We have 318 guests and no members online

ကျိုင်းတုံ ဇန်နဝါရီ - ၇

006
ရှမ်းပြည်နယ်(အရှေ့ပိုင်း) ကျိုင်းတုံမြို့နယ် လွိုင်မွေတောင်စခန်း၌ ဇန်နဝါရီ(၆)ရက် နံနက်(၉)နာရီက ချယ်ရီပန်းပွဲတော် ဖွင့်ပွဲကျင်းပကြောင်း သိရသည်။
ချယ်ရီပန်းပွဲတော် ဖွင့်ပွဲမုခ်ဦးအား ရှမ်းပြည်နယ်ဝန်ကြီးချုပ် ဒေါက်တာကျော်ထွန်း၊ တြိဂံဒေသတိုင်း စစ်ဌာန ချုပ် တိုင်းမှူး ဗိုလ်မှူးချုပ် မျိုးမင်းထွန်း၊ ဟိုတယ်နှင့်ခရီးသွားလာရေးဝန်ကြီးဌာန ဒုတိယညွှန်ကြားရေးမှူး ဦးမြင့်ထွေး တို့က ဖဲကြိုးဖြတ် ဖွင့်လှစ်ပေးကြသည်။
ရှမ်းပြည်နယ်ဝန်ကြီးချုပ် ဒေါက်တာကျော်ထွန်းက ရှမ်းပြည်နယ်သည် မြန်မာနိုင်ငံတွင် အကြီးဆုံးပြည်နယ် တစ်ခုဖြစ်သလို မတူကွဲပြားသည့် လူမျိုးစု(၃၃)မျိုး ချစ်ကြည်ရင်းနှီးစွာ အတူတကွ နေထိုင်ကြသည့် ပြည်နယ်တစ်ခု ဖြစ်ပါကြောင်း၊ ရှမ်းပြည်နယ်သည် မြေပြန့် လွင်ပြင်နည်းပါးပြီး တောင်တန်းပေါများသည့် ပြည်နယ်တစ်ခုဖြစ်သည်နှင့် အညီ ရေတံခွန်များ၊ ထုံးကျောက်လှိုဏ်ဂူများ၊ သာယာလှပသည့် တောတောင်ရှုခင်းများ၊ ကမ္ဘာကျော် အင်းလေးကန် စသည့် ခရီးစဥ်ဒေသများစွာကို ပိုင်ဆိုင်ထားသည့် ပြည်နယ်တစ်ခု ဖြစ်ပါကြောင်း၊ ရှမ်းပြည်နယ်၏ အမှတ်အသား တစ်ခုဖြစ်သည့် ချယ်ရီပန်းသည် ရှမ်းပြည်နယ်၏ ခရီးစဥ် ဆွဲဆောင်မှုတစ်ခုအဖြစ် ပြောလို့ရပါကြောင်း၊ ရှမ်းပြည်နယ် အစိုးရအဖွဲ့အနေဖြင့် ခရီးသွားကဏ္ဍ ဖွံ့ဖြိုးတိုးတက်ရေးကို အလေးထား ဆောင်ရွက်ပေးလျက်ရှိပြီး ခရီးသွား အသီး အပွင့်များကို မြို့ပေါ်နေ ပြည်သူများအတွက်သာမက ကျေးလက်နေပြည်သူများပါ ခံစားနိုင်စေရန် ဆောင်ရွက် ပေးလျက် ရှိပါကြောင်း၊ ပြည်နယ်အတွင်း ခရီးသွားလုပ်ငန်း အလားအလာရှိသည့် ကျေးရွာ(၁၀)ရွာကို ခရီးသွား ကျေးရွာအဖြစ် ဖော်ဆောင်ပေးလျက်ရှိပါကြောင်း၊ တိုင်းရင်းသားလူမျိုးစု၏ ကျေးရွာများထဲတွင် ပြည်တွင်းပြည်ပ ခရီးသွားများ သွားရောက်လည်ပတ်နိုင်ရေးအတွက် အလားအလာရှိသည့် ကျေးရွာများကို ခရီးသွားကျေးရွာအဖြစ် ဆက်လက်ဖော်ဆောင်ပေးသွားမည်ဖြစ်ပြီး နောင်ဖာရေကန်၊ ကွန်အော်ရေတံခွန်၊ ဘန့်ဘွေးကျင်းရေတံခွန် နေရာများ ကိုလည်း ပြည်တွင်းပြည်ပခရီးသွားများ လာရောက်လည်ပတ်နိုင်ရန် ရှမ်းပြည်နယ်အစိုးရအဖွဲ့မှ ထောက်ပံ့ဆောင်ရွက် ပေးသွားမည်ဖြစ်ကြောင်း၊ ရှမ်းပြည်နယ်၏ ခရီးသွားဆွဲဆောင်မှုတစ်ခု ဖြစ်လာမည့် လွိုင်မွေတောင်စခန်းတွင် ချယ်ရီပန်းပွဲတော်ကိုလည်း နှစ်စဥ်ကျင်းပဆောင်ရွက်နိုင်ပြီး ခရီးစဥ်ဒေသတစ်ခုအနေဖြင့် ဖြစ်ပေါ်လာစေရန် ဆုမွန် ကောင်း တောင်းပေးပါကြောင်း ပြောကြားသည်။
ဆက်လက်၍ ဟိုတယ်နှင့် ခရီးသွားလာရေးဝန်ကြီးဌာန၊ ပြည်ထောင်စုဝန်ကြီးကိုယ်စား ဒုတိယ ညွှန်ကြားရေးမှူးချုပ် ဦးမြင့်ထွေးမှ အမှာစကားပြောကြားပြီး တိုင်းရင်းသားယဥ်ကျေးမှု အကအဖွဲ့များဖြစ်သည့် ရှမ်းတိုင်းရင်းသားယဥ်ကျေးမှုအက၊ လားဟူတိုင်းရင်းသားယဥ်ကျေးမှုအက၊ “ဝ” တိုင်းရင်းသားယဥ်ကျေးမှုအက၊ အာခါတိုင်းရင်းသားယဥ်ကျေးမှုအကများဖြင့် ကပြဖျော်ဖြေတင်ဆက်ကြကာ ပြည်နယ်ဝန်ကြီးချုပ်၊ တြိဂံဒေသတိုင်း တိုင်းမှူး၊ ပြည်နယ်ဝန်ကြီးများနှင့် တာဝန်ရှိသူများက ကြည့်ရှုအားပေးကြပြီး ပြည်နယ်ဝန်ကြီးချုပ်၊ တြိဂံဒေသတိုင်း တိုင်းမှူးတို့မှ တိုင်းရင်းသားယဥ်ကျေးမှုအကအဖွဲ့အား ဂုဏ်ပြုချီးမြှင့်ငွေများ ပေးအပ်ကာ ချယ်ရီပန်းပွဲတော်ကျင်းပ ပေးခြင်းနှင့် ပတ်သက်၍ ဒေသခံ အာခါတိုင်းရင်းသား မျိုးချစ်ခေါင်းဆောင် ဦးမင်းညိုမှ ကျေးဇူးတင်စကား ပြောကြားပြီး ပြည်နယ်ဝန်ကြီးချုပ်၊ တြိဂံဒေသတိုင်း၊ တိုင်းမှူးတို့က ချယ်ရီပန်းပွဲတော် အမှတ်တရတံဆိပ် ရိုက်နှိပ်ထားသော T-Shirt အထည်များကို ပွဲတော်သို့ ရောက်ရှိလာသည့် ပရိတ်သတ်များအား ပေးအပ်၍ တိုင်းရင်းသားရိုးရာ အမှတ်တရလက်ဆောင်ပစ္စည်းနှင့် စားစရာများ ရောင်းချနေသည့် ဆိုင်တန်းများအား လှည့်လည် ကြည့်ရှုခဲ့ကြကြောင်း သိရသည်။
ထို့နောက် ပြည်နယ်ဝန်ကြီးချုပ်၊ ပြည်နယ်ဝန်ကြီးများနှင့် တာဝန်ရှိသူတို့သည် (၄၄)မိုင် လွယ်ဆမ်ဆုံ တောင်ထိပ်ရှိ လမ်းဦးစီးဌာန ရှင်းလင်းဆောင်သို့ သွားရောက်ကာ လမ်းဦးစီးဌာနမှ တာဝန်ရှိသူတစ်ဦးမှ မိုင်းဆတ် - တာချီလိတ်လမ်း ဆောင်ရွက်နေမှုကို ရှင်းလင်းရာ ပြည်နယ်ဝန်ကြီးချုပ်က လိုအပ်သည်များ ဖြည့်စွက်မှာကြား ခဲ့ကြောင်း သိရှိရသည်။

ရှမ်းပြည်နယ်အစိုးရအဖွဲ့

ကျိုင်းတုံ ဇန်နဝါရီ - ၆

005
ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ် ဒေါက်တာကျော်ထွန်း၊ တြိဂံဒေသတိုင်း စစ်ဌာနချုပ်တိုင်းမှူး ဗိုလ်မှူးချုပ် မျိုးမင်းထွန်း၊ ပြည်နယ်ဝန်ကြီးများ၊ ကျိုင်းတုံမြို့ရှိ ပြည်နယ် ခရိုင် မြို့နယ်အဆင့် ဌာနဆိုင်ရာများနှင့် ဇန်နဝါရီ(၅)ရက် ညနေ (၃)နာရီက တြိဂံဒေသတိုင်း စစ်ဌာနချုပ် အစည်းအဝေးခန်းမ၌ ကိုဗစ် - ၁၉ ထိန်းချုပ်ရေးနှင့် အရေးပေါ်တုံ့ပြန်ရေးကော်မတီ လုပ်ငန်းညှိနှိုင်း အစည်းအဝေးတက်ရောက်ကာ ပြည်နယ်ဝန်ကြီးချုပ်မှ အဖွင့်အမှာစကားပြောကြားပြီး၊ တြိဂံဒေသတိုင်း တိုင်းမှူး ဗိုလ်မှူးချုပ် မျိုးမင်းထွန်းက ကိုဗစ် - ၁၉ ရောဂါ ကာကွယ်ရေးနှင့် ပတ်သက်၍ ရှင်းလင်းတင်ပြပြီး ရှမ်းပြည်နယ်(အရှေ့ပိုင်း) ကိုဗစ် - ၁၉ ကာကွယ် ထိန်းချုပ် ကုသရေး ကော်မတီ၏ လုပ်ငန်းဆိုင်ရာ ဆောင်ရွက်ချက်များအပေါ် ပြည်နယ် ကုသရေးနှင့် ပြည်သူ့ကျန်းမာရေး ဦးစီးဌာနမှူး ဒေါက်တာမြင့်ကျော်မှ ရှင်းလင်းဆွေးနွေးကာ တက်ရောက်လာသူများမှ အထွေထွေ ဆွေးနွေးပြီး ဆွေးနွေးတင်ပြချက်များအပေါ် ပြည်နယ်ဝန်ကြီးချုပ်မှ လိုအပ်ချက်များအပေါ် ဖြည့်ဆည်းဆောင်ရွက် ပြောကြား၍ နိဂုံးချုပ်စကား ပြောကြားခဲ့ကြောင်း သိရသည်။
ဆက်လက်၍ ပြည်နယ်ဝန်ကြီးချုပ်၊ တြိဂံဒေသတိုင်း တိုင်းမှူး၊ ပြည်နယ်ဝန်ကြီးများနှင့် တာဝန်ရှိသူများသည် ကျိုင်းတုံမြို့ မြို့နယ်စည်ပင်သာယာရေးခန်းမ၌ ကျင်းပသော လူမှုဝန်ထမ်း ကယ်ဆယ်ရေးနှင့် ပြန်လည်နေရာချထားရေးဝန်ကြီး ဌာန၊ ရှမ်းပြည်နယ်(အရှေ့ပိုင်း)အတွင်းရှိ စေတနာ့ဝန်ထမ်းအဖွဲ့အစည်းများအား ၂၀၂၁ ခုနှစ်၊ အောက်တိုဘာလမှ ၂၀၂၂ ခုနှစ် မတ်လအထိ (၆)လအတွက် ထောက်ပံ့ပေးအပ်ခြင်း အခမ်းအနား တက်ရောက်ရာ ရှမ်းပြည်နယ်ဝန်ကြီးချုပ် ဒေါက်တာ ကျော်ထွန်းက ရှမ်းပြည်နယ်(အရှေ့ပိုင်း) ကျိုင်းတုံခရိုင်အတွင်း လူမှုဝန်ထမ်းဦးစီးဌာနမှ တည်ထောင်ခွင့်ပြုမိန့်ရရှိပြီး ထောက်ပံ့ ပေးနေသည့် ဘိုးဘွားရိပ်သာ(၁)ခု၊ မသန်စွမ်းပရဟိတဂေဟာ(၁)ခုနှင့် လူငယ်ဖွံ့ဖြိုးရေးပရဟိတဂေဟာ(၁)ခုတို့ကို လူမှုဝန်ထမ်း ဦးစီးဌာနအနေဖြင့် စေတနာ့ဝန်ထမ်းအဖွဲ့အစည်းများ ထောက်ပံ့ရေးစည်းမျဉ်း စည်းကမ်းများနှင့်အညီ ထောက်ပံ့ပေးလျက် ရှိပါကြောင်း၊ ပရဟိတဂေဟာနှင့်အတူ ကိုယ့်အားကိုယ်ကိုး မူကြိုကျောင်း(၁၁)ကျောင်းနှင့် မိခင်ဝိုင်း(၂၇)ကျောင်း တို့ကိုပါ ထောက်ပံ့ကြေး ပေးအပ်လျက်ရှိပြီး ယနေ့တွင် ဘိုးဘွားရိပ်သာ(၁)ခု၊ မသန်စွမ်းပရဟိတဂေဟာ(၁)ခုနှင့် လူငယ်ဖွံ့ဖြိုးရေး ပရဟိတဂေဟာ(၁)ခုတို့အား နိုင်ငံတော်၏ကိုယ်စား ယခုလို ကိုယ်ထိလက်ရောက် ထောက်ပံ့ချီးမြှင့်ပေးခွင့်ရသည့်အတွက် လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာနနည်းတူ ရှမ်းပြည်နယ်အစိုးရအဖွဲ့မှလည်း ထပ်တူထပ်မျှ ဂုဏ်ယူဝမ်းမြောက်မိပါကြောင်း၊ ယနေ့ထောက်ပံ့ပေးမည့် ကျိုင်းတုံခရိုင်အတွင်းရှိ ကျိုင်းတုံဘိုးဘွား ရိပ်သာအတွက် ကျပ်(၁,၁၀၂,၅၀၀ိ/)၊ စိန်မေရီမသန်စွမ်းဂေဟာအတွက် ကျပ်(၈၁၀,၀၀၀ိ/)၊ မေတ္တာရိပ်မြုံ လူငယ်ပရဟိတဂေဟာအတွက် ကျပ်(၁,၃၂၃,၀၀၀ိ/)၊ စုစုပေါင်း(၃,၂၃၅,၅၀၀ိ/) (ကျပ်သုံးဆယ့်နှစ်သိန်းသုံးသောင်းငါးထောင်ငါးရာတိတိ) ဖြစ်ပြီး လူမှုဝန်ထမ်း ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာနနှင့် ရှမ်းပြည်နယ်အစိုးရအဖွဲ့တို့၏ ဦးဆောင်လမ်းညွှန်မှုများကိုခံယူ၍ ကြိုးပမ်းဆောင်ရွက်သွားကြရန် ပြောကြားသည်။
ဆက်လက်၍ စေတနာ့ဝန်ထမ်းအဖွဲ့အစည်းများသို့ ထောက်ပံ့ငွေများပေးအပ်ရာ ပြည်နယ်ဝန်ကြီးချုပ် ဒေါက်တာ ကျော်ထွန်းက ကျိုင်းတုံဘိုးဘွား ရိပ်သာအတွက် ကျပ်(၁,၁၀၂,၅၀၀ိ/)နှင့် မေတ္တာရိပ်မြုံ လူငယ်ပရဟိတဂေဟာအတွက် ကျပ်(၁,၃၂၃,၀၀၀ိ/)တို့ကို ထောက်ပံ့ပေးအပ်၍လည်းကောင်း၊ တြိဂံဒေသတိုင်း စစ်ဌာနချုပ် တိုင်းမှူး ဗိုလ်မှူးချုပ်မျိုးမင်းထွန်းက စိန်မေရီ မသန်စွမ်းဂေဟာအတွက် ကျပ်(၈၁၀,၀၀၀ိ/)တို့ကို ထောက်ပံ့ပေးအပ်ပေးပြီး ဂေဟာအုပ်ချုပ်ရေးမှူးတစ်ဦးမှ ကျေးဇူးတင်စကား ပြန်လည်ပြောကြားကြောင်း သိရသည်။
ထို့နောက် ပြည်နယ်ဝန်ကြီးချုပ်၊ တိုင်းမှူး၊ ပြည်နယ်ဝန်ကြီးများနှင့် တာဝန်ရှိသူတို့သည် ကျိုင်းတုံမြို့နယ် စည်ပင် သာယာရေးဌာနမှ တာဝန်ယူဆောင်ရွက်နေသော ကျိုင်းအင်းလမ်း ကတ္တရာထပ် ပိုးလွှာခင်းခြင်း လုပ်ငန်းဆောင်ရွက်ပြီးစီးမှု အခြေအနေနှင့် ရှမ်းပြည်နယ်အစိုးရအဖွဲ့၏ ဒေသဖွံ့ဖြိုးရေး ထောက်ပံ့ရန်ပုံငွေဖြင့် ဆောင်ရွက်သော နောင်တုံကန် ကွန်ကရစ်တိုင်နှင့် ခြံစည်းရိုးကာရံခြင်းလုပ်ငန်း ဆောင်ရွက်နေမှု အခြေအနေများကို လှည့်လည်ကြည့်ရှု စစ်ဆေးကြပြီး ကျိုင်းတုံမြို့ ဝစီပိတ်သီလဓမ္မကုန်းသာတောရ ကျောင်းဆရာတော်အား သွားရောက်ဖူးမျှော်ကာ နဝကမ အလှူငွေကျပ် သိန်း(၅၀)ကို ပြည်နယ်ဝန်ကြီးချုပ် ဒေါက်တာကျော်ထွန်း၊ တိုင်းမှူး ဗိုလ်မှူးချုပ် မျိုးမင်းထွန်းတို့က ဆက်ကပ်လှူဒါန်းပေးကြပြီး ဗုဒ္ဓဥယျာဉ် ဘက်စုံဖွံ့ဖြိုးတိုးတက်ရေးအတွက် ညှိနှိုင်းဆွေးနွေးကြကြောင်း သိရှိရသည်။

ရှမ်းပြည်နယ်အစိုးရအဖွဲ့

 003

တောင်ကြီး ဇန်နဝါရီ - ၄
(၇၄)နှစ်မြောက် လွတ်လပ်ရေးနေ့ အလံတင်အခမ်းအနားကို ဇန်နဝါရီ(၄)ရက် နံနက်(၄)နာရီ မိနစ်(၂၀)က တောင်ကြီးမြို့၊ အဝေရာမီးပုံးပျံကွင်း၌ ကျင်းပရာ ပြည်ထောင်စုသမ္မတ မြန်မာနိုင်ငံတော်အလံအား တိုင်အပြည့် လွှင့်ထူပေး ပြီးနောက် တာဝန်ရှိသူများမှ နိုင်ငံတော်အလံအား အလေးပြုကြသည်။ အဆိုပါ အခမ်းအနားသို့ ရှမ်းပြည်နယ်အစိုးရအဖွဲ့ ပြည်နယ်လုံခြုံရေးနှင့် နယ်စပ်ရေးရာဝန်ကြီး၊ ပြည်နယ်လူမှုရေးရာဝန်ကြီး၊ ပြည်နယ်လမ်းပန်းဆက်သွယ်ရေးဝန်ကြီး၊ ပြည်နယ် အစိုးရအဖွဲ့ အတွင်းရေးမှူး နယ်မြေခံ တပ်မတော်သားများနှင့် ရဲတပ်ဖွဲ့ဝင်များ၊ တောင်ကြီးမြို့နယ် ရဲတပ်ဖွဲ့မှူးနှင့် ပြည်နယ်ခရိုင် မြို့နယ်အဆင့် ဌာနဆိုင်ရာများ၊ ရပ်ကွက်ကျေးရွာအုပ်ချုပ်ရေးမှူးများ၊ တာဝန်ရှိသူများ တက်ရောက်ကြကြောင်း သိရသည်။
ဆက်လက်၍ သဝဏ်လွှာဖတ်ကြားပွဲ အခမ်းအနားကို နံနက်(၇)နာရီက တောင်ကြီးမြို့ အဝေရာမီးပုံးပျံကွင်း၌ ကျင်းပရာ ပထမဦးစွာ စစ်ရေးပြတပ်ခွဲက စစ်ကြောင်းများဖြင့် ချီတက်နေရာယူပြီး ရှမ်းပြည်နယ်အစိုးရအဖွဲ့ ပြည်နယ် ဝန်ကြီးချုပ် ဒေါက်တာကျော်ထွန်းအား အလေးပြု၍ ပြည်နယ်ဝန်ကြီးနှင့် အခမ်းအနားတက်ရောက်လာသူများက ပြည်ထောင်စု သမ္မတ မြန်မာနိုင်ငံတော်အလံကို အလေးပြုကြရာ ဂုဏ်ပြုစစ်တီးဝိုင်းအဖွဲ့က နိုင်ငံတော်သီချင်းကို တီးမှုတ်ဂုဏ်ပြုပြီး ကျဆုံး လေပြီးသော ခေါင်းဆောင်ကြီးများနှင့် တပ်မတော်သားများအား အလေးပြုကာ ဂုဏ်ပြုစစ်ကြောင်းမှ သစ္စာအဓိဌာန် (၄)ချက် ရွတ်ဆိုကြပြီးနောက် ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ် ဒေါက်တာကျော်ထွန်းက နိုင်ငံတော်စီမံအုပ်ချုပ်ရေး ကောင်စီဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်ထံမှ ပေးပို့သော (၇၄)နှစ်မြောက် လွတ်လပ်ရေးနေ့ သဝဏ်လွှာကိုဖတ်ကြား၍ အခမ်းအနားကို အောင်မြင်စွာ ရုပ်သိမ်းလိုက်သည်။
အဆိုပါ (၇၄)နှစ်မြောက် လွတ်လပ်ရေးနေ့ အခမ်းအနားသို့ ရှမ်းပြည်နယ်ဝန်ကြီးချုပ် ဒေါက်တာကျော်ထွန်းနှင့် ဇနီး၊ ပြည်နယ်တရားလွှတ်တော် တရားသူကြီးချုပ်နှင့် ဇနီး၊ အရှေ့ပိုင်းတိုင်း စစ်ဌာနချုပ် တိုင်းမှူး၊ ပြည်နယ်ဝန်ကြီးများနှင့် ဇနီးများ၊ တိုင်းရင်းသားရေးရာဝန်ကြီး၊ ပြည်နယ်ဥပဒေချုပ်၊ ပအိုဝ်းကိုယ်ပိုင်အုပ်ချုပ်ခွင့်ရဒေသဦးစီးအဖွဲ့ ဥက္ကဋ္ဌ၊ ပြည်နယ်၊ ခရိုင်၊ မြို့နယ် အဆင့် ဌာနဆိုင်ရာများ၊ စစ်ရေးပြတပ်ဖွဲ့များနှင့် ဂုဏ်ပြုစစ်တီးဝိုင်း၊ ရပ်ကွက်ကျေးရွာအုပ်ချုပ်ရေးမှူးများ၊ ဒေသခံတိုင်းရင်းသား ပြည်သူများ တက်ရောက်ကြကြောင်း သိရှိရသည်။
ထို့နောက် (၇၄)နှစ်မြောက် လွတ်လပ်ရေးနေ့ အထိမ်းအမှတ်တွင် ပျော်ပွဲရွှင်ပွဲများဖြင့် ပြည်နယ်အားကစား လေ့ကျင့်ရုံ ကွင်းနှင့် ပြည်နယ်အားကစားကွင်းများတွင် ဌာနဆိုင်ရာပေါင်းစုံ အမျိုးသား အမျိုးသမီး လွန်ကြိုးဆွဲပြိုင်ပွဲ၊ ခြေသုံးချောင်း ထောက်ပြိုင်ပွဲ၊ အမျိုးသမီး ပူစီပေါင်းပုတ်ပြိုင်ပွဲ၊ အမျိုးသား ပူစီပေါင်းညှပ်ပြေးပြိုင်ပွဲ၊ ဌာနဆိုင်ရာ ဘောလုံးဂိုးကျင်းသွင်းပြိုင်ပွဲ၊ ဂေါက်သီးကျင်းစိမ်ရိုက်ပြိုင်ပွဲ၊ အမျိုးသား အမျိုးသမီး မီတာ(၁၀၀)နှင့် မီတာ(၂၀၀)ပြိုင်ပွဲ၊ ခေါင်းအုံးရိုက်ပြိုင်ပွဲ၊ အမျိုးသား ဘော်လီဘောပြိုင်ပွဲတို့ ယှဉ်ပြိုင်ကစားကြရာ ပြည်နယ်ဝန်ကြီးချုပ် ဒေါက်တာကျော်ထွန်း၊ ပြည်နယ်ဝန်ကြီးများ၊ ပြည်နယ် အဆင့် ဌာနဆိုင်ရာများနှင့် တာဝန်ရှိသူများက ကြည့်ရှုအားပေးကြပြီး ပြည်နယ်ဝန်ကြီးချုပ်၊ ပြည်နယ်ဝန်ကြီးများနှင့် တာဝန်ရှိသူ များက ဘောလုံးဂိုးကျင်းသွင်းနှင့် ဂေါက်သီးကျင်းစိမ်ရိုက်ပြိုင်ပွဲကို ပါဝင်ဆင်နွှဲကြ၍ ဆုချီးမြှင့်ပွဲကျင်းပရာ ပြည်နယ်လူမှုရေး ဝန်ကြီး ဦးအောင်မြင့်မှ ပြည်နယ်ဝန်ကြီးချုပ် ဒေါက်တာကျော်ထွန်းအား ဂုဏ်ပြုဆုချီးမြှင့်ပေးပြီး ပြည်နယ်ဝန်ကြီးချုပ် ဒေါက်တာကျော်ထွန်းက ဘောလုံးဂိုးကျင်းသွင်း၌ ပထမ၊ ဒုတိယ၊ တတိယဆု ရရှိသော ပြည်နယ်အဆင့် ဌာနဆိုင်ရာများနှင့် ပထမ၊ ဒုတိယ၊ တတိယဆု ရရှိသော ပြည်နယ်ဝန်ကြီးများ၊ ပြည်နယ်အဆင့် အမျိုးသမီးဆု ရရှိသူများအား ဆုချီးမြှင့်ပေး၍ လည်းကောင်း၊ ပြည်နယ်အဆင့် အမျိုးသား၊ အမျိုးသမီး ဂေါက်သီးကျင်းစိမ်ရိုက်ပြိုင်ပွဲတွင် ပထမ၊ ဒုတိယ၊ တတိယဆု ရရှိသူ များအား ပြည်နယ်လူမှုရေးဝန်ကြီး ဦးအောင်မြင့်မှ ဆုချီးမြှင့်ပေး၍လည်းကောင်း၊ အမျိုးသား မီတာ(၁၀၀) အပြေးပြိုင်ပွဲတွင် တတိယ၊ ဒုတိယ၊ ပထမဆု ရရှိသူများအား ဆုတံဆိပ်နှင့် ငွေသားဆုကို ပြည်နယ်ဥပဒေချုပ် ဦးစိုင်းကျော်ဇံမှ ဆုချီးမြှင့်ပေး၍ လည်းကောင်း၊ အမျိုးသမီး မီတာ(၁၀၀)အပြေးပြိုင်ပွဲတွင် တတိယ၊ ဒုတိယ၊ ပထမဆု ရရှိသူများအား တိုင်းရင်းသားရေးရာ ဝန်ကြီး ဦးအောင်ကြည်ဝင်းမှ ဆုချီးမြှင့်ပေး၍ လည်းကောင်း၊ အမျိုးသား၊ အမျိုးသမီး မီတာ(၄၀၀) အပြေးပြိုင်ပွဲတွင် တတိယ၊ ဒုတိယ၊ ပထမဆု ရရှိသူများအား ဆုတံဆိပ်နှင့် ငွေသားဆုတို့ကို ပြည်နယ်သယံဇာတဝန်ကြီး ဦးစိုင်းလိတ်နှင့် ပြည်နယ် စီးပွားရေးရာဝန်ကြီး ဦးခွန်သိန်းမောင်တို့မှ ဆုချီးမြှင့်ပေး၍ လည်းကောင်း၊ အမျိုးသား အမျိုးသမီး မီတာ(၁၀၀) လက်ဆင့်ကမ်း ပြိုင်ပွဲတွင် ဆုရရှိသူများနှင့် အမျိုးသမီး အမျိုးသား လွန်ဆွဲပြိုင်ပွဲတွင် ပထမ၊ ဒုတိယ၊ တတိယဆု ရရှိသူများအား ပြည်နယ် လူမှုရေးဝန်ကြီး ဦးအောင်မြင့်မှ ဆုချီးမြှင့်ပေး၍လည်းကောင်း၊ ကလပ်ပေါင်းစုံ အမျိုးသား၊ အမျိုးသမီး ဘက်စကတ်ဘော ပြိုင်ပွဲတွင် တတိယ၊ ဒုတိယ၊ ပထမဆုရရှိသူများနှင့် အမျိုးသားရိုးရာခြင်းပြိုင်ပွဲ၊ အမျိုးသားပိုက်ကျော်ခြင်း ပြိုင်ပွဲတွင် ဆုရရှိသူ များအား ဆုတံဆိပ်နှင့် ငွေသားဆု (၂)သိန်း၊ (၃)သိန်း၊ (၅)သိန်း ဆုဖလားတို့ကို ပြည်နယ်ဝန်ကြီးချုပ် ဒေါက်တာကျော်ထွန်းက ဆုချီးမြှင့်ပေး၍ လည်းကောင်း၊ အမျိုးသမီး ဘော်လီဘောပြိုင်ပွဲတွင် တတိယဆု ရရှိသူများကို ဆုတံဆိပ်နှင့် ငွေသားဆု(၂)သိန်း တို့ကို တိုင်းရင်းသားရေးရာဝန်ကြီး ဒုတိယဆုရရှိသူများအသင်းအား ဆုတံဆိပ်နှင့် ငွေသားဆု (၃)သိန်းတို့ကို သယံဇာတဝန်ကြီး၊ ပထမဆုရရှိသောအသင်းအား ဆုတံဆိပ်နှင့် ငွေသားဆု(၅)သိန်း ဆုဖလားတို့ကို ပြည်နယ်လူမှုရေးရာဝန်ကြီးတို့က အသီးသီး ဆုချီးမြှင့်ပေးကြပြီး အမျိုးသားဘော်လီဘောပြိုင်ပွဲတွင် တတိယဆုရရှိသောအသင်းအား ဆုတံဆိပ်နှင့် ငွေသားဆု(၂)သိန်းတို့ကို ပြည်နယ်ဥပဒေချုပ်၊ ဒုတိယဆုရရှိသောအသင်းအား ဆုတံဆိပ်နှင့် ငွေသားဆု(၂)သိန်းတို့ကို ပြည်နယ်စီးပွားရေးရာဝန်ကြီး၊ ပထမဆုရရှိသောအသင်းအား ဆုတံဆိပ်နှင့် ငွေသားဆု(၅)သိန်း ဆုဖလားတို့ကို ပြည်နယ်ဝန်ကြီးချုပ် ဒေါက်တာကျော်ထွန်းက အသီးသီး ဆုချီးမြှင့်ပေးကြကြောင်း သိရှိရသည်။

ရှမ်းပြည်နယ်အစိုးရအဖွဲ့

ကျိုင်းတုံ ဇန်နဝါရီ - ၆

004
ရှမ်းပြည်နယ်(အရှေ့ပိုင်း) ကျိုင်းတုံမြို့တွင် “ပန်းခင်းစီမံချက်”ဖြင့် အိမ်ထောင်စုလူဦးရေစာရင်း၊ နိုင်ငံသားစိစစ်ရေး ကတ်ပြားပေးအပ်ခြင်းနှင့် လျာထားချက် ပြီးမြောက်အောင်မြင်ပွဲကို ဇန်နဝါရီ(၅)ရက် နံနက်(၁၁)နာရီခွဲက ကျိုင်းတုံမြို့နယ် စည်ပင်သာယာရေးခန်းမ၌ ကျင်းပသည်။
ရှမ်းပြည်နယ်ဝန်ကြီးချုပ် ဒေါက်တာကျော်ထွန်းက ယနေ့အခမ်းအနားသည် လူဝင်မှုကြီးကြပ်ရေးနှင့် ပြည်သူ့အင်အား ဝန်ကြီးဌာနက တာဝန်ယူဆောင်ရွက်ပေးနေသည့် ပန်းခင်းစီမံချက်ဖြင့် နိုင်ငံသားစိစစ်ရေးကတ်ပြား ပေးအပ်ပွဲဖြစ်သလို ရှမ်းပြည်နယ်(အရှေ့ပိုင်း) ကျိုင်းတုံခရိုင်တွင် စီမံချက် လျာထားချက် ရာနှုန်းပြည့်ပြီးမြောက်အောင်မြင်သည့် မိုင်းပျဉ်းမြို့နယ်ကို ဂုဏ်ပြုသည့် အခမ်းအနားဖြစ်ပါကြောင်း၊ ရှမ်းပြည်နယ်(အရှေ့ပိုင်း)အနေဖြင့် ဆောင်ရွက်ပေးရန် လျာထားချက်(၅၄၀၆၃)ဦး ရှိရာမှာ ၂၀၂၁ ခုနှစ် ဒီဇင်ဘာလ(၃၁)ရက်နေ့ထိ (၃၂၉၆၄)ဦး ဆောင်ရွက်ပေးနိုင်ခဲ့ပြီး (၂၁၀၉၉)ဦး ဆောင်ရွက်ပေးရန် ကျန်ရှိနေ ပါသေးကြောင်း၊ ပြီးစီးမှုရာခိုင်နှုန်းအနေဖြင့် ၆၀.၉၇% တွေ့ရှိရပါကြောင်း၊ ရှမ်းပြည်နယ်(အရှေ့ပိုင်း)တွင် ပန်းခင်းစီမံချက်ဖြင့် ယနေ့ပေးအပ်သည့် ကတ်ပြားပေါင်း(၁၁၉၂)ကတ်နှင့် အိမ်ထောင်စု(၂၂)စုဖြစ်ပြီး ယခင်ကလည်း နှစ်ကြိမ်ပေးအပ်ခဲ့ပြီး ဖြစ်ပါကြောင်း၊ ကျိုင်းတုံခရိုင်အတွင်းရှိ မိုင်းပျဥ်းမြို့နယ်သည် ရပ်ကွက်(၇)ရပ်ကွက်၊ ကျေးရွာအုပ်စု(၂၄)အုပ်စု၊ ကျေးရွာပေါင်း (၃၈၅)ရွာဖြင့် ဖွဲ့စည်းထားပြီး လူဦးရေ(၆)သောင်းကျော် နေထိုင်လျက်ရှိပြီး မိုင်းပျဉ်းမြို့နယ်အနေဖြင့် စီမံချက်လျာထားဦးရေ (၂၂၂၂)ဦး ဆောင်ရွက်ပေးရမှာဖြစ်သော်လည်း သတ်မှတ်ကာလမတိုင်မီ (၈)လအတွင်း အိမ်ထောင်စုလူဦးရေစာရင်း(၅၆)စုနှင့် ကိုင်ဆောင်လက်မှတ်(၂၂၃၈)ထိ ရာနှုန်းပြည့်ကျော်လွန်အောင် ဆောင်ရွက်ပေးနိုင်ခဲ့ပါကြောင်း၊ မိုင်းပျဥ်းမြို့နယ်သည် စီမံချက် ကာလမတိုင်မီ ရှမ်းပြည်နယ်(အရှေ့ပိုင်း) ကျိုင်းတုံခရိုင်အတွင်း ပထမဆုံး “ပန်းခင်းစီမံချက်” လျာထားချက် ရာနှုန်းပြည့် ပြီးမြောက်အောင်မြင်သော မြို့နယ်ဖြစ်ပါကြောင်း၊ ကိုဗစ်-၁၉ ရောဂါ မပြန့်ပွားရေးအတွက် ထုတ်ပြန်ထားသော ကန့်သတ်ချက် များနှင့် အခြားသောအခက်အခဲကြားမှ (၈)လအတွင်း စီမံချက် လျာထားချက် ရာနှုန်းပြည့် ပြီးစီးအောင်မြင်ရေးအတွက် အားသွန် ခွန်စိုက် ဝိုင်းဝန်းကြိုးပမ်း အားထုတ်ခဲ့သည့် မိုင်းပျဥ်းမြို့နယ် ရုံးဝန်ထမ်းများအား မှတ်တမ်းတင် ဂုဏ်ပြုပါကြောင်း ပြောကြား သည်။
ဆက်လက်၍ အိမ်ထောင်စုလူဦးရေစာရင်းနှင့် နိုင်ငံသားစိစစ်ရေးကတ်ပြားများ ပေးအပ်ရာ ပြည်နယ်ဝန်ကြီးချုပ် ဒေါက်တာကျော်ထွန်းက နိုင်ငံသားစိစစ်ရေးကတ်ပြားများကို နန်းရှဲန်စိန်နှင့် မနာဒေါရှာအား ပေးအပ်ပေးပြီး ပန်းခင်းစီမံချက်ဖြင့် လျာထားချက် ပြီးမြောက်အောင်မြင်အောင် ဆောင်ရွက်နိုင်ခဲ့သည့် မိုင်းပျဥ်းမြို့နယ် ဦးစီးမှူး ဦးစီးအရာရှိ ဦးဝင်းဖေအား ပြည်နယ် ဝန်ကြီးချုပ်မှ ပေးအပ်၍လည်းကောင်း၊ တြိဂံဒေသတိုင်း စစ်ဌာနချုပ် တိုင်းမှူး ဗိုလ်မှူးချုပ် မျိုးမင်းထွန်းက နန်းစမ်ဟွမ်နှင့် မဘူးဂျေအား နိုင်ငံသားစိစစ်ရေးကတ်ပြားများ ပေးအပ်၍လည်းကောင်း၊ ပြည်နယ်လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီးလှဦးမှ မောင်ညီကိန်းနှင့် စိုင်းဝန်းအားနို င်ငံသားစိစစ်ရေးကတ်ပြားများ ပေးအပ်၍လည်းကောင်း၊ ကျိုင်းတုံမြို့နယ်၏ နိုင်ငံသားစိစစ်ရေးကတ်ပြားများနှင့် အိမ်ထောင်စုလူဦးရေစာရင်းအား ပြည်နယ်သယံဇာတဝန်ကြီး ဦးစိုင်းလိတ်မှ ပေးအပ်၍ လည်းကောင်း၊ မိုင်းခတ်မြို့နယ်၊ မိုင်းယန်းမြို့နယ်၊ မိုင်းပျဥ်းမြို့နယ်၊ မိုင်းလားမြို့နယ်တို့အား နိုင်ငံသားစိစစ်ရေးကတ်ပြားများကို ပြည်နယ်လူမှုရေးရာဝန်ကြီး၊ ပြည်နယ်လမ်းပန်းဆက်သွယ်ရေးဝန်ကြီး၊ အစိုးရအဖွဲ့ အတွင်းရေးမှူးနှင့် “ဝ”ကိုယ်ပိုင် အုပ်ချုပ်ခွင့် ရတိုင်း စီမံအုပ်ချုပ်ရေးအဖွဲ့ ဥက္ကဋ္ဌတို့မှ ပေးအပ်ရာ တာဝန်ရှိသူအသီးသီးက လက်ခံရယူကြပြီး ဒေသခံတိုင်းရင်းသားများ ကိုယ်စား ပလောင်တိုင်းရင်းသား ဦးစိုင်းအောင်ခမ်းမှ ကျေးဇူးတင်စကား ပြန်လည်ပြောကြားကြောင်း သိရသည်။
ထို့နောက် ပြည်နယ်ဝန်ကြီးချုပ်၊ တိုင်းမှူး၊ ပြည်နယ်ဝန်ကြီးများနှင့် တာဝန်ရှိသူတို့သည် ကျိုင်းတုံတက္ကသိုလ် ခေမရဌ် ခန်းမ၌ သစ်လွင်နည်းပြ၊ သရုပ်ပြဆရာ၊ ဆရာမများအား တွေ့ဆုံရာ ပြည်နယ်ဝန်ကြီးချုပ် ဒေါက်တာကျော်ထွန်းက ဆရာ၊ ဆရာမများ သစ်လွင်မောင်မယ်နှင့်အညီ လူသစ်စိတ်သစ်ဖြင့် တိုင်းပြည်တာဝန်များကို ကျရာကဏ္ဍတွင် တာဝန်ထမ်းဆောင် ပေးရန်နှင့် တိုင်းပြည်ဖွံ့ဖြိုးတိုးတက်ရေး၊ ပြည်နယ်ဖွံ့ဖြိုးတိုးတက်ရေးတို့ကို အားလုံးဝိုင်းဝန်း ပူးပေါင်းဆောင်ရွက်ပေးကြရန် ပြောကြားသည်။
ယင်းနောက် ရှမ်းပြည်နယ်အစိုးရအဖွဲ့မှ ကျိုင်းတုံတက္ကသိုလ် ဖွံ့ဖြိုးရေးလုပ်ငန်းများအတွက် ထောက်ပံ့ငွေကျပ် (၁၀)သိန်းနှင့် အားကစားပစ္စည်းများကို ပြည်နယ်ဝန်ကြီးချုပ် ဒေါက်တကျော်ထွန်းက ပေးအပ်ရာ ကျိုင်းတုံတက္ကသိုလ် ပါမောက္ခချုပ် ဒေါက်တာစမ်းစမ်းမာမှ လက်ခံရယူပြီး ASEAN Festival 2021 တက္ကသိုလ်များပွဲတော်တွင် ကျိုင်းတုံတက္ကသိုလ်မှ ပထမဆု(၂)ဆု၊ နှစ်သိမ့်ဆု(၁)ဆုရှိခဲ့သော ထူးချွန်ကျောင်းသား ကျောင်းသူများ(၂)ဦးအား ဆုချီးမြှင့်ငွေကျပ်(၅)သိန်းစီကို ပြည်နယ်ဝန်ကြီးချုပ်က ဆုချီးမြှင့်ပေးခဲ့ပြီး ရန်ကုန်တိုင်းအစိုးရအဖွဲ့ အတွင်းရေးမှူး ဦးစိုးစိုးဇော်မှ ASEAN Festival 2021 တက္ကသိုလ်များပွဲတော်တွင် ကျိုင်းတုံတက္ကသိုလ်မှ ပထမဆု(၂)ဆု၊ နှစ်သိမ့်ဆု(၁)ဆု ရရှိခဲ့ကြသော ထူးချွန်ကျောင်းသား၊ ကျောင်းသူ(၂)ဦးအား ဂုဏ်ပြုချီးမြှင့်ငွေကျပ်(၅)သိန်းစီကို ကျိုင်းတုံတက္ကသိုလ် ပါမောက္ခချုပ် ဒေါက်တာစမ်းစမ်းမာက ပေးအပ်ပေးပြီး ပါမောက္ခချုပ်မှ ကျိုင်းတုံတက္ကသိုလ်အတွက် လိုအပ်ချက်များ တင်ပြရှင်းလင်းရာ ပြည်နယ်ဝန်ကြီးချုပ် ဒေါက်တာကျော်ထွန်းက လိုအပ်ချက်များကို ဖြည့်ဆည်းဆောင်ရွက် ပြောကြားခဲ့ကြောင်း သိရှိရသည်။

ရှမ်းပြည်နယ်အစိုးရအဖွဲ့

002
တောင်ကြီး ဇန်နဝါရီ - ၃
ရှမ်းပြည်နယ်ကိုဗစ်-၁၉ ထိန်းချုပ်ရေးနှင့်အရေးပေါ်တုံ့ပြန်ရေးကော်မတီ (၁/၂၀၂၂) လုပ်ငန်းညှိနှိုင်းအစည်းအဝေးကို ဇန်နဝါရီ (၃)ရက်နေ့ မွန်းလွဲ(၂)နာရီက တောင်ကြီးမြို့ ရှမ်းပြည်နယ်အစိုးရရုံး အစည်းအဝေးခန်းမ၌ ကျင်းပသည်။
ရှမ်းပြည်နယ်(ကိုဗစ်-၁၉)ထိန်းချုပ်ရေးနှင့်အရေးပေါ်တုံ့ပြန်ရေးကော်မတီဥက္ကဋ္ဌ၊ ရှမ်းပြည်နယ်အစိုးရအဖွဲ့ ပြည်နယ် ဝန်ကြီးချုပ် ဒေါက်တာ ကျော်ထွန်း က ယနေ့အစည်းအဝေးခေါ်ယူရခြင်းက ကိုဗစ်-၁၉ရောဂါဖြစ်ပွားလျက်ရှိသည့်ကာလအတွင်း ရှမ်းပြည်နယ်အတွင်းရှိ မြို့နယ်များတွင် ရောဂါကူးစက်ပြန်ုပွားမှုမရှိစေရေး ကာကွယ်ထိန်းချုပ်ရေးနှင့်ကာကွယ်ဆေးထိုးနှံရန် အကျုံးဝင်သူအားလုံး ရာနှုန်းပြည့်ကာကွယ်ဆေးထိုးနှံပေးနိုင်ရေး ဖြစ်ပါကြောင်း၊ ရှမ်းပြည်နယ်အတွင်းရှိ မြို့နယ်များတွင် ကာကွယ်ဆေးထိုးနှံရန်အကျုံးဝင်သူလျာထားဦးရေပြည်သူ (၃၂၀၉၈၄၄)ဦး၊ ကျောင်းသား၊ ကျောင်းသူ(၁၄၆၀၂၆)ဦး၊ စုစုပေါင်း (၃၃၅၅၈၇၀)ဦးအား ကာကွယ်ဆေးထိုးနှံဆောင်ရွက်ပေးခဲ့ရာ၂၀၂၂ခုနှစ်၊ ဇန်နဝါရီလ(၂)ရက်နေ့အထိ တစ်ကြိမ်ထိုးနှံပြီးသူ (၂၀၁၀၅၅၇)ဦး၊ နှစ်ကြိမ်မြောက်ထိုးနှံပြီးသူ(၁၄၉၁၀၁၀)ဦး ထိုးနှံပြီးစီးခဲ့ပြီး တစ်ကြိမ်ထိုးနှံပြီးစီးမှုအပေါ်တွင် ရာခိုင်နှုန်းအားဖြင့် (၅၉.၉၁)ရာခိုင်နှုန်း လွှမ်းခြုံထိုးနှံနိုင်ခဲ့ပြီးဖြစ်ပါကြောင်း ပြောကြားသည်။
ဆက်လက်၍အရှေ့ပိုင်းတိုင်းစစ်ဌာနချုပ် တိုင်းမှူး ဗိုလ်မှူးချုပ် နီလင်းအောင် က ကိုဗစ်-၁၉ရောဂါစတုတ္ထလှိုင်းဝင် ရောက်လာပါက ကြိုတင်ပြင်ဆင်ခြင်းကို အချိန်မီကြိုတင်ပြင်ဆင်ရမည့်ကိစ္စရပ်များနှင့်ပတ်သက်၍ ရှင်းလင်းဆွေးနွေးပြီး ရှမ်းပြည်နယ်ကိုဗစ်-၁၉ထိန်းချုပ်ရေးနှင့်အရေးပေါ်တုံ့ပြန်ရေးကော်မတီ အတွင်းရေးမှူး ပြည်နယ်လုံခြုံရေးနှင့်နယ်စပ်ရေးရာ ဝန်ကြီး ဗိုလ်မှူးကြီး လှဦး မှကိုဗစ်-၁၉ရောဂါကာကွယ်ဆေးထိုးနှံမှုနှင့်ပတ်သက်၍ ရှင်းလင်းဆွေးနွေးကာ အစည်းအဝေး တက်ရောက်လာသူများမှ ဆွေးနွေးတင်ပြကြပြီး ဆွေးနွေးတင်ပြချက်များအပေါ် ပြည်နယ်ဝန်ကြီးချုပ် ဒေါက်တာ ကျော်ထွန်း က လိုအပ်သည်များကို ဖြည့်စွက်ပြောကြား၍ နိဂုံးချုပ်စကားပြောကြားခဲ့ကြောင်း သိရှိရသည်။

ရှမ်းပြည်နယ်အစိုးရအဖွဲ့

နောက်ထပ်သတင်းများဖတ်မည်