ဆောင်ပစ္စည်းများ ပေးအပ်ခဲ့ကြကြောင်းသိရှိရသည်။

မောင်မောင်သန်း(တောင်ကြီး)

၀၉−၂၅၀၁၃၂၉၄၃                    

 

More Articles...

  1. အပြည်ပြည်ဆိုင်ရာ အဂတိလိုက်စားမှု တိုက်ဖျက်ရေးနေ့ အထိမ်းအမှတ် တောင်ကြီးမြို့၌ကျင်းပ
  2. တစ်နိုင်ငံလုံးဓာတ်အားသုံးစွဲသူ (၅၀%)ပြည့်အထိမ်းအမှတ် တောင်ကြီးမြို့၌ကျင်းပ
  3. ဒီဇင်ဘာဒုတိယအကြိမ် လူထုလမ်းလျှောက်ပွဲဆင်နွှဲ
  4. ဒုတိယအကြိမ်ဓနု အမျိုးသားနေ့ နောင်ချိုမြို့၌ကျင်းပ
  5. ရှမ်းပြည်နယ်ဝန်ကြီးချုပ် ငွေရည်ပုလဲဘိလပ်မြေစက်ရုံ ကွင်းဆင်းကြည့်ရှု
  6. ကမ္ဘာ့ခုခံအားကျဆင်းမှု ကူးစက်ရောဂါ တိုက်ဖျက်ရေးနေ့ အထိမ်းအမှတ်ကျင်းပ
  7. အပြည်ပြည်ဆိုင်ရာ အဂတိလိုက်စားမှု တိုက်ဖျက်ရေးနေ့ အထိမ်းအမှတ်ကျင်းပ
  8. ဆေးလိပ်ငွေ့ကင်းစင် ရှမ်းပြည်တစ်ခွင် ဒီဇင်ဘာလူထုလမ်းလျှောက်ပွဲကျင်းပ
  9. တောကျယ်ကျေးရွာ ရေပြာအိုင်အဝင်လမ်း ကတ္တရာလမ်းဖွင့်ပွဲ ကျင်းပ
  10. ရှမ်းပြည်နယ်ဝန်ကြီးချုပ်နှင့် တရုတ်သံရုံးမှ စီးပွားရေးသံမှူးMr. Tan Shufu အဖွဲ့နှင့်လက်ခံတွေ့ဆုံ

Subcategories

မူလသို့

အစိုးရအဖွဲ့

သတင်းများ

ဆက်သွယ်ရန်

တိုင်းရင်းသား လူမျိုးများ

ရှမ်းပြည်နယ်(အရှေ့ပိုင်း)ဒေသများတွင် နေထိုင်ကြပါသည်။ ကျိုင်းတုံ၊ မိုင်းဆတ်၊ မိုင်းဖြတ်၊ မိုင်းယန်း၊ မိုင်းတုံ၊ မိုင်းပြင်း၊ တာချီလိတ်၊ လားရှိုး၊ တန့်ယန်း၊ မိုင်းရယ်၊ သိန္နီ၊ မက်မန်းနှင့် မိုင်းခတ်မြို့နယ်များတွင် အများဆုံးနေထိုင်ကြပါသည်။

 

We have 104 guests and no members online