We have 225 guests and no members online

တောင်ကြီး မတ် - ၁၅

028
၂၀၂၂ - ၂၀၂၃ ခုနှစ် ရှမ်းပြည်နယ်၏ နေကြာသီးနှံစိုက်ပျိုးထုတ်လုပ်ရေး လုပ်ငန်းညှိနှိုင်း အစည်းအဝေးကို မတ်(၁၅)ရက် နံနက်(၉)နာရီခွဲက တောင်ကြီးမြို့ ရှမ်းပြည်နယ်အစိုးရရုံး အစည်းအဝေးခန်းမ၌ ကျင်းပသည်။
ရှမ်းပြည်နယ်ဝန်ကြီးချုပ် ဒေါက်တာကျော်ထွန်းက ရှမ်းပြည်နယ်သည် စိုက်ပျိုးရေးကို အဓိကလုပ်ကိုင်ပြီး စပါး၊ အစေ့ ထုတ်ပြောင်း၊ ပဲမျိုးစုံ၊ ဆီထွက်သီးနှံများအပြင် စားဖိုဆောင်သီးနှံနှင့် ဟင်းသီးဟင်းရွက် အများဆုံးစိုက်ပျိုးသည့် ပြည်နယ်တစ်ခု ဖြစ်ပါကြောင်း၊ စားသုံးဆီသည် ဒုတိယအရေးကြီးသော အခြေခံစားသောက်ကုန် ဖြစ်သည်နှင့်အညီ ဆီဖူလုံရေးသည် အရေးပါလျက်ရှိပြီး ဆီထွက်သီးနှံအမျိုးမျိုးကို တိုးချဲ့စိုက်ပျိုးလျက်ရှိရာ နေကြာသီးနှံသည်ဆီဖူလုံရေးအတွက် ဆောင်ရွက် သင့်သည့် သီးနှံတစ်မျိုးဖြစ်ပြီး ၂၀၂၁ - ၂၀၂၂ ခုနှစ် ရှမ်းပြည်နယ်အတွင်း နေကြာသီးနှံစိုက်ဧက (၂၇၆၀၇)စိုက်ပျိုးလျက်ရှိပြီး ဒေသတွင်းစားသုံးဆီဖူလုံစေရန်နှင့် ပြည်ပမှစားအုန်းဆီများ တင်သွင်းမှုကို လျော့ချနိုင်ရေးအတွက် နေကြာသီးနှံကို တိုးချဲ့ စိုက်ပျိုးရန် လိုအပ်လျက်ရှိပါကြောင်း၊ ၂၀၂၂ - ၂၀၂၃ ခုနှစ် စိုက်ပျိုးရာသီတွင် နေကြာသီးနှံကို ပြည်နယ်တစ်ဝှမ်းလုံး မိုးဆောင်း စိုက်ဧက စုစုပေါင်း(၃၀၉၃၂)ဧကထိ တိုးချဲ့စိုက်ပျိုးသွားနိုင်ရေး၊ မျိုးကောင်းမျိုးသန့်မျိုးစေ့များကို မိုးဆောင်းစိုက်ဧက စုစုပေါင်း (၈၀၀)ဧက မျိုးစေ့ထုတ်စိုက်ပျိုးသွားနိုင်ရေးနှင့် တောင်သူပညာပေးလုပ်ငန်းများ ကျယ်ကျယ်ပြန့်ပြန့် ထိထိရောက်ရောက် ဆောင်ရွက်သွားနိုင်ရေးတို့ကို ယနေ့အအစည်းအဝေးတွင် ဆွေးနွေးပြောကြားသွားမည်ဖြစ်ကြောင်း ပြောကြားသွားသည်။
ဆက်လက်၍ ရှမ်းပြည်နယ်စိုက်ပျိုးရေးဦးစီးဌာန ညွှန်ကြားရေးမှူး ဦးချိုနိုင်ထွန်းမှ ရှမ်းပြည်နယ်အတွင်း နေကြာတိုးချဲ့ စိုက်ပျိုးနိုင်သည့် အခြေအနေများကို ရှင်းလင်းတင်ပြပြီး တက်ရောက်လာကြသည့် ရှမ်းပြည်နယ်အစိုးရအဖွဲ့ အတွင်းရေးမှူး ဦးစိုင်းသော်ဝင်း၊ ပြည်နယ်လုံခြုံရေးနှင့်နယ်စပ်ရေးရာဝန်ကြီး ဗိုလ်မှူးကြီးလှဦး၊ ပြည်နယ်စီးပွားရေးရာဝန်ကြီး ဦးခွန်သိန်းမောင် နှင့် ပြည်နယ်အစိုးရအုပ်ချုပ်ရေးအဖွဲ့ခွဲများ၊ ခရိုင်စီမံအုပ်ချုပ်ရေးအဖွဲ့များမှ ဆွေးနွေးတင်ပြ၍ အထွေထွေဆွေးနွေးကာ ဆွေးနွေး တင်ပြချက်များအပေါ် ပြည်နယ်ဝန်ကြီးချုပ် ဒေါက်တာကျော်ထွန်းက လိုအပ်သည်များ ဖြည့်စွက်ဆွေးနွေး၍ နိဂုံးချုပ်စကား ပြောကြားကြောင်း သိရှိရသည်။

ရှမ်းပြည်နယ်အစိုးရအဖွဲ့

တောင်ကြီး မတ် - ၁၄

027
ရှမ်းပြည်နယ်အတွင်း ပန်းခင်းစီမံချက်ဖြင့် နိုင်ငံသားစိစစ်ရေးကတ်ပြားထုတ်ပေးပြီးစီးမှုနှင့် နိုင်ငံသားစိစစ်ရေးကတ်ပြား (မှတ်ပုံတင်)စစ်ဆေးရေး လုပ်ငန်းညှိနှိုင်းအစည်းအဝေးကို မတ်(၁၄)ရက် မွန်းလွဲ(၂)နာရီက တောင်ကြီးမြို့ ရှမ်းပြည်နယ် အစိုးရရုံး အစည်းအဝေးခန်းမ၌ ကျင်းပသည်။
ရှမ်းပြည်နယ်ဝန်ကြီးချုပ် ဒေါက်တာကျော်ထွန်းက ၂၀၂၂ ခုနှစ်၊ ဧပြီလ(၁)ရက်မှစ၍ နိုင်ငံသားစိစစ်ရေးကတ်ပြား မပြနိုင်ပါကခရီးသွားလာခွင့် မရရှိနိုင်ပါကြောင်း၊ ဧပြီ(၁)ရက်မှစ၍ ခရီးသွားလာပြည်သူများ ထောက်ခံစာများဖြင့် သွားလာလို့ မရရှိ နိုင်ကြောင်းနှင့် နိုင်ငံသားစိစစ်ရေးကတ်ပြား ပြသနိုင်မှသာ ခရီးသွားလာခွင့်ရရှိမည်ဖြစ်ကြောင်း၊ ရှမ်းပြည်နယ်အတွင်း ပန်းခင်း စီမံချက်များကို ၂၀၂၁ ခုနှစ် မေလ(၃)ရက်မှစတင်၍ ဆောင်ရွက်လာခဲ့သည်မှာ ယခု ၂၀၂၂ ခုနှစ် နိုဝင်ဘာလ (၃)ရက်နေ့တွင် (၁၈)လပြည့်မည်ဖြစ်ပါကြောင်း၊ ရှမ်းပြည်နယ်အတွင်း (၁၉)မြို့နယ် ဆောင်ရွက်ပြီးစီးခဲ့ရာ ရှမ်းပြည်နယ် (တောင်ပိုင်း)တွင် (၆)မြို့နယ်၊ မြောက်ပိုင်းတွင်(၇)မြို့နယ်၊ အရှေ့ပိုင်းတွင်(၆)မြို့နယ် အားလုံး(၁၀၀)ရာခိုင်နှုန်း ဆောင်ရွက်နိုင်ခဲ့ ပါကြောင်း၊ ယနေ့အစည်းအဝေးတွင် ပြည်နယ်၊ ခရိုင်၊ မြို့နယ်များမှ အခက်အခဲများရှိပါက တင်ပြရန်နှင့် မိမိတို့အစိုးရအဖွဲ့မှ မည်ကဲ့သို့ ဆောင်ရွက်ပေးရမည်ကို အားလုံးက ပွင့်ပွင့်လင်းလင်း ဆွေးနွေးပေးကြရန် ပြောကြားသွားသည်။
ဆက်လက်၍ ရှမ်းပြည်နယ်အစိုးရအဖွဲ့ ပြည်နယ်လူမှုရေးဝန်ကြီး ဦးအောင်မြင့်မှ ရှမ်းပြည်နယ်အတွင်း ပန်းခင်း စီမံချက်ဖြင့် နိုင်ငံသားစိစစ်ရေးကတ်ပြား ထုတ်ပေးပြီးစီးမှုနှင့် ပတ်သက်၍ ရှင်းလင်းပြောကြားပြီး ပြည်နယ်အစိုးရအဖွဲ့ အတွင်းရေးမှူး ဦးစိုင်းသော်ဝင်းနှင့် တက်ရောက်လာကြသည့် ပြည်နယ်အစိုးရအုပ်ချုပ်ရေးအဖွဲ့ခွဲ့နှင့် ကိုယ်ပိုင်အုပ်ချုပ်ခွင့်ရ ဒေသ တိုင်းဒေသများ ရှမ်းပြည်နယ်(တောင်ပိုင်း၊ မြောက်ပိုင်း၊ အရှေ့ပိုင်း)ရှိ ခရိုင်စီမံအုပ်ချုပ်ရေးအဖွဲ့များမှ ဆွေးနွေးတင်ပြကာ ဆွေးနွေးတင်ပြချက်များအပေါ် ပြည်နယ်ဝန်ကြီးချုပ် ဒေါက်တာကျော်ထွန်းက လိုအပ်သည်များ ဖြည့်စွက်ဆွေးနွေး၍ နိဂုံးချုပ် စကားပြောကြားခဲ့ကြောင်း သိရှိရသည်။

ရှမ်းပြည်နယ်အစိုးရအဖွဲ့

တောင်ကြီး ဖေဖော်ဝါရီ - ၂၅

025
ပြည်နယ်လယ်ယာမြေစီမံခန့်ခွဲမှုအဖွဲ့ အစည်းအဝေးအမှတ်စဥ်(၂/၂၀၂၂)နှင့် ပြည်နယ်မြေလွတ်၊ မြေလပ်နှင့်မြေရိုင်းများ စီမံခန့်ရေးကော်မတီ အစည်းအဝေးအမှတ်စဥ်(၂/၂၀၂၂)ကို ဇန်နဝါရီ(၂၅)ရက် နံနက်(၁၀)နာရီက တောင်ကြီးမြို့ ရှမ်းပြည်နယ် အစိုးရရုံး အစည်းအဝေးခန်းမ၌ ကျင်းပသည်။
ပြည်နယ်လယ်ယာမြေစီမံခန့်ခွဲ့မှုအဖွဲ့ ဥက္ကဋ္ဌ၊ ပြည်နယ်မြေလွတ်၊ မြေလပ်နှင့်မြေရိုင်းများ စီမံခန့်ခွဲရေးကော်မတီ ဥက္ကဋ္ဌ ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ် ဒေါက်တာ ကျော်ထွန်းက ပြည်နယ်လယ်ယာမြေစီမံခန့်ခွဲမှုအဖွဲ့နှင့် ပြည်နယ် မြေလွတ်၊ မြေလပ်နှင့် မြေရိုင်းများ စီမံခန့်ခွဲရေးကော်မတီမှ ခွင့်ပြုပေးနိုင်သည့် ကိစ္စရပ်များကိုလည်း အမြန်ဆုံးဖြတ်ပြီး ပြည်နယ် အစိုးရအဖွဲ့၏ သဘောတူညီချက်နှင့် ခွင့်ပြုပေးသလို ဆက်လက်တင်ပြရမည့် ကိစ္စရပ်များကိုလည်း အမြန်ဆုံး ဆက်လက်တင်ပြ ဆောင်ရွက်နေသည့်အကြောင်း အသိပေးပြောကြားလိုပါကြောင်း၊ အမှန်တကယ် စိုက်ပျိုးလုပ်ကိုင်၍မရသည့် မြေများအပေါ် အခြားနည်းအသုံးပြုရန် လျှောက်ထားဆောင်ရွက်သွားရန် လိုအပ်ပြီး ပြည်နယ်အတွင်းမှာရှိသည့် မြေလွတ်၊ မြေရိုင်းများကိုလည်း အမှန်တကယ် အကောင်အထည်ဖော်လိုသည့် လုပ်ငန်းအပေါ်မူတည်ပြီး လျှောက်ထားလာပါက အမြန်ဆုံးစိစစ် ထောက်ခံ တင်ပြခြင်း၊ ခွင့်ပြုပေးခြင်းများ ဆောင်ရွက်လျက်ရှိပါကြောင်း ပြောကြားသွားသည်။
ဆက်လက်၍ အစည်းအဝေးဆုံးဖြတ်ချက်များကို ရှမ်းပြည်နယ်လယ်ယာမြေ စီမံခန့်ခွဲမှုအဖွဲ့အတွင်းရေးမှူး၊ ပြည်နယ် မြေလွတ်၊ မြေလပ်နှင့် မြေရိုင်းများ စီမံခန့်ခွဲရေးလုပ်ငန်းကော်မတီ အတွင်းရေးမှူး၊ လယ်ယာမြေစီမံခန့်ခွဲမှုနှင့် စာရင်းအင်း ဦးစီးဌာန ညွှန်ကြားရေးမှူး ဦးသန်းဝင်းက လယ်ယာမြေစီမံခန့်ခွဲရေးလုပ်ငန်းအဖွဲ့ အစည်းအဝေးအမှတ်စဥ် (၁/၂၀၂၂) ဆုံးဖြတ်ချက်များ၊ မြေလွတ်၊ မြေလပ်နှင့် မြေရိုင်းများစီမံခန့်ခွဲရေးကော်မတီ အစည်းအဝေးအမှတ်စဥ်(၁/၂၀၂၂) ဆုံးဖြတ်ချက် များအား ဖတ်ကြားအတည်ပြုပြီး ပြည်နယ်လယ်ယာမြေစီမံခန့်ခွဲမှုအဖွဲ့ အစည်းအဝေးအမှတ်စဥ်(၂/၂၀၂၂) တင်ပြချက်များအား ဆွေးနွေးဆုံးဖြတ်ကာ မြေယာအယူခံ အမှုတွဲများ ဆွေးနွေးဆုံးဖြတ်ပြီး ပြည်နယ်မြေလွတ်၊ မြေလပ်နှင့် မြေရိုင်းများစီမံခန့်ခွဲရေး ကော်မတီ အစည်းအဝေးအမှတ်စဥ်(၂/၂၀၂၂) တင်ပြချက်များအား ဆွေးနွေးဆုံးဖြတ်၍ အထွေထွေဆွေးနွေးကြကာ ပြည်နယ် လယ်ယာမြေစီမံခန့်ခွဲ့မှုအဖွဲ့ ဥက္ကဋ္ဌ၊ ပြည်နယ်မြေလွတ်၊ မြေလပ်နှင့်မြေရိုင်းများ စီမံခန့်ခွဲရေးကော်မတီဥက္ကဋ္ဌ ရှမ်းပြည်နယ် အစိုးရအဖွဲ့ ပြည်နယ်ဝန်ကြီးချုပ် ဒေါက်တာ ကျော်ထွန်းက နိဂုံးချုပ်စကားပြောကြားခဲ့ကြောင်း သိရှိရသည်။

ရှမ်းပြည်နယ်အစိုးရအဖွဲ့

တောင်ကြီး မတ် - ၁၄

026

ရှမ်းပြည်နယ် ကိုဗစ်-၁၉ထိန်းချုပ်ရေးနှင့် အရေးပေါ်တုံ့ပြန်ရေးကော်မတီ ၄/၂၀၂၂ လုပ်ငန်းညှိနှိုင်း အစည်းအဝေးကို မတ်(၁၄)ရက် နံနက်(၉)နာရီက တောင်ကြီးမြို့၊ ရှမ်းပြည်နယ်အစိုးရရုံး အစည်းအဝေးခန်းမ၌ ကျင်းပရာ ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ် ဒေါက်တာကျော်ထွန်း၊ အရှေ့ပိုင်းတိုင်းစစ်ဌာနချုပ် တိုင်းမှူး၊ ပြည်နယ်ဝန်ကြီးများ၊ ပြည်နယ်အဆင့်ဌာနဆိုင်ရာများ၊ ပြည်နယ်အစိုးရအဖွဲ့ခွဲနှင့် ကိုယ်ပိုင်အုပ်ချုပ်ခွင့်ရ တိုင်း/ ဒေသများ၊ ခရိုင်စီမံအုပ်ချုပ်ရေးအဖွဲ့များ တက်ရောက်ကြကြောင်း သိရသည်။
ရှမ်းပြည်နယ် ကိုဗစ်-၁၉ ထိန်းချုပ်ရေးနှင့် အရေးပေါ်တုံ့ပြန်ရေးကော်မတီ ဥက္ကဋ္ဌ ရှမ်းပြည်နယ်ဝန်ကြီးချုပ် ဒေါက်တာကျော်ထွန်းက ၂၀၂၂ခုနှစ် မတ်လ(၁၃)ရက် ရောဂါပိုးတွေ့ရှိမှုအနေဖြင့် ရှမ်းပြည်နယ်(တောင်ပိုင်း)တွင် ပိုးတွေ့ရှိသူ(၂၂)ဦး၊ (မြောက်ပိုင်း)တွင် ပိုးတွေ့ရှိသူ(၉)ဦးနှင့် (အရှေ့ပိုင်း)တွင် ပိုးတွေ့ရှိသူ(၆၆)ဦး တွေ့ရှိခဲ့ရာ တစ်ပတ်အတွင်း ပိုးတွေ့ရှိမှု နှိုင်းယှဉ်ချက်စာရင်းအရ ၂၀၂၂ ခုနှစ် မတ်လ(၆)ရက်နေ့တွင် ပိုးတွေ့ရှိသူ (၁၄၂)ဦးတွေ့ရှိခဲ့ပြီး မတ်လ(၁၃)ရက်တွင် ပိုးတွေ့ရှိသူ(၉၇)ဦးတွေ့ရှိခဲ့ရာ(၄၅)ဦးလျော့နည်းကျဆင်းသွားသည်ကို တွေ့ရှိရပါကြောင်း၊ ရှမ်းပြည်နယ်အတွင်းရှိ မြို့နယ်များတွင် ကာကွယ်ဆေးထိုးနှံရန် အကျုံးဝင်သူ လျာထားဦးရေ ပြည်သူ(၃၂၀၄၇၄၂)ဦး၊ ကျောင်းသား/သူ(၁၅၂၇၈၇)ဦး၊ စုစုပေါင်း(၃၃၅၇၅၂၉)ဦးအား ကာကွယ်ဆေးထိုးနှံဆောင်ရွက် ပေးခဲ့ရာ ၂၀၂၂ခုနှစ် မတ်လ(၁၃)ရက်အထိ ပထမအကြိမ်ထိုးနှံပြီးသူ (၂၁၉၅၅၂၀)ဦး၊ ရာခိုင်နှုန်းအားဖြင့် (၆၅) ရာခိုင်နှုန်း၊ ဒုတိယအကြိမ်ထိုးနှံပြီးသူ(၁၈၉၇၂၄၆)ဦး ရာခိုင်နှုန်းအားဖြင့် (၅၇)ရာခိုင်နှုန်းထိုးနှံ ဆောင်ရွက် နိုင်ခဲ့ပါကြောင်း၊ ရာနှုန်းပြည့်ကာကွယ်ဆေးထိုးနှံပြီးစီးရေး လမ်းညွှန်ချက်အပေါ်ဆောင်ရွက်ရာတွင် ကာကွယ်ဆေး ထိုးနှံရန် အကျုံးဝင်သည့် အင်အား(၁၂၀၉၂၉၉)ဦးတွင် ၂၀၂၂ခုနှစ်မတ်လ(၁)ရက်မှ(၁၃)ရက်အထိ(၅၆၀၇၄)ဦးသာ ထိုးနှံနိုင်ခဲ့ပြီး ရာခိုင်နှုန်းအားဖြင့် (၄.၆၄)ရာခိုင်နှုန်းသာ ဆေးထိုးနှံဆောင်ရွက်နိုင်ခဲ့ပြီး ပြည်နယ်တစ်ခုလုံးအနေဖြင့် ၂၀၂၂ ခုနှစ် မတ်လ(၁၃)ရက်နေ့တွင် (၆၁၁၂)ဦးသာထိုးနှံနိုင်ခဲ့သည်ကိုတွေ့ရှိရသဖြင့် ရာနှုန်းပြည့်လျာထား အင်အား ပြည့်မီအောင် ပျှမ်းမျှနေ့စဉ်(၃၀၂၃၂)ဦး ထိုးနှံနိုင်ရေးအတွက် ဆောင်ရွက်နိုင်မှုမရှိသည်ကို တွေ့ရှိရသဖြင့် လျာထားချက်ထက် လျော့နည်းမှုမရိစေရေး ကြပ်မတ်ကွပ်ကဲဆောင်ရွက်ရန် လိုအပ်ပါကြောင်း ပြောကြားသွားသည်။
ဆက်လက်၍ အရှေ့ပိုင်းတိုင်းစစ်ဌာနချုပ် တိုင်းမှူး ဗိုလ်ချုပ်နီလင်းအောင်မှ ကိုဗစ်-၁၉ ရောဂါကာကွယ်ဆေး ထိုးနှံမှုနှင့် ပတ်သက်၍ ပြောကြားပြီး ရှမ်းပြည်နယ် ကိုဗစ်-၁၉ ထိန်းချုပ်ရေးနှင့် အရေးပေါ်တုံ့ပြန်ရေးကော်မတီ အတွင်းရေးမှူး ပြည်နယ်လုံခြုံရေးနှင့်နယ်စပ်ရေးရာဝန်ကြီးဗိုလ်မှူးကြီးလှဦး၊ တွဲဖက်အတွင်းရေးမှူး၊ ပြည်နယ်အစိုးရ အတွင်းရေးမှူး ဦးစိုင်းသော်ဝင်းတို့မှ ဆွေးနွေးတင်ပြကြသည်။
ထို့နောက် ပြည်နယ်အစိုးရအုပ်ချုပ်ရေးအဖွဲ့ခွဲ့နှင့် ကိုယ်ပိုင်အုပ်ချုပ်ခွင့်ရတိုင်း/ဒေသများမှ ဆွေးနွေးတင်ပြ၍ ရှမ်းပြည်နယ်(တောင်ပိုင်း၊ မြောက်ပိုင်း၊ အရှေ့ပိုင်း)ရှိ ခရိုင်စီမံအုပ်ချုပ်ရေးအဖွဲ့များမှ ဆွေးနွေးတင်ပြကာ တက်ရောက်လာကြသည့် ပြည်နယ်အဆင့်ဌာနဆိုင်ရာများမှ ဆွေးနွေးတင်ပြကြပြီး ဆွေးနွေးတင်ပြချက်အပေါ် ပြည်နယ်ဝန်ကြီးချုပ် ဒေါက်တာကျော်ထွန်းက လိုအပ်သည်များ ဖြည့်စွက်ပြောကြားကာ နိဂုံးချုပ်စကား ပြောကြား ခဲ့ကြောင်း သိရှိရသည်။

ရှမ်းပြည်နယ်အစိုးရအဖွဲ့

တောင်ကြီး ဖေဖော်ဝါရီ - ၂၅

024
ရှမ်းပြည်နယ်ကိုဗစ်-၁၉ ထိန်းချုပ်ရေးနှင့် အရေးပေါ်တုံ့ပြန်ရေးကော်မတီ (၃/၂၀၂၂)လုပ်ငန်းညှိနှိုင်းအစည်းအဝေးကို ဖေဖော်ဝါရီ(၂၁)ရက် နံနက်(၁၀)နာရီက တောင်ကြီးမြို့ ရှမ်းပြည်နယ်အစိုးရရုံး အစည်းအဝေးခန်းမ၌ ကျင်းပသည်။
ရှမ်းပြည်နယ်(ကိုဗစ်-၁၉) ထိန်းချုပ်ရေးနှင့် အရေးပေါ်တုံ့ပြန်ရေးကော်မတီဥက္ကဋ္ဌ ရှမ်းပြည်နယ်အစိုးရအဖွဲ့ ပြည်နယ် ဝန်ကြီးချုပ် ဒေါက်တာကျော်ထွန်းက ရှမ်းပြည်နယ်ရှိ မြို့နယ်များအတွင်း ကိုဗစ်-၁၉ ရောဂါ တတိယလှိုင်းဖြစ်ပွားသည့်ကာလ ၂၀၂၁ ခုနှစ် ဇွန်လ(၁)ရက်နေ့မှ ယနေ့ထိ ရောဂါကူးစက်ခံရသူ(၈၄၅၇၁)ဦး၊ ရောဂါပိုးပြန်လည်ကင်းစင်လာသူ (၈၁၅၇၂)ဦး၊ သေဆုံးသူ(၂၃၇၈)ဦးရှိပြီး ကျန်ရှိသည့်ကုသမှုခံယူဆဲ အတည်ပြုလူနာ(၆၂၁)ဦးအား သက်ဆိုင်ရာမြို့နယ်များရှိ ကုသရေး စင်တာများတွင် ကျန်းမာရေးစောင့်ရှောက်ပေးလျက်ရှိပါကြောင်း၊ ရှမ်းပြည်နယ်အတွင်း ယခုနောက်ဆုံးတွေ့ရှိမှုအနေဖြင့် ၂၀၂၂ ခုနှစ် ဇန်နဝါရီ(၁)ရက်နေ့မှ (၃၁)ရက်နေ့ထိ ပိုးတွေ့ရှိမှုစာရင်းအရ ပိုးတွေ့ရှိသူ(၁၃၅၆)ဦး တွေ့ရှိခဲ့ပြီး ၂၀၂၂ ခုနှစ် ဖေဖော်ဝါရီလ (၁)ရက်နေ့မှ (၁၈)ရက်နေ့အထိ ပိုးတွေ့ရှိမှုအနေဖြင့် (၁၁၃၇)ဦးရှိပြီး ပိုးတွေ့ရှိမှု ရာခိုင်နှုန်းအားဖြင့် လျော့နည်းသွားခြင်း မရှိသေးကြောင်း၊ နောက်ဆုံး ကိုဗစ်-၁၉ မျိုးကွဲဖြစ်သည့် Omicron သည် ကူးစက်မြန်သည့်အတွက် ဖြစ်ပွားမှုနှင့် ပြန့်ပွားမှု များအား ထိန်းချုပ်ရန်၊ တွေ့ရှိမှုများရှိလာပါက အလျင်အမြန်တုံ့ပြန်ရန်၊ ကွင်းဆက်ဖြတ်နိုင်ရန်ကိစ္စများကို ပြည်နယ် ကိုဗစ်-၁၉ အရေးပေါ်တုံ့ပြန်ရေးကော်မတီမှ ကြီးကြပ်၍ ခရိုင်/မြို့နယ် ကိုဗစ်-၁၉ အရေးပေါ်တုံ့ပြန်ရေးကော်မတီများသို့ ကြပ်မတ် ဆောင်ရွက်သွားရမည်ဖြစ်ပါကြောင်း၊ ၂၀၂၂ခုနှစ် ဖေဖော်ဝါရီလ (၁၈)ရက်နေ့ ရောဂါပိုးတွေ့ရှိမှုအနေဖြင့် တောင်ကြီးမြို့နယ်တွင် ပိုးတွေ့ရှိသူ(၁၁၇)ဦး၊ လားရှိုးမြို့နယ်တွင် ပိုးတွေ့ရှိသူ(၁၈)ဦး၊ တာချီလိတ်မြို့နယ်တွင် ပိုးတွေ့ရှိသူ(၁၇)ဦး စသည့်မြို့နယ် များတွင် အများဆုံးတွေ့ရှိရပြီး ကျန်မြို့နယ်များတွင်လည်း အနည်းငယ်တွေ့ရှိရပါကြောင်း၊ ပိုးတွေ့ရှိမှုများကို အမြန်ဆုံး ထိန်းချုပ်နိုင်ရေးနှင့် ပိုးတွေ့ရှိသူများကို Version 7 နှင့်အညီ လိုက်နာဆောင်ရွက်ကြရန်၊ ကြပ်မတ်ဆောင်ရွက်ကြရန်၊ အလေးအနက်ထား ဆောင်ရွက်ထားရမည်ဖြစ်ပါကြောင်း၊ ရှမ်းပြည်နယ်အတွင်းရှိ မြို့နယ်များတွင် ကာကွယ်ဆေးထိုးနှံရန် အကျုံးဝင်သူ လျာထားဦးရေ ပြည်သူ (၃၂၀၉၈၄၄)ဦး၊ ကျောင်းသား၊ ကျောင်းသူ(၁၄၆၀၂၆)ဦး၊ စုစုပေါင်း (၃၃၅၅၈၇၀)ဦးအား ကာကွယ်ဆေးထိုးနှံဆောင်ရွက်ပေးခဲ့ရာ ၂၀၂၂ခုနှစ် ဖေဖော်ဝါရီလ(၁၈)ရက်နေ့အထိ တစ်ကြိမ်ထိုးနှံပြီးသူ(၂၁၁၅၉၂၆)ဦး၊ နှစ်ကြိမ်မြောက် ထိုးနှံပြီးသူ(၁၇၉၅၂၆၆)ဦး ထိုးနှံပြီးစီးခဲ့ပြီး တစ်ကြိမ်ထိုးနှံပြီးစီးမှုအပေါ်တွင် ရာခိုင်နှုန်းအားဖြင့် (၆၃%) လွှမ်းခြုံ ထိုးနှံနိုင်ခဲ့ပြီး နှစ်ကြိမ်ထိုးနှံပြီးစီးမှုအပေါ်တွင် ရာခိုင်နှုန်းအားဖြင့် (၅၃%)လွှမ်းခြုံထိုးနှံနိုင်ခဲ့ကြောင်းနှင့် ကျောင်းသား၊ ကျောင်းသူ များအနေဖြင့် လျာထားမှုအပေါ်တွင် (၉၈.၈%) ထိုးနှံဆောင်ရွက်နိုင်ခဲ့ပြီး ထပ်ဆောင်းကာကွယ်ဆေး Booster ထိုးနှံရန် အကျုံးဝင်သူလျာထား (၆၁၇၉၂)ဦးရှိရာ (၆၆၉၉)ဦး ထိုးနှံနိုင်ခဲ့ပြီးဖြစ်သဖြင့် (၁၀.၈%) ထိုးနှံပြီးစီးပြီဖြစ်ကြောင်း ပြောကြားသည်။
ဆက်လက်၍ အရှေ့ပိုင်းတိုင်းစစ်ဌာနချုပ် ဒုတိယတိုင်းမှူး ဗိုလ်မှူးချုပ်ဝင်းဇော်မိုး၊ ရှမ်းပြည်နယ် ကိုဗစ်-၁၉ ထိန်းချုပ်ရေးနှင့် အရေးပေါ်တုံ့ပြန်ရေးကော်မတီ အတွင်းရေးမှူး ပြည်နယ်လုံခြုံရေးနှင့်နယ်စပ်ရေးရာဝန်ကြီး ဗိုလ်မှူးကြီးလှဦး၊ ပြည်နယ်လူမှုရေးရာဝန်ကြီးဦးအောင်မြင့်၊ ရှမ်းပြည်နယ်အစိုးရအဖွဲ့ ပြည်နယ်အတွင်းရေးမှူး ဦးစိုင်းသော်ဝင်းတို့က ကိုဗစ်-၁၉ ရောဂါနှင့်ပတ်သက်၍ ရှင်းလင်းဆွေးနွေးပြီး အစည်းအဝေး တက်ရောက်လာသူများမှ ဆွေးနွေးတင်ပြကြကာ ဆွေးနွေး တင်ပြချက်များအပေါ် ပြည်နယ်ဝန်ကြီးချုပ် ဒေါက်တာကျော်ထွန်းက လိုအပ်သည်များကို ဖြည့်စွက်ပြောကြား၍ နိဂုံးချုပ်စကား ပြောကြားခဲ့ကြောင်း သိရှိရသည်။

ရှမ်းပြည်နယ်အစိုးရအဖွဲ့

နောက်ထပ်သတင်းများဖတ်မည်