သတင်းများ

(၇၂) နှစ်မြောက်လွတ်လပ်ရေးနေ့ အလံတင်အခမ်းအနားနှင့် သဝဏ်လွှာဖတ်ကြားပွဲကျင်းပ

တောင်ကြီး ဇန်နဝါရီ - ၄

1

(၇၂)နှစ်မြောက် လွတ်လပ်ရေးနေ့ အလံတင်အခမ်းအနားကို ဇန်နဝါရီ(၄)ရက် နံနက်(၄)နာရီ မိနစ်(၂၀)က တောင်ကြီးမြို့၊ အဝေရာမီးပုံးပျံကွင်း၌ ကျင်းပရာ ပြည်ထောင်စုသမ္မတမြန်မာနိုင်ငံတော်အလံအား တိုင်အပြည့် လွှင့်ထူပေးပြီး နောက် တာဝန်ရှိသူများမှ နိုင်ငံတော်အလံအား အလေးပြုကြသည်။ အဆိုပါအခမ်းအနားသို့ ရှမ်းပြည်နယ်အစိုးရအဖွဲ့ ပြည်နယ် ပြည်နယ်လုံခြုံရေးနှင့်နယ်စပ်ရေးရာဝန်ကြီး၊ ပြည်နယ်အစိုးရအဖွဲ့ အတွင်းရေးမှူး၊ နယ်မြေခံတပ်မတော်သားများနှင့် ရဲတပ်ဖွဲ့ ဝင်များ၊ တောင်ကြီးမြို့နယ်၊ ရဲတပ်ဖွဲ့မှူးနှင့် ပြည်နယ်၊ ခရိုင်၊ မြို့နယ်အဆင့် ဌာနဆိုင်ရာများ ရပ်ကွက်ကျေးရွာအုပ်ချုပ်ရေးမှူး များ၊ တာဝန်ရှိသူများတက်ရောက်ကြကြောင်းသိရသည်။

ဆက်လက်၍ သဝဏ်လွှာဖတ်ကြားပွဲအခမ်းအနားကို နံနက်(၇)နာရီက တောင်ကြီးမြို့၊ အဝေရာမီးပုံးပျံကွင်း၌ ကျင်းပ ရာ ပထမဦးစွာစစ်ရေးပြတပ်ခွဲက စစ်ကြောင်းများဖြင့် ချီတက်နေရာယူပြီး ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ် ဒေါက်တာလင်းထွဋ်အား အလေးပြု၍ ပြည်နယ်ဝန်ကြီးချုပ်နှင့် အခမ်းအနားတက်ရောက်လာသူများက ပြည်ထောင်စုသမ္မတ မြန်မာနိုင်ငံတော်အလံကို အလေးပြုကြရာ ဂုဏ်ပြုစစ်တီးဝိုင်းအဖွဲ့က နိုင်ငံတော်သီချင်းကို တီးမှုတ်ဂုဏ်ပြုပြီး၊ ကျဆုံးလေ ပြီးသော ခေါင်းဆောင်ကြီးများနှင့် တပ်မတော်သားများအား အလေးပြုကာ ဂုဏ်ပြုစစ်ကြောင်းမှ သစ္စာအဓိဌာန်(၄)ချက် ရွတ်ဆို ကြပြီးနောက် ရှမ်းပြည်နယ်အစိုးရအဖွဲ့ပြည်နယ်ဝန်ကြီးချုပ်ဒေါက်တာလင်းထွဋ်က ပြည်ထောင်စုသမ္မတမြန်မာ နိုင်ငံတော် နိုင်ငံတော်သမ္မတ ဦးဝင်းမြင့်ထံမှပေးပို့သော (၇၂) နှစ်မြောက်လွတ်လပ်ရေးနေ့သဝဏ်လွှာကို ဖတ်ကြား၍ အခမ်းအနားကို အောင်မြင်စွာရုပ်သိမ်းလိုက်သည်။

အဆိုပါ(၇၂)နှစ်မြောက်လွတ်လပ်ရေးနေ့အခမ်းအနားသို့ ရှမ်းပြည်နယ်ဝန်ကြီးချုပ် ဒေါက်တာ လင်းထွဋ်နှင့် ဇနီး၊ ပြည်နယ်တရားလွှတ်တော် တရားသူကြီးချုပ်နှင့် ဇနီး၊ အရှေ့ပိုင်းတိုင်းစစ်ဌာနချုပ် တိုင်းမှူးနှင့် ဇနီး၊ ပြည်နယ်ဝန်ကြီးများနှင့် ဇနီးများ၊ တိုင်းရင်းသားရေးရာဝန်ကြီးများ၊ ပြည်နယ်ဥပဒေချုပ်၊ ပြည်နယ်စာရင်းစစ်ချုပ်၊ ပြည်နယ်လွှတ်တော် ကိုယ်စား လှယ်များ၊ ပြည်နယ်၊ ခရိုင်၊ မြို့နယ်အဆင့်ဌာနဆိုင်ရာများ၊ တိုင်းရင်းသား ငြိမ်းချမ်းရေးအဖွဲ့အစည်းများ၊ စစ်ရေးပြတပ်ဖွဲ့ များနှင့် ဂုဏ်ပြုစစ်တီးဝိုင်း၊ မြန်မာနိုင်ငံရဲတပ်ဖွဲ့ဝင်များ၊ ရပ်ကွက်ကျေးရွာ အုပ်ချုပ်ရေးမှူးများ၊ ဆရာ/ ဆရာမများ၊ ကျောင်းသား/ကျောင်းသူများ၊ လူမှုရေးအသင်းအဖွဲ့များ၊ ဒေသခံတိုင်းရင်းသား ပြည်သူများတက်ရောက်ကြကြောင်း သိရှိရသည်။

(၇၂)နှစ်မြောက်လွတ်လပ်ရေးနေ့ အထိမ်းအမှတ်တွင်  ပျော်ပွဲရွှင်ပွဲများဖြင့် ပြည်နယ်အားကစားလေ့ကျင့်ရုံကွင်း၌ ပိုက်ကျော်ခြင်းပြိုင်ပွဲ၊ ဂိုးကျဉ်းသွင်းပြိုင်ပွဲ၊ လွန်ဆွဲ၊ အာလူးကောက်ပြိုင်ပွဲ၊ စာအုပ်ရွက်ပြိုင်ပွဲ၊ သံပုံးရိုက်ပြိုင်ပွဲ၊ ချောတိုင်တက် ပြိုင်ပွဲ၊ ခေါင်းအုံးရိုက်ပြိုင်ပွဲ အသီးသီးကျင်းပရာ ဒေသခံပြည်သူများ၊ ကျောင်းသား/ ကျောင်းသူများ၊ တစ်ပျော်တစ်ပါး ပါဝင်ယှဉ်ပြိုင်ကြကာ ဆုရရှိများကို ဆုချီးမြှင့်ပြီး၊ တောင်ကြီးမြို့ပေါ်ရှိ ရပ်ကွက်(၂၂)ရပ်ကွက် တွင်းလည်း ပျော်ပွဲရွှင်ပွဲ အားကစားများ အသီးသီးကျင်းပကြောင်းသိရသည်။

မောင်မောင်သန်း(တောင်ကြီး)

09-250132943

ငြိမ်းချမ်းရေးကော်မရှင်၊ ရှမ်းပြည်နယ်အစိုးရအဖွဲ့ Nippon Foundation၊ PPDC နှင့် PNLO တို့ပါဝင်သော ညှိနှိုင်းဆွေးနွေး

တောင်ကြီး ဇန်နဝါရီ   −   ၂

309

ရှမ်းပြည်နယ် လင်းခေးခရိုင် မောက်မယ်မြို့နယ် ကဒူးကြီးကျေးရွာအုပ်စု ဒေသဖွံ့ဖြိုးရေး လုပ်ငန်းများအတွက် ငြိမ်းချမ်းရေးကော်မရှင်၊ ရှမ်းပြည်နယ်အစိုးရအဖွဲ့၊ PPDC၊ PNLO နှင့် Nippon Foundation တို့ညှိနှိုင်းဆွေးနွေးပွဲကို ဇန်နဝါရီလ (၂)ရက် နံနက်(၁၀)နာရီက တောင်ကြီးမြို့ ရှမ်းပြည်နယ်အစိုးရရုံး အစည်းအဝေးခန်းမ၌ ကျင်းပသည်။

ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ် ဒေါက်တာလင်းထွဋ်က ပြည်ထောင်စုငြိမ်းချမ်းရေးကော်မရှင်သို့ ပအိုဝ်း အမျိုးသားလွတ်မြောက်ရေးအဖွဲ့ချုပ်၊ ပအိုဝ်းဒေသငြိမ်းချမ်းရေးနှင့် ဖွံ့ဖြိုးရေးကော်မတီ(ဗဟို)မှ လင်းခေးခရိုင် မောက်မယ်မြို့နယ် ကဒူးကြီးကျေးရွာအုပ်စုတွင် ဒေသဖွံ့ဖြိုးရေးအတွက် ညှိနှိုင်းဆွေးနွေးပေးရန်တင်ပြသည့် တန်ဖိုးနည်းအိမ်ယာများ၊ စိုက်ပျိုး မွေးမြူရေးလုပ်ငန်းများ၊ ပညာရေးလုပ်ငန်းများ၊ ကျန်းမာရေးလုပ်ငန်းများအား ဆောင်ရွက်နိုင်ရေးအတွက် ညှိနှိုင်းဆွေးနွေးပွဲ ကျင်းပပြုလုပ်ရခြင်းဖြစ်သည့်အတွက် ရှမ်းပြည်နယ်အစိုးရအဖွဲ့မှ ဝမ်းမြောက်ကြိုဆိုပါကြောင်း၊ ရှမ်းပြည်နယ်အတွင်း NCA လက်မှတ်ရေးထိုး ငြိမ်းချမ်းရေးယူထားသော တိုင်းရင်းသားလက်နက်ကိုင်အဖွဲ့(၃)ဖွဲ့ရှိပြီး ပအိုဝ်းအမျိုးသားလွတ်မြောက်ရေး အဖွဲ့ချုပ် (PNLO) အဖွဲ့အနေဖြင့် အပစ်အခတ်ရပ်စဲရေးဆိုင်ရာ သဘောတူစာချုပ် NCA ကို ၂၀၁၅ခုနှစ် အောက်တိုဘာလ(၁၅) ရက်နေ့တွင် လက်မှတ်ရေးထိုးခဲ့ပြီးဖြစ်ကြောင်း၊ ယနေ့ဒေသဖွံ့ဖြိုးရေးအတွက် တွေ့ဆုံညှိနှိုင်းပြီး ငြိမ်းချမ်းရေးကော်မရှင်၊ Nippon Foundation မှကူညီထောက်ပံ့ပေးမှုများအား ဒေသတွင်းငြိမ်းချမ်းရေးလုပ်ငန်းများကို အထောက်အပံ့ဖြစ်စေသလို ဒေသခံပြည်သူများ၏ အခြေခံလိုအပ်ချက်များကို ဖော်ဆောင်ပေးရာရောက်သည့်အတွက် ရှမ်းပြည်နယ်အစိုးရအဖွဲ့အနေဖြင့် ဝမ်းမြောက်စွာ အတူပူးပေါင်းဆောင်ရွက်ပေးသွားမည်ဖြစ်ကြောင်း ပြောကြားသွားသည်။

ဆက်လက်၍ ငြိမ်းချမ်းရေးကော်မရှင်အတွင်းရေးမှူး ဒုတိယဗိုလ်ချုပ်ကြီး ခင်ဇော်ဦး(အငြိမ်းစား)မှ အမှာစကားပြောကြားပြီး ပအိုဝ်းဒေသငြိမ်းချမ်းရေးနှင့် ဖွံ့ဖြိုးရေးကော်မတီ(ဗဟို) ဥက္ကဋ္ဌဦးခွန်ထွန်းမြင့်၊ ပအိုဝ်းဒေသငြိမ်းချမ်းရေးနှင့် ဖွံ့ဖြိုးရေးကော်မတီ (ဗဟို) (PPDC)၊ ပအိုဝ်းအမျိုးသားလွတ်မြောက်ရေးအဖွဲ့ချုပ်(PNLO)တို့မှ တာဝန်ရှိသူများက အသီးသီးဆွေးနွေးတင်ပြကြ၍ ငြိမ်းချမ်းရေးကော်မရှင်အတွင်းရေးမှူး ဒုတိယဗိုလ်ချုပ်ကြီး ခင်ဇော်ဦး(အငြိမ်းစား)မှ ဆွေးနွေးချက်များအပေါ် ရှင်းလင်း ပြောကြားကြောင်း သိရှိရသည်။

မောင်မောင်သန်း(တောင်ကြီး)

၀၉−၂၅၀၁၃၂၉၄၃

 

ရှမ်းပြည်နယ် စိုက်ပျိုးရေးစုံညီပွဲတော်ကျင်းပ

ဟဲဟိုး       ဒီဇင်ဘာ   −   ၂၃

305

ရှမ်းပြည်နယ် စိုက်ပျိုးရေးစုံညီပွဲတော် (Shan State Agriculture Symposium) ကို ဒီဇင်ဘာ(၂၂)ရက် နံနက်(၁၀)နာရီက ကလောမြို့နယ် အင်းခေါင်းကျေးရွာ ဟဲဟိုးခြံ၌ ကျင်းပသည်။

အခမ်းအနားတွင် ပြည်ထောင်စုသမ္မတမြန်မာနိုင်ငံတော် ဒုတိယသမ္မတ(၂) ဦးဟင်နရီဗန်ထီးယူနှင့် စိုက်ပျိုးရေး မွေးမြူရေးနှင့် ဆည်မြောင်းဝန်ကြီးဌာန ပြည်ထောင်စုဝန်ကြီး ဒေါက်တာအောင်သူတို့က အမှာစကားအသီးသီး ပြောကြားကြ သည်။

ဆက်လက်၍ ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ်ဒေါက်တာလင်းထွဋ်က ယခုကျင်းပသော စိုက်ပျိုးရေးစုံညီ ပွဲတော်သည် ရှမ်းပြည်နယ်အတွင်း ပထမဆုံးအကြိမ်အဖြစ်  ကျင်းပပြုလုပ်သည့် ပွဲတစ်ခုဖြစ်ပါကြောင်း၊ ပွဲတော်ကြီးကို အစိုးရအဖွဲ့ဝင်များ၊ ဌာနဆိုင်ရာများ၊ မိတ်ဖက်အဖွဲ့အစည်းများ၊ ပြည်တွင်း/ပြည်ပ ကျွမ်းကျင်ပညာရှင်များ၊ တောင်သူ လယ်သမားအစုအဖွဲ့များ၊ ပုဂ္ဂလိကအဖွဲ့အစည်းများ အားလုံးပူးပေါင်းပါဝင်ပြီး ရေရှည်တည်တံ့သည့် လယ်ယာကုန်ထုတ်လုပ်မှု စနစ်ထွန်းကားစေ၍ လယ်ယာထုတ်ကုန်များ ရောင်းချရာတွင် သင့်တင့်မျှတသည့်စျေးနှုန်းနှင့် စျေးကွက်ရရှိစေရန် စိုက်ပျိုးရေး သုံးစက်ကိရိယာများအား တောင်သူများပိုမိုသိရှိနားလည်အသုံးပြုတတ်ပြီး ထုတ်လုပ်မှုတိုးတက်စေရန် တောင်သူများလူမှုဘဝ ဖွံ့ဖြိုးတိုးတက်မှုမှ ပြည်နယ်တစ်ခုလုံး စီးပွားရေးဖွံ့ဖြိုးတိုးတက်မှုကို အထောက်အကူပြုစေရန် စသည့်ရည်ရွယ်ချက်ကောင်း များနှင့် ဆောင်ရွက်ခြင်းဖြစ်ပါကြောင်း ပြောကြားသွားသည်။

ထို့နောက် စိုက်ပျိုးရေးစုံညီပွဲတော်ကို စိုက်ပျိုးရေး မွေးမြူရေးနှင့် ဆည်မြောင်းဝန်ကြီးဌာန ပြည်ထောင်စုဝန်ကြီး ဒေါက်တာအောင်သူ၊ ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ်ဒေါက်တာလင်းထွဋ်၊ ရှမ်းပြည်နယ်လွှတ်တော်ဥက္ကဋ္ဌ ဦးစိုင်းလုံးဆိုင်တို့မှ ဖဲကြိုးဖြတ်ဖွင့်လှစ်ပေးပြီး စိုက်ပျိုးရေးစုံညီပွဲတော်ရှိ စံပြစိုက်ခင်းများ၊ မွေးမြူရေးပြခန်းများအား ပြည်ထောင်စုသမ္မတမြန်မာနိုင်ငံတော် ဒုတိယသမ္မတ(၂) ဦးဟင်နရီဗန်ထီးယူ၊ ပြည်ထောင်စုဝန်ကြီး၊ ပြည်နယ်ဝန်ကြီးချုပ်နှင့် တာဝန်ရှိသူတို့က လှည့်လည်ကြည့်ရှုအားပေးကြကြောင်း သိရှိရသည်။

မောင်မောင်သန်း(တောင်ကြီး)

၀၉−၂၅၀၁၃၂၉၄၃

 

ရှမ်းပြည်နယ်ဝန်ကြီးချုပ် ခရစ္စမတ်မိတ်ဆုံစားပွဲ တက်ရောက်ချီးမြှင့်

တောင်ကြီး ဒီဇင်ဘာ ၂၁

304

တောင်ကြီးကတ်သလစ်ဂိုဏ်းချုပ်သာသနာ၏ ခရစ္စမတ်မိတ်ဆုံစားပွဲကို ဒီဇင်ဘာ ၂၀ ရက် ညနေ ၅ နာရီက တောင်ကြီးမြို့ စိန်ဂျိုးဇက်အောက်မေ့ဖွယ်ဓမ္မာရုံတွင် ကျင်းပသည်။

တောင်ကြီးကတ်သလစ်ဂိုဏ်းချုပ်သာသနာ၏ ခရစ္စမတ်မိတ်ဆုံစားပွဲတွင် ဘုန်းတော်ကြီး Fr. အီညားလျှိုမှ အဖွင့်ဆုတောင်းမေတ္တာဖြင့် အစပြုပြီး နယ်လှည့်ကတ်သလစ်လူငယ်အဖွဲ့မှ အဖွင့်ခရစ္စမတ် သီချင်းဖြင့် ကြိုဆို၍ ဂိုဏ်းချုပ်ဆရာတော်ကြီး ဘာစီးလျှိုအားသိုက်မှ ကြိုဆိုနှုတ်ခွန်းဆက်စကားပြောကြား ကာ ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ် ဒေါက်တာလင်းထွဋ်မှ ခရစ္စမတ်အချိန်သမယတွင် ဂိုဏ်းချုပ်ဆရာတော်ကြီး ဘာစီးလျှိုအားသိုက်နှင့်တကွ ဘုန်းတော်ကြီးများ၊ သီလရှင်များ၊ တောင်ကြီး ကတ်သလစ်ဘာသာဝင်များအားလုံး ရှမ်းပြည်နယ်အစိုးရအဖွဲ့ကို မေတ္တာဖြင့် ကြိုဆိုသည့်အတွက် အထူး ကျေးဇူးတင်ရှိပါကြောင်း၊ ခရစ္စမတ်အချိန်သည် အားလုံး၏နှလုံးသားထဲတွင် မေတ္တာဆိုသည့် ဆုလာဒ်ကို ယူလိုက်ခြင်းဖြစ်ကြောင်း၊ အချင်းချင်းအပေါ်ထားသည့် မေတ္တာများကို နှလုံးသားနှင့်သယ်ဆောင်လာမည် ဆိုပါက အကောင်းဆုံးသော ခရစ္စမတ်လက်ဆောင်မွန်ဖြစ်ပါကြောင်း၊ ခရစ္စမတ်အချိန်ကာလတွင် အားလုံး က မေတ္တာတရားဦးစားပေးပြီး မေတ္တာတရားနှင့် ဆက်နွယ်နေသော လူသားချင်းအပေါ်၊ တစ်ဦးနှင့်တစ်ဦး အပေါ်တွင် ကောင်းသည့်စိတ်စေတနာထားခြင်းကို ဦးစားပေး၍ တစ်ဦးအပေါ်တစ်ဦးမေတ္တာစေတနာထား ခြင်းသည် ငြိမ်းချမ်းခြင်းဖြစ်ကာ အချင်းချင်းကောင်းသောစိတ်စေတနာမေတ္တာထားနိုင်မှ ငြိမ်းချမ်းရေးကို တည်ဆောက်နိုင်မည်ဖြစ်ကြောင်း၊ ချစ်ခြင်းနှင့်ငြိမ်းချမ်းရေးကို တည်ဆောက်ထားသော ကတ်သလစ် အသင်းတော်ကြီးကို များစွာဂုဏ်ယူမိပြီး သာသနာလုပ်ငန်းကိုလည်း ဆထက်ထမ်းပိုးတိုးပြီး လုပ်ဆောင် ထမ်းရွက်နိုင်ရန် ဆုမွန်ကောင်း တောင်းပေးပါကြောင်း ပြောကြားသွားသည်။

ဆက်လက်၍ ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ် ဒေါက်တာ လင်းထွဋ်နှင့် ရှမ်းပြည်နယ် လွှတ်တော်ဥက္ကဌ ဦးစိုင်းလုံးဆိုင်တို့မှ ခရစ္စမတ်လက်ဆောင်များကို ပေးအပ်ရာ ဘုန်းတော်ကြီး Fr. အီညားလျှိုမှ လက်ခံရယူပြီး ကျောင်းထိုင်ဘုန်းတော်ကြီး Fr. ဖီဒဲလယ်တင်ဖေမှ စားသောက်ဖွယ်ရာများ အတွက် ကောင်းချီးတောင်းခံ၍ ခရစ္စမတ်မိတ်ဆုံစားပွဲ တည်ခင်းဧည့်ခံကြောင်း သိရသည်၊ အဆိုပါ မိတ်ဆုံစားပွဲသို့ ရှမ်းပြည်နယ်ဝန်ကြီးချုပ်၊ ရှမ်းပြည်နယ်လွှတ်တော်ဥက္ကဌ၊ ပြည်နယ်ဝန်ကြီးများ၊ အစိုးရအဖွဲ့ အတွင်းရေးမှူး၊ ပြည်နယ်/ခရိုင်အဆင့် တာဝန်ရှိသူများ တက်ရောက်ချီးမြှင့်ပေးကြကြောင်း သိရှိရသည်။

မောင်မောင်သန်း(တောင်ကြီး)

၀၉၂၅၀၁၃၂၉၄၃

 

ပြည်နယ်ခွင့်ပြုရန်ပုံငွေဖြင့် တင်ဒါအဆိုပြုလွှာ ဖွင့်ပွဲကျင်းပ

တောင်ကြီး ဒီဇင်ဘာ   -   ၂၄

308

၂၀၁၉−၂၀၂၀ ဘဏ္ဍာနှစ် ပြည်နယ်ခွင့်ပြုရန်ပုံငွေဖြင့် ကျောက်မဲခရိုင်ရုံး ခြံစည်းရိုးကာရံခြင်းနှင့် ဆက်စပ်လုပ်ငန်းများ၊ လွိုင်လင်ခရိုင်ရုံး ခြံစည်းရိုးကာရံခြင်းနှင့် ဆက်စပ်လုပ်ငန်းများအတွက် တင်ဒါအဆိုပြုလွှာဖွင့်ပွဲကို ဒီဇင်ဘာ(၂၄)ရက် နံနက် (၁၀)နာရီက တောင်ကြီးမြို့ ရေအေးကွင်းရပ်ကွက်ရှိ ရှမ်းပြည်နယ် သဘာဝပတ်ဝန်းကျင်ထိန်းသိမ်းရေးဦးစီးဌာန အစည်းအဝေး ခန်းမ၌ကျင်းပသည်။

တင်ဒါအဆိုပြုလွှာဖွင့်ပွဲ၌ ရှမ်းပြည်နယ်အစိုးရအဖွဲ့ ပြည်နယ်သယံဇာတနှင့်သဘာဝပတ်ဝန်းကျင်ထိန်းသိမ်းရေးဝန်ကြီး ဒေါက်တာညီညီအောင်က အဖွင့်အမှာစကားပြောကြားပြီး ပြည်နယ်သဘာဝပတ်ဝန်းကျင်ထိန်းသိမ်းရေးဦးစီးဌာန ညွှန်ကြားရေးမှူး ဒေါ်စိန်မမမှ တင်ဒါလျှောက်လွှာတင်သွင်းသည့် ကုမ္ပဏီအမည်စာရင်းနှင့် လုပ်ငန်းဆောင်ရွက်မည့် အချက်များရှင်းလင်း၍ ပြည်နယ်လက်ထောက်ညွှန်ကြားရေးမှူးဦးစိုးနိုင်မှ ကုမ္ပဏီများအား လုပ်ငန်းစံချိန်စံညွှန်းနှင့် အရည်အသွေးကောင်းမွန်စွာပြည့်မီ အောင်ဆောင်ရွက်ပေးကြရန် ရှင်းလင်းပြောကြားသည်။

ဆက်လက်၍ စွမ်လောင်ဟိန်းကုမ္ပဏီ၊ Mega Builder Co.,Ltd၊ ဝင်းထက်မြန်မာကုမ္ပဏီတို့မှ တင်သွင်းထားသည့် တင်ဒါအဆိုပြုလွှာများကို ပွင့်လင်းမြင်သာစွာဖြင့် အခမ်းအနားတက်ရောက်လာသူများ ရှေ့မှောက်တွင် ဖွင့်ဖောက်ပြီးအမှတ် ပေးစနစ်ဖြင့်ဆောင်ရွက်ကြောင်း သိရသည်။

အဆိုပါ တင်ဒါအဆိုပြုလွှာတင်သွင်းခြင်း၌ ကျောက်မဲခရိုင်၌ ခြံစည်းရိုးကာရံခြင်းလုပ်ငန်းနှင့် ဆက်စပ်လုပ်ငန်းများ ဖြစ်သည့် ကျောက်မဲခရိုင်ရုံး ခြံစည်းရိုးကာရံခြင်း မြေဧက(၀.၅၁၁)ဧကနှင့် (၄)လက်မအဝီစီတွင်း၊ ပြင်ပရေပိုက်လိုင်းသွယ်တန်း ခြင်း၊ အလိုအလျောက်ရေတင်စနစ်၊ ရေမြှုပ်မော်တာ၊ ရေစက်အိမ် စသည့်လုပ်ငန်းများဆောင်ရွက်ခြင်း၊ လွိုင်လင်ခရိုင်ရုံး ခြံစည်းရိုးကာရံခြင်းနှင့် ဆက်စပ်လုပ်ငန်းများဖြစ်သည့် လွိုင်လင်ခရိုင်ရုံး (၉၀'×၄၂'-၆") RCC(၂)ထပ်၊ လွိုင်လင်ခရိုင်ရုံး ခြံစည်းရိုးကာရံခြင်း မြေဧက(၀.၇၈၀)ဧက၊ (၁၂၀၀၀)ဂါလံဆန့် မြေအောက်ရေသိုလှောင်ကန်၊ (၄)လက်မအဝီစိတွင်း၊ ပြင်ပ ရေပိုက်လိုင်းသွယ်တန်းခြင်း၊ အလိုအလျောက်ရေတင်စနစ်၊ ရေမြှုပ်မော်တာ၊ ရေစက်အိမ်စသည့်လုပ်ငန်းများကို ဆောင်ရွက် သွားမည်ဖြစ်ကြောင်း သိရှိရသည်။

မောင်မောင်သန်း(တောင်ကြီး)

၀၉−၂၅၀၁၃၂၉၄၃

 

ပြည်နယ်ဝန်ကြီးချုပ်ဖလားမြို့နယ်ပေါင်းစုံအားကစားပြိုင်ပွဲဖွင့်ပွဲကျင်းပ

တောင်ကြီး ဒီဇင်ဘာ-၂၁

303

TSDP အစီအစဉ်အရကျင်းပပြုလုပ်သော ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ်ဖလား ရှမ်းပြည်နယ်(တောင်ပိုင်း)မြို့နယ်ပေါင်းစုံအားကစားပြိုင်ပွဲများဖွင့်ပွဲကို ဒီဇင်ဘာ(၂၀)ရက် ညနေ့(၃)နာရီက တောင်ကြီးမြို့ ပြည်နယ်အားကစားကွင်း၌ ကျင်းပသည်။ 

ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ်ဒေါက်တာလင်းထွဋ်က မြို့နယ်ပေါင်းစုံအားကစား ပြိုင်ပွဲတွင်ပါဝင်သည့် အားကစားနည်းများမှာ ကျောင်းပေါင်းစုံဘောလုံး၊ တိုက်ကွမ်ဒို၊ ဖိတ်ခေါ်ဘော်လီဘော၊ မြန်မာ့သိုင်းပြိုင်ပွဲ၊ စက်ဘီး၊ ပြေးခုန်ပစ်၊ မီနီမာရသွန် ပြိုင်ပွဲစုစုပေါင်းအားကစားနည်း(၇)နည်း ပါဝင် ပါကြောင်း၊ အားကစားနည်း(၇)နည်းတွင် ဘော်လီဘောအားကစားနည်းတစ်ခုတည်းသာ အလွတ်တန်း ဖြစ်ပြီး ကျန်အားကစားနည်းများကို အသက်ကန့်သတ်ပြီးကျင်းပကြောင်း၊ အသက်(၁၆)နှစ်အောက် အားကစားနည်း(၃)နည်း(ဘောလုံး၊ တိုက်ကွမ်ဒို၊ မီနီမာရသွန်)နှင့် အသက်(၂၅)နှစ်အောက် အားကစား နည်း(၃)နည်း(စက်ဘီး၊ မြန်မာ့သိုင်း၊ ပြေးခုန်ပစ်) ပြိုင်ပွဲတို့ဖြစ်ကြောင်း အကြိမ်(၃၀)မြောက် အရှေ့တောင် အာရှအားကစားပြိုင်ပွဲတွင် မြန်မာနိုင်ငံကရရှိခဲ့သည့် ရွှေတံဆိပ်(၄)ခုတွင် ရှမ်းပြည်နယ်ဂုဏ်ဆောင် အားကစားသမားဖြစ်သည့် အားတီ(ခေါ်)ဖုန်းမြင့်ကျော်တစ်ဦးတည်းက ရွှေတံဆိပ်(၂)ခုရယူပေးခဲ့ပြီး နိုင်ငံတော်အတွက်အားထားရသည့် ဂုဏ်ဆောင်အားကစားသမားကို မွေးထုတ်ပေးခဲ့သည့်အတွက် ရှမ်းပြည်နယ်အနေဖြင့် များစွာဂုဏ်ယူရမည်ဖြစ်ကြောင်း မြို့နယ်အားကစားဖွံ့ဖြိုးတိုးတက်မှု Township Sports Development (TSDP) အစီအစဉ်အရ ကျင်းပပြုလုပ်သည့် အားကစားပြိုင်ပွဲသည် ယခုချိန်ထိ ရှမ်းပြည်နယ်တစ်ပြည်နယ်လုံးတွင် (၃၅)ကြိမ်တိတိ ကျင်းပပြီးစီးခဲ့ကြောင်း၊ မြို့နယ်များမှ အုပ်ချုပ်သူ နည်းပြများအနေဖြင့် အားကစားသမားများ စည်းကမ်းရှိရှိနှင့် ကြိုးစားယှဉ်ပြိုင်နိုင်ရေးအတွက် အနီးကပ် ကြီးကြပ်ပေးရန်နှင့် ပြိုင်ပွဲများကို ကြီးကြပ်ဆောင်ရွက်ကြမည့်ဒိုင်များအနေဖြင့် သတ်မှတ်ထားသော ပြိုင်ပွဲ စည်းမျဉ်းစည်းကမ်းဥပဒေများနှင့်အညီဆောင်ရွက်ပေးကြရန်ပြောကြားသွားသည်။

ဆက်လက်၍ ၂၀၁၉ခုနှစ် ဖိလစ်ပိုင်နိုင်ငံတွင် ကျင်းပပြုလုပ်သည့် (၃၀) ကြိမ်မြောက် အရှေ့တောင် အာရှဆီးဂိမ်းပြိုင်ပွဲတွင် မြန်မာနိုင်ငံအတွက် ဘိလိယက်နှင့်စနူကာအားကစားနည်းမှ ရွှေတံဆိပ်(၂)ခုယူ ပေးခဲ့သော မောင်ဖုန်းမြင့်ကျော်အား ဂုဏ်ပြုဆုငွေကျပ်(၁၀)သိန်းကို ပြည်နယ်လူမှုရေးဝန်ကြီး ဒေါက်တာ မျိုးထွန်းမှ ချီးမြင့်ပေး၍လည်းကောင်း၊ ရှမ်းပြည်နယ်(တောင်ပိုင်း)အားကစားပြိုင်ပွဲများအတွက် ရှမ်းပြည်နယ်အစိုးရအဖွဲ့မှ ငွေကျပ်သိန်းခြောက်ရာကို ပြည်နယ်စည်ပင်သာယာရေးဝန်ကြီးမှ ချီးမြင့်ပေး၍လည်းကောင်း၊ ပြည်နယ်ပညာရေးကောလိပ်အား အားကစားပစ္စည်းများကို ပြည်နယ်လျှပ်စစ်၊ စွမ်းအင်နှင့်စက်မှုဝန်ကြီး ဦးစိုင်းရှဲန်တစ်လုံတို့မှ အသီးသီးချီးမြင့်ပေးကြသည်။ 

ထို့နောက် အမှတ်(၅)အခြေခံပညာအထက်တန်းကျောင်းမှ ကျောင်းသားကျောင်းသူလေးများက Myanmar Fitness Danceအကဖြင့် ကပြဖျော်ဖြေကြပြီး တိုင်းဒေသကြီး/ပြည်နယ် အေရိုးဗစ်ပြိုင်ပွဲတွင် Myanmar Fitness Dance ပြိုင်ပွဲတွင် ဒုတိယ ဆုရရှိခဲ့သော ရှမ်းပြည်နယ်ကိုယ်စားပြုအားကစားသမား များက သရုပ်ပြသကြကြောင်းသိရှိရသည်။ 

မောင်မောင်သန်း(တောင်ကြီး) 

09250132943

ဘာသာပေါင်းစုံ ချစ်ကြည်ညီညွတ်ရေးအဖွဲ့ ခရစ်ယာန်အသင်းတော်များမှ ဦးဆောင်ကျင်းပသော ခရစ္စမတ်မိတ်ဆုံစားပွဲကျင်းပ

တောင်ကြီး ဒီဇင်ဘာ   −   ၂၄

307

ဘာသာပေါင်းစုံ ချစ်ကြည်ညီညွတ်ရေးအဖွဲ့ ခရစ်ယာန်အသင်းတော်များမှ ဦးဆောင်ကျင်းပသော ခရစ္စမတ်မိတ်ဆုံ စားပွဲကို ဒီဇင်ဘာ(၂၃)ရက် ည(၆)နာရီက တောင်ကြီးမြို့ ပထမတိုင်းရင်းသား နှစ်ခြင်းခရစ်ယာန်ကျောင်း၌ကျင်းပသည်။

ခရစ္စမတ်မိတ်ဆုံစားပွဲတွင် ခရစ္စမတ်ကျင်းပရေးကော်မတီ ဆရာတော်ဦးအမ်ယောနမှ ကြိုဆိုနှုတ်ဆက်စကားပြောကြား ပြီး၊ ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ်ဒေါက်တာလင်းထွဋ်က ခရစ္စမတ်အကြို နှုတ်ခွန်းဆက်စကားပြောကြားရာ ယဉ်ကျေးမှု၊ ကိုးကွယ်ယုံကြည်မှု၊ တွေးခေါ်ယူဆမှုအမျိုးမျိုးဖြင့် အတူယှဉ်တွဲနေထိုင်ကြသော လူ့အဖွဲ့အစည်းတွင် သဘောထား ပြည့်ဝသော လူပုဂ္ဂိုလ်များစွာလိုအပ်လှပါကြောင်း၊ သဘောထားပြည့်ဝသောလူများသည် ခြားနားသောလူများနှင့် အတူနေထိုင် သည့်အခါ ဘုံတူညီချက်ကိုကြည့်ရှုပြီး အတူနေထိုင်တတ်ကြကြောင်း၊ ဘုံတူညီချက်ကိုရှေးရှုလျှက် နေထိုင်သောသူများကြောင့် မည်သို့ပင်ခြားနားမှုရှိနေပါစေ၊ အပြန်အလှန်လေးစားမှု၊ နားလည်မှုနှင့် တန်ဖိုးထားမှုစသည့် မေတ္တာဓါတ်များစုစည်းကာ နိုင်ငံ မြို့ရွာများ ငြိမ်းချမ်းသာယာဝပြောစေကြောင်း၊ ယခုကျင်းပသော ခရစ္စမတ်အကြို မိတ်ဆုံစားပွဲသည် ကွဲပြားခြားနားမှုများ အကြားဘုံတူညီချက်များကို ပုံဆောင်သောအခမ်းအနားဖြစ်သောကြောင့် ဝမ်းမြောက်ဂုဏ်ယူမိပါကြောင်း၊ ကွဲပြားခြားနားမှုများ အကြား၊ အတူယှဉ်တွဲနေထိုင်ကြသောဘာသာတရားများအကြား အပြန်အလှန်သဘောများပွားများလာစေရန်နှင့် မြန်မာပြည်ကြီး ဖွံ့ဖြိုးတိုးတက်ချမ်းမြေ့သာယာ၍ အမုန်းတရားကင်းဝေးပြီး မေတ္တာဓါတ်ပွားများပါစေရန် ပြောကြားသွားသည်။

ဆက်လက်၍ ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ် ဒေါက်တာလင်းထွဋ်နှင့် ရှမ်းပြည်နယ်လွှတ်တော် ဥက္ကဋ္ဌဦးစိုင်းလုံးဆိုင်တို့က ခရစ္စမတ်လက်ဆောင်ပေးအပ်ရာ ဆရာတော်တစ်ပါးမှလက်ခံရယူကာ၊ ပထမတိုင်းရင်းသားပေါင်းစုံ နှစ်ခြင်းအသင်းတော်မှသံစုံကြူးဧခြင်း၊ ဘုန်းတော်ကြီးတင်ဖေမှ ဆုတောင်းမေတ္တာပို့သခြင်း၊ ဘာသာအသီးသီးများ ဖြစ်ကြသော ဗုဒ္ဓဘာသာ၊ ဟိန္ဒူဘာသာ၊ အစ္စလာမ်ဘာသာတို့မှ ခရစ္စမတ်နှုတ်ခွန်းဆက် စကားပြောကြားကြပြီး ပရိတ်သတ်များမှ ဓမ္မသီချင်း ကြူးဧခြင်းနှင့် ကောင်းချီးမင်္ဂလာခံယူခြင်း၊ ခရစ္စမတ်လက်ဆောင်ပေးအပ်ခြင်းတို့ကို ဆောင်ရွက်ကြကြောင်းသိရှိရသည်။

မောင်မောင်သန်း(တောင်ကြီး)

၀၉−၂၅၀၁၃၂၉၄၃

 

ရှမ်းပြည်နယ်ဝန်ကြီးချုပ်နှင့် မြန်မာနိုင်ငံဆိုင်ရာ သံအမတ်ကြီး H.E Mr.Ronen Gilor အဖွဲ့နှင့် လက်ခံတွေ့ဆုံ

တောင်ကြီး ဒီဇင်ဘာ   -   ၂၀

302

ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ်ဒေါက်တာလင်းထွဋ်၊ ပြည်နယ်စိုက်ပျိုးရေး မွေးမြူရေးနှင့် ဆည်မြောင်း ဝန်ကြီးဦးစိုင်းလုံကျော်၊ ပြည်နယ်သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီး ဒေါက်တာညီညီအောင်၊ ပအိုဝ်း ကိုယ်ပိုင်အုပ်ချုပ်ခွင့်ရဒေသဦးစီးအဖွဲ့ဥက္ကဋ္ဌဦးခွန်စံလွင်၊ အစိုးရအဖွဲ့အတွင်းရေးမှူးနှင့်အတူ ဒီဇင်ဘာ(၂၀)ရက် မွန်းလွဲ(၁)နာရီ ကတောင်ကြီးမြို့ ရှမ်းပြည်နယ်အစိုးရရုံး ပြည်နယ်ဝန်ကြီးချုပ်၏ (call)ခန်းမ၌ မြန်မာနိုင်ငံဆိုင်ရာ သံအမတ်ကြီး H.E Mr. Ronen Gilor ဦးဆောင်သောအဖွဲ့နှင့် လက်ခံတွေ့ဆုံကြောင်းသိရသည်။

ထို့သိုတွေ့ဆုံရာတွင် ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ်ဒေါက်တာလင်းထွဋ်မှ ယခုလိုသံအမတ်ကြီးအဖွဲ့ ကိုကြိုဆိုပါကြောင်းနှင့် လာရောက်ကူညီမှုပေးသည့်အတွက် ကျေးဇူးတင်ရှိပါကြောင်း၊ မိမိတို့အစိုးရအဖွဲ့နှင့် မိတ်ဆက်ပေး မည်ဖြစ်ကြောင်း ပြောကြားဆွေးနွေးသွားသည်။ 

ဆက်လက်၍ အစ္စရေးသံအမတ်ကြီး H.E Mr.Ronen Gilor မှ ပင်ဖြစ်တွင် အစ္စရေးနိုင်ငံမှ စီးပွားရေးလုပ်ငန်းရှင်များရှိပါ ကြောင်း၊ စိုက်ပျိုးရေး၊ ပညာရေး၊ ကျန်းမာရေးကိစ္စရပ်များ၊ ရေသန့်လုပ်ငန်းကိစ္စရပ်များအပြင် စိုက်ပျိုးရေးကို အဓိကဆွေးနွေး သွားမည်ဖြစ်ကြောင်း၊ ရှမ်းပြည်နယ်တွင် အစ္စရေးနိုင်ငံတော်မှ လာရောက်ပံ့ပိုးကူညီရန် လာရောက်ခြင်းဖြစ်ကြောင်း၊ ရှမ်းပြည်နယ်သည် ပြည်နယ်များထဲတွင်အကြီးဆုံးဖြစ်ပြီး ကျန်းမာရေးနှင့်ပတ်သက်၍ ဆရာဝန်များနှင့် ပူးပေါင်းဆောင်ရွက် ပေးနေပါကြောင်း၊ ရှမ်းပြည်နယ်သည် ရာသီဥတုရော ပတ်ဝန်းကျင်အနေအထားပါ ပြောင်းလဲနေသောကြောင့် သီးနှံစိုက်ပျိုး ဆောင်ရွက်ရန်ရှိပါကြောင်း ဆွေးနွေးသွားသည်။

ထို့နောက် ပြည်နယ်စိုက်ပျိုးရေး မွေးမြူရေးနှင့်ဆည်မြောင်းဝန်ကြီးမှဆွေးနွေးရာ ယခုလိုအဆွေတော်နှင့် တွေ့ဆုံရ သည်မှာဝမ်းသာပါကြောင်းနှင့် ရှမ်းပြည်နယ်တွင် သရက်သီးကို အများဆုံးစိုက်ပျိုးပြီး နည်းပညာများ လိုအပ်နေပါသေးကြောင်း ဆွေးနွေးကာ ပအိုဝ်းကိုယ်ပိုင်အုပ်ချုပ်ခွင့်ရဒေသဦးစီးအဖွဲ့ဥက္ကဋ္ဌဦးခွန်စံလွင်မှ အဆွေတော်နှင့်တွေ့ဆုံရသည်မှာ အတိုင်းမသိ ဝမ်းသာပါကြောင်း၊ အဆွေတော်၏သတင်းကို မိမိ၏စီးပွားရေးမိတ်ဆွေတစ်ဦးမှ သိရှိထားပါကြောင်း၊ မိမိတို့ဒေသတွင် ထောပတ်ကို အဓိကစိုက်ပျိုးပါကြောင်း၊ ထောပတ်ကိုနောက်ထပ် အပင်(၅၀၀၀)စိုက်ပျိုးနေပြီး ဒေသထွက်မျိုးကို စမ်းသပ် စိုက်ပျိုးနေကြောင်း ဆွေးနွေးသွားသည်။

၎င်းနောက် ပြည်နယ်ဝန်ကြီးချုပ်ဒေါက်တာလင်းထွဋ်က အဆွေတော်အဖွဲ့အား ကျေးဇူးအများကြီးတင်ရှိပါကြောင်းနှင့် အမှတ်တရလက်ဆောင်ပစ္စည်းများ အပြန်အလှန်လဲလှယ်ကြကြောင်းသိရသည်။

မောင်မောင်သန်း(တောင်ကြီး)

09−250132943

 

(၆၂)ကြိမ်မြောက် ကမ္ဘောဇတံခွန်စိုက်ဖလား ဂေါက်သီးရိုက်ပြိုင်ပွဲ ဆုချီးမြှင့်ပွဲကျင်းပ

တောင်ကြီး ဒီဇင်ဘာ   −   ၂၃

306

ရှမ်းပြည်နယ်အစိုးရအဖွဲ့မှ ကြီးမှူးကျင်းပသော (၆၂)ကြိမ်မြောက် ကမ္ဘောဇတံခွန်စိုက်ဖလား ဂေါက်သီးရိုက်ပြိုင်ပွဲ ဆုချီးမြှင့်ပွဲကို ဒီဇင်ဘာ(၂၂)ရက် ည(၆)နာရီက တောင်ကြီးမြို့နယ် အေးသာယာရှိ အေးသာယာဂေါက်ကွင်း၌ ကျင်းပသည်။

အဆိုပါ ဂေါက်သီးရိုက်ပြိုင်ပွဲတွင် အမျိုးသား၊ အမျိုးသမီးတစ်ဦးချင်း အကျောပေး၊ အကျောမဲ့၊ အသင်းလိုက် အကျောမဲ့၊ အကျောပေးစသည်တို့ကို ယှဉ်ပြိုင်ကစားကြပြီး၊ အမျိုးသား၊ အမျိုးသမီးတစ်ဦးချင်း အကျောမဲ့၊ အကျောပေး ဆုရရှိ သူများနှင့် အမျိုးသမီးဒိုင်းဆုရရှိသော တောင်ကြီး(က)အသင်း၊ အမျိုးသား အကျောပေးဒိုင်းဆုရရှိသော တာချီလိတ်အသင်း၊ အမျိုးသား အကျောမဲ့တံခွန်စိုက်ဒိုင်းဆုနှင့် ဆင့်ပွားဒိုင်းဆုရရှိသော အောင်ပန်း(က)အသင်း၊ ဧည့်သည်တော်ဆုရရှိသူများတို့ကို ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ်ဒေါက်တာလင်းထွဋ်၊ ပြည်နယ်တရားလွှတ်တော် တရားသူကြီးချုပ်၊ ပြည်နယ် ဝန်ကြီးများ၊ ကမ္ဘောဇဘဏ်လီမိတက် ဥက္ကဋ္ဌဦးအောင်ကိုဝင်းနှင့် တာဝန်ရှိသူတို့က ဆုများအသီးသီး ချီးမြှင့်ပေးခဲ့ကြကြောင်း သိရှိရသည်။

မောင်မောင်သန်း(တောင်ကြီး)

၀၉−၂၅၀၁၃၂၉၄၃

 

(၆၂)ကြိမ်မြောက် ကမ္ဘောဇတံခွန်စိုက်ဖလား ဂေါက်သီးရိုက်ပြိုင်ပွဲ ဖွင့်ပွဲကျင်းပ

တောင်ကြီး ဒီဇင်ဘာ   -   ၁၉

301

ရှမ်းပြည်နယ် တောင်ကြီးမြို့ အေးသာယာ ဂေါက်ကလပ်တွင် ကျင်းပပြုလုပ်သည့် (၆၂)ကြိမ်မြောက် ကမ္ဘောဇ တံခွန်စိုက်ဖလား ဂေါက်သီးရိုက်ပြိုင်ပွဲကို ဒီဇင်ဘာ(၁၉)ရက် နံနက်(၇)နာရီက ဖွင့်ပွဲကျင်းပသည်။

ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ်ဒေါက်တာလင်းထွဋ်က နိုင်ငံတော်၌ တစ်မျိုးသားလုံးကျန်းမာကြံ့ခိုင်ရေး နှင့်ပညာရည်မြင့်မားရေးကို လူမှုရေးဦးတည်ချက်ထားရှိဖော်ဆောင်လျက်ရှိပြီး ကျန်းမာကြံ့ခိုင်ရေးအတွက် အားကစားကဏ္ဍ ဘက်စုံဖွံ့ဖြိုးတိုးတက်စေရန်အတွက် အားကစားမြှင့်တင်ခြင်းသည် နိုင်ငံတော်ကိုကာကွယ်တည်ဆောက်ခြင်းဖြင့် ကြိုးပမ်း ဆောင်ရွက်နေသည်ကို အားလုံးသိရှိပြီးဖြစ်ကြောင်း၊ ဂေါက်သီးအားကစားသည် ကမ္ဘာပေါ်တွင်ထင်ရှားသော အားကစားနည်း တစ်ခုဖြစ်သလို ကျန်းမာကြံ့ခိုင်မှု၊ စည်းကမ်းရှိမှု၊ ကိုယ်ကျင့်သိက္ခာထိန်းသိမ်းမှု၊ နည်းစနစ်ကျွမ်းကျင်မှုကိုပါ လေ့ကျင့် ပျိုးထောင်နိုင်သည့် အားကစားသမားများရရှိနိုင်ရေးအတွက် ဆောင်ရွက်ခဲ့သည့် အစီအစဉ်တစ်ခုဖြစ်ပါကြောင်း၊ ရှမ်းပြည်နယ် အားကစားကဏ္ဍများ ဘက်စုံဖွံ့ဖြိုးတိုးတက်ရေး၊ တိုင်းရင်းသားပေါင်းစုံ ချစ်ကြည်ရင်းနှီးရေးကိုရည်ရွယ်ပြီး ကမ္ဘောဇဖလား ဂေါက်သီးရိုက်ပြိုင်ပွဲကို ၁၉၅၆ခုနှစ်မှစတင်ကာ lnter District Golf Tournament ဆိုသည့် ဖလားဖန်တီးပြီး တောင်ကြီးမြို့၊ ကျိုင်းတုံမြို့၊ လားရှိုးမြို့များတွင် နှစ်စဉ်အလှည့်ကျ ကျင်းပခဲ့ပါကြောင်း၊ ပြိုင်ပွဲတွင် ရှမ်းပြည်နယ်တစ်ဝှမ်းလုံးက အားကစား သမားများ ပါဝင်ယှဉ်ပြိုင်ခဲ့ပါကြောင်း၊ ၂၀၁၁ခုနှစ် ကျိုင်းတုံကမ္ဘောဇဖလား ဂေါက်သီးရိုက်ပြိုင်ပွဲမှစတင်ပြီး ရှမ်းပြည်နယ် အစိုးရအဖွဲ့မှ ဦးဆောင်ကျင်းပခဲ့ပါကြောင်း၊ ယနေ့ကျင်းပသည့် ပြိုင်ပွဲတွင် ပြိုင်ပွဲဝင်အမျိုးသား အသင်းပေါင်း(၆၁)သင်း၊ အမျိုးသမီး(၈)သင်းမှ စိတ်ပါဝင်စားစွာဖြင့် လာရောက်ယှဉ်ပြိုင်ခဲ့ကြသည့်အတွက် ပြိုင်ပွဲဝင်အားကစားသမားများအားလုံးကို လှိုက်လှဲစွာကျေးဇူးတင်ရှိပါကြောင်း၊ ၂၀၁၉ခုနှစ် (၆၂)ကြိမ်မြောက် ကမ္ဘောဇတံခွန်စိုက်ဖလား ဂေါက်သီးရိုက်ပြိုင်ပွဲ အောင်မြင်စွာ ကျင်းပရေးလိုအပ်သည်များကို ဝိုင်းဝန်းကူညီဆောင်ရွက်ပေးကြသည့် ကမ္ဘောဇကုမ္ပဏီနာယကကြီးဦးအောင်ကိုဝင်း၊ ပြိုင်ပွဲ ကျင်းပရေးဆပ်ကော်မတီအသီးသီးမှတာဝန်ရှိသူများ၊ ပြိုင်ပွဲကျင်းပနိုင်ရေးအတွက် ဝိုင်းဝန်းလှူဒါန်းပေးကြသော အလှူရှင်များ အားလုံးနှင့် တောင်ကြီး အေးသာယာ ဂေါက်ကလပ်မှ တာဝန်ရှိသူများအားလုံး ကျေးဇူးအထူးတင်ရှိပါကြောင်း၊ ကမ္ဘောဇ တံခွန်စိုက်ဖလားကြီးကို ဆွတ်ခူးနိုင်ရေးအတွက် အစွမ်းကုန်ကြိုးပမ်းယှဉ်ပြိုင်ကြရန် ပြောကြားသွားသည်။

ဆက်လက်၍ ပြိုင်ပွဲကို SMOKE BALL ဖြင့် အရှေ့ပိုင်းတိုင်းစစ်ဌာနချုပ် တိုင်းမှူးဗိုလ်ချုပ်လင်းအောင်၊ ရှမ်းပြည်နယ်အစိုးရအဖွဲ့ ပြည်နယ်လုံခြုံရေးနှင့်နယ်စပ်ရေးရာဝန်ကြီးဗိုလ်မှူးကြီးလှဦး၊ ပြည်နယ်လူမှုရေးဝန်ကြီး ဒေါက်တာ မျိုးထွန်း၊ ပြည်နယ်လမ်းပန်းဆက်သွယ်ရေးဝန်ကြီးဦးခွန်ရဲထွေး၊ ရှမ်းပြည်နယ်အစိုးရအဖွဲ့ အတွင်းရေးမှူးဦးစိုးစိုးဇော်တို့မှ ဖွင့်လှစ်ပေးပြီး၊ ပြည်နယ်ဝန်ကြီးချုပ်ဒေါက်တာလင်းထွဋ်က ပြိုင်ပွဲဝင်အသင်းများအား လိုက်လံနှုတ်ဆက်ကြကြောင်း သိရှိရသည်။

မောင်မောင်သန်း(တောင်ကြီး)

09−250132943

 

More Articles...

  1. ရှမ်းပြည်နယ်စိုက်ပျိူးရေးစုံညီပွဲတော်ကျင်းပရေး ဒုတိယအကြိမ်လုပ်ငန်းညှိနှိုင်းအစည်းအဝေး
  2. ဒုတိယအကြိမ် ရှမ်းပြည်နယ်လွှတ်တော် (၁၇)ကြိမ်မြောက်ပုံမှန်အစည်းအဝေး(ပထမနေ့ )ကျင်းပ
  3. ရှမ်းပြည်နယ် ဓါတ်ပုံအသင်း နှစ်ပတ်လည်အထိမ်းအမှတ်ကျင်းပ
  4. ကလောမြို့နယ်၊ ဟဲဟိုးမြို့တွင် ရွေ့လျားဝန်ဆောင်မှု လုပ်ငန်းဆောင်ရွက်နေမှုအား ရှမ်းပြည်နယ်ဝန်ကြီးချုပ် ကြည့်ရှုအားပေး
  5. ရှမ်းပြည်နယ်အစိုးရအဖွဲ့ပြည်နယ်ဝန်ကြီးချုပ်နှင့် သြစတြေးလျနိုင်ငံသံအမတ်ကြီး H.E Ms.Andrea Faulkner အဖွဲ့နှင့်လက်ခံတွေ့ဆုံ
  6. ဂမ်ဘီယာနိုင်ငံက မြန်မာနိုင်ငံအပေါ် အပြည်ပြည်ဆိုင်ရာတရားစွဲဆိုလျှောက်ထားမှုကို သွားရောက်ဖြေရှင်းသည့်ကိစ္စနှင့်စပ်လျဉ်း၍ နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အား ထောက်ခံပွဲများ တောင်ကြီးမြို့၌ပြုလုပ်
  7. အသက်(၁၆)နှစ်အောက် အခြေခံပညာ ကျောင်းပေါင်းစုံ ကျောင်းသားအားကစားပွဲတော် ဖွင့်ပွဲကျင်းပ
  8. ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ်ဖလား မြို့နယ်ပေါင်းစုံ မီနီမာရသွန်ပြိုင်ပွဲကျင်းပ
  9. တောင်ကြီးခရိုင်၊ မြို့နယ်ဥပဒေရုံးနှင့် အရာထမ်းအိမ်ရာ အဆောက်အဦသစ် ဖွင့်ပွဲကျင်းပ
  10. အပြည်ပြည်ဆိုင်ရာ အဂတိလိုက်စားမှု တိုက်ဖျက်ရေးနေ့ အထိမ်းအမှတ် တောင်ကြီးမြို့၌ကျင်းပ

Subcategories

မူလသို့

အစိုးရအဖွဲ့

သတင်းများ

ဆက်သွယ်ရန်

တိုင်းရင်းသား လူမျိုးများ

ရှမ်းပြည်နယ်(အရှေ့ပိုင်း)တွင် နေထိုင်ကြပါသည်။ ကျိုင်းတုံ၊ မိုင်းပြင်း၊ မိုင်းဖြတ်၊ မိုင်းယောင်း၊ မိုင်းဆတ်၊ တာချီလိတ်မြို့နယ်များတွင် အများဆုံး နေထိုင်ကြသည်။

 

We have 68 guests and no members online

Latest Updates