We have 403 guests and no members online

တောင်ကြီး ဧပြီ-၂

new 754


ဒုတိယအကြိမ် ရှမ်းပြည်နယ်လွှတ်တော် (၁၄)ကြိမ်မြောက် ပုံမှန်အစည်းအဝေး(ပထမနေ့)ကို ဧပြီ ၂ ရက် နံနက် ၁၀နာရီက ရှမ်းပြည်နယ်လွှတ်တော်အစည်းအဝေးခန်းမ၌ ကျင်းပကြောင်း သိရသည်။

ပထမဦးစွာ ပြည်နယ်လွှတ်တော်ဥက္ကဌ ဦးစိုင်းလုံးဆိုင်က အစည်းအဝေးတွင် တက်ရောက်ခွင့်ရှိသူ လွှတ်တော်ကိုယ်စားလှယ်(၁၄၀) ဦးရှိသည့်အနက် ခွင့်ပန်ကြားသူ (၁၀)ဦးရှိပြီး အစည်းအဝေးသို့ (၁၃၀)ဦး တက်ရောက်သဖြင့်(၉၂.၈၆) ရာခိုင်နှုန်းရှိသောကြောင့် အစည်းအဝေးအထမြောက်ကြောင်းနှင့် ပထမနေ့ အစည်းအဝေး စတင်ကျင်းပကြောင်း သိရသည်။

ဆက်လက်၍ အစည်းအဝေးမတက်ရောက်နိုင်သော ပြည်နယ်လွှတ်တော်ကိုယ်စားလှယ် (၁၀)ဦး တို့အတွက် ပြည်နယ်လွှတ်တော်ကိုယ်စားလှယ်များ စိစစ်ရေးကော်မတီဥက္ကဌ နမ့်စန်မြို့နယ် မဲဆန္ဒနယ် အမှတ်(၁) ပြည်နယ်လွှတ်တော်ကိုယ်စားလှယ် ဦးလင်းအောင်ဆွေက ခွင့်ပန်ကြားပြီး ပြည်နယ်လွှတ်တော် မှသဘောတူကြောင်းနှင့် အစည်းအဝေးအထမြောက်မှကိုလွှတ်တော်က အတည်ပြုကြောင်း ကြေညာသည်။

ထို့နောက် ရှမ်းပြည်နယ်လွှတ်တော် ဦးစိုင်းလုံးဆိုင်က နှုတ်ခွန်းဆက်စကားပြောကြားပြီး ပြည်နယ် လွှတ်တော်ကိုယ်စားလှယ် (၉) ဦးမှ ကြယ်ပွင့်ပြမေးခွန်း(၁၁)ခု မေးမြန်းခြင်းနှင့် အဆို(၁)ခု တင်သွင်း ကြောင်းသိရသည်။ အဆိုပါအစည်းအဝေးသို့ ပြည်နယ်လွှတ်တော်ဥက္ကဌ၊ ပြည်နယ်ဝန်ကြီးချုပ်၊ ပြည်နယ် တရားလွှတ်တော် တရားသူကြီးချုပ်၊ ပြည်နယ်လွှတ်တော် ဒုတိယဥက္ကဌ၊ ပြည်နယ်ဥပဒေချုပ်၊ ပြည်နယ် စာရင်းစစ်ချုပ်၊ ပြည်နယ်လွှတ်တော် ကိုယ်စားလှယ်များ၊ တပ်မတော်သားကိုယ်စားလှယ်များနှင့် လေ့လာသူ များ တက်ရောက်ကြကြောင်း သိရှိရသည်။

မောင်မောင်သန်း(တောင်ကြီး)

ခရိုင်(ပြန်/ဆက်)ဦးစီးဌာန

new 753

အာဆီယံခရီးသွားလုပ်ငန်းကော်မတီအစည်းအဝေး ASEAN Tourism Committee Meeting)များကို အာဆီယံအဖွဲ့ဝင်နိုင်ငံများတွင် နိုင်ငံအမည်အက္ခရာစဉ်အလိုက် တစ်နှစ်လျှင် ၂ ကြိမ် ကျင်းပပြုလုပ်လျက် ရှိပြီး မြန်မာနိုင်ငံတွင် ၂၀၁၉ ခုနှစ်အတွက် ပထမအကြိမ်အစည်းအဝေးကို အလှည့်ကျအိမ်ရှင်နိုင်ငံအဖြစ် ၂၀၁၉ ခုနှစ်၊ မတ်လ ၃၀ ရက်နေ့မှ ဧပြီလ ၅ ရက်နေ့အထိ အင်းလေးဒေသရှိ Novatel Inle Lake Myat Min Hotel တွင် ကျင်းပကြောင်း သိရသည်။

အာဆီယံခရီးသွားလုပ်ငန်းကော်မတီအစည်းအဝေး၏ ဖွင့်ပွဲကို ဧပြီ ၁ ရက်နေ့ မနက်ပိုင်းက ကျင်းပ ပြုလုပ်ခဲ့ရာ ရှမ်းပြည်နယ်အစိုးရအဖွဲ့ စီမံကိန်းနှင့် ဘဏ္ဍာရေးဝန်ကြီး ဦးစိုးညွှန့်လွင်က တက်ရောက်၍ အဖွင့်အမှာစကားပြောကြားရာ အစည်းအဝေးသို့ တက်ရောက်လာကြသည့် အာဆီယံကိုယ်စားလှယ် တော်ကြီးများကို လှိုက်လှဲစွာကြိုဆိုပါကြောင်းနှင့် အာဆီယံခရီးသွားလုပ်ငန်းကဏ္ဍ၏ အရေးပါသော အစည်းအဝေးတစ်ခုကို မြန်မာနိုင်ငံ၏ ထင်ရှားကျော်ကြားသော ခရီးစဉ်ဒေသတစ်ခုဖြစ်သည့် အင်းလေး ဒေသတွင် ကျင်းပပြုလုပ်ခြင်းအတွက် ဝမ်းမြောက်ဂုဏ်ယူပါကြောင်း၊ ၂၀၁၈ ခုနှစ်အတွင်း အင်းလေးဒေသ သို့ နိုင်ငံခြားသားကမ္ဘာ့လှည့်ခရီးသည်စုစုပေါင်း (၁၆၀၀၀၀)ဦးခန့် လာရောက်လည်ပတ်ခဲ့ပြီး ပြင်သစ်လူမျိုး အများဆုံးဖြစ်ပါကြောင်း၊ ရှမ်းပြည်နယ်အစိုးရသည် အင်းလေးဒေသ၏ ခရီးသွားလုပ်ငန်းရေရှည်ဖွံ့ဖြိုး တိုးတက်ရေးအတွက် ဟိုတယ်နှင့်ခရီးသွားလာရေးဝန်ကြီးဌာန၊ ဆက်စပ်ဝန်ကြးဌာနများ၊ ပုဂ္ဂလိကအဖွဲ့ အစည်းများ၊ ဖွံ့ဖြိုးမှုမိတ်ဖွဲ့အဖွဲ့အစည်းများနှင့် အနီးကပ်ဆောင်ရွက်လျက်ရှိပါကြောင်း၊ အင်းလေးဒေသ အား ယှဉ်ပြိုင်စွမ်းရည်မြင့်မားသည့် ခရီးစဉ်ဒေသအဖြစ် ပေါ်ထွန်းလာရေးအတွက် Destination Management Plan for Inle Lake Region (2014-2019)ကို ရေးဆွဲအကောင်ထည်ဖော်လျက်ရှိပါကြောင်း၊ အာဆီယံခရီးသွားလုပ်ငန်းတိုးတက်မှုများကို နှောင့်နှေးစေနိုင်သည့် နိုင်ငံများအကြား ဖွံ့ဖြိုးတိုးတက်မှု မညီမျှခြင်း၊ အခြေခံအဆောက်အဦ၊ ဝန်ဆောင်မှုအရည်အသွေး၊ လူ့စွမ်းအားအရင်းအမြစ်စသည့် ကွာဟချက်များကို နည်းနိုင်သမျှ နည်းအောင် ကြိုးပမ်းသွားရမည်ဖြစ်ကြောင်းနှင့် ယခုအစည်းအဝေးမှ သည် အာဆီယံဒေသ၏ ခရီးသွားလုပ်ငန်းဖွံ့ဖြိုးတိုးတက်မှုအတွက် ပိုမိုကောင်းမွန်သော ရလဒ်များကို ဖော်ထုတ်ဆွေးနွေးအဖြေရှာနိုင်မည်ဟု မျှော်လင့်ပါကြောင်း၊ ဧည့်သည်တော်ကြီးများ၏ ယခုခရီးစဉ်မှ တဆင့် အင်းလေးဒေသ၏ကောင်းသတင်းများကို မျှဝေပေးရန်မေတ္တာရပ်ခံပါကြောင်း ပြောကြားသွားသည်။

အဆိုပါအာဆီယံခရီးသွားလုပ်ငန်းကော်မတီ အစည်းအဝေးကာလအတွင်း ဗီယက်နမ်နိုင်ငံ၊ ဟာလောင်မြို့တွင် ကျင်းပပြုလုပ်ခဲ့သည့် ၂၂ ကြိမ်မြောက် အာဆီယံခရီးသွားလုပ်ငန်းဝန်ကြီးများအဆင့် အစည်းအဝေး၏ ဆွေးနွေးဆုံးဖြတ်ချက်များကို အကောင်အထည်ဖော်ရန်နှင့် အာဆီယံခရီးသွားလုပ်ငန်း မဟာဗျူဟာစီမံကိန်း ၂၀၁၆-၂၀၂၅ပါ လုပ်ငန်းလမ်းညွှန်ချက်များကို ဦးဆောင်နိုင်ငံများအလိုက် ရှေ့ဆက် ဆောင်ရွက်မည့်လုပ်ငန်းစဉ်များကို ဆွေးနွေးသွားမည်ဖြစ်ကြောင်းနှင့် အစည်းအဝေးသို့ အာဆီယံအဖွဲ့ဝင် နိုင်ငံများမှ ကိုယ်စားလှယ်များ၊ အာဆီယံခရီးသွားလုပ်ငန်း ကျွမ်းကျင်ပညာရှင်များ၊ အာဆီယံ အတွင်းရေးမှူးချုပ်ရုံးမှ တာဝန်ရှိသူ ကိုယ်စားလှယ် ၇၀ ဦးနှင့် မြန်မာနိုင်ငံဟိုတယ်နှင့်ခရီးသွားလာရေး ဝန်ကြီးဌာနမှ ကိုယ်စားလှယ်များ၊ အခြားဖိတ်ကြားထားသောဧည့်သည်တော်များ တက်ရောက်ကြကြောင်း သိရှိရသည်။

မောင်မောင်သန်း (တောင်ကြီး)

တောင်ကြီး မတ် ၃၁

new 758

new 759

မြန်မာနိုင်ငံ၏ ပထမဆုံးနှင့် အကြီးမားဆုံး ဆောက်လုပ်ရေးနှင့် အိမ်အသုံးဆောင်ပစ္စည်း အရောင်းစင်တာ ကြီးဖြစ်သော PRO 1 Global Home Center သတ္တမမြောက်ဆိုင်ခွဲဖြစ်သည့် အေးသာယာအရောင်းစင်တာ ဖွင့်ပွဲကို မတ် ၃၀ ရက် နံနက် ၉ နာရီက အေးသာယာမြို့၊ ပြည်ထောင်စုလမ်းမကြီးဘေး၌ ကျင်းပကြောင်း သိရသည်။

ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ် ဒေါက်တာလင်းထွဋ်က မြန်မာနိုင်ငံ၌ ဖွင့်လှစ်ထားသော PRO 1 Global Home Center ကြီးသည် အာဆီယံတွင် ဒုတိယအကြီးမားဆုံးစင်တာကြီးအဖြစ် အဆင့်ဝင်သည်ကို တွေ့ရ သည့်အတွက် ရှမ်းပြည်နယ်အနေဖြင့် ဂုဏ်ပြုဝမ်းမြောက်မိပါကြောင်း၊ PRO 1 သည် နိုင်ငံတကာအဆင့်မီစင်တာကြီး ကို ရှမ်းပြည်နယ်တွင် လာရောက်ဖွင့်လှစ်သည့်အတွက် ဒေသခံလူငယ်များသည် နိုင်ငံခြားသားများနှင့် ရင်ဘောင် တန်း စမတ်ကျကျလုပ်ကိုင်နေကြသည်ကို တွေ့ရှိရပါကြောင်း၊ နိုင်ငံခြားထိ သွားရောက်လုပ်ကိုင်စရာမလိုဘဲ နိုင်ငံတကာအဆင့်မီ အလုပ်ကိုင်အခွင့်အလမ်းများ ရှမ်းပြည်နယ်အတွင်း၌ ရှိနေသည်ကို ကြိုဆိုရမည့် အချက်ဖြစ်ပါ ကြောင်း၊ ရှမ်းပြည်နယ်တွင် PRO 1 Global Home Center (အေးသာယာစင်တာ)၏ Grand Opening ဖွင့်ပွဲမှသည် နိုင်ငံတကာအဆင့်မီ One Stop Home Center ကြီးများကို နိုင်ငံစီးပွားဖွံ့ဖြိုးရေးအတွက် လိုအပ်သော မြို့တိုင်းတွင် ပိုမိုဖွင့်လှစ်နိုင်ပါရန် ပြောကြားသွားသည်။

ဆက်လက်၍ ပြည်နယ်ဝန်ကြီးချုပ်၊ ပြည်နယ်ဝန်ကြီးများနှင့် တာဝန်ရှိသူတို့သည် ညောင်ရွှေမြို့နယ်၊ ဟဲယာ ရွာမ၌ ကျင်းပသော အင်းလေးဒေသလုံးဆိုင်ရာ ပရိယတ္တိသာသနာပါလကအသင်း (၄၈)ကြိမ်မြောက် စာပွဲတော် အောင်ဆုနှင်းသဘင်နှင့် ဂုဏ်ပြုပူဇော်ပွဲအခမ်းအနားသို့ တက်ရောက်ကာ စာဖြေသံဃာတော်များအား အောင်လက်မှတ်ဘွဲ့တံဆိပ်တော်များကို ဆက်ကပ်၍ ညောင်ရွှေမြို့နယ်၊ အင်းလေးဒေသ၊ မိုင်းသောက်ကျေးရွာရှိ မိုင်းသောက်ပထမစာသင်တိုက်ဆရာတော် အဘိဓဇမဟာရဌဂုရုဘွဲ့တံဆိပ်တော်ရဆရာတော်အား ဘွဲ့တံဆိပ်ကို ပြည်နယ်ဝန်ကြီးချုပ် ဒေါက်တာလင်းထွဋ်က ဆက်ကပ်လှူဒါန်းပြီး လှူဖွယ်ဝတ္ထုပစ္စည်းများကို ပြည်နယ်တရား လွှတ်တော် တရားသူကြီးချုပ် ဦးကြွယ်ကြွယ်က ဆက်ကပ်လှူဒါန်းကာ နဝကမ္မဝတ္ထုငွေများကို ပအိုဝ်းကိုယ်ပိုင် အုပ်ချုပ်ခွင့်ရဒေသဦးစီး ဥက္ကဌ ဦးခွန်စံလွင်မှ ဆက်ကပ်လှူဒါန်း၍ အဂ္ဂမဟာပဏ္ဍိတ၊ အဂ္ဂမဟာဂန္ထဝါစကပဏ္ဍိတ၊ အဘိဓဇမဟာရဌဂုရု နိုင်ငံတော်သံဃမဟာနာယကအဖွဲ့၊ ဒုတိယဥက္ကဌ မိုင်းသောက်ပထမစာသင်တိုက် ဦးစီးပဓာန နာယကဆရာတော်ဘုရားထံ ငါးပါးသီလ ခံယူဆောက်တည်ကြကြောင်း သိရသည်။

အဆိုပါ ၄၈ ကြိမ်မြောက် စာပွဲတော်တွင် ပ ဉ္စမအဆင့်တွင် စာရင်းရှိ ၂၂ ပါး၊ ဖြေဆို ၂၁ပါး၊ အောင်မြင် ၉ ပါး၊ စတုတ္ထအဆင့်တွင် စာရင်းရှိ ၃၅ ပါး၊ ဖြေဆို ၃၄ ပါး၊ အောင်မြင် ၂၄ ပါး၊ တတိယအဆင့်တွင် စာရင်းရှိ ၆၃ ပါး၊ ဖြေဆို ၆၂ ပါး၊ အောင်မြင် ၂၁ ပါး၊ ဒုတိယအဆင့်တွင် စာရင်းရှိ ၈၁ ပါး၊ ဖြေဆို ၈၀ ပါး၊ အောင်မြင် ၅၂ ပါး၊ ပထမအဆင့်တွင် စာရင်းရှိ ၁၂၅ ပါး၊ ဖြေဆို ၁၁၀ ပါး၊ အောင်မြင် ၆၆ ပါး၊ မူလတန်းအဆင့်တွင် စာရင်းရှိ ၁၉၄ ပါး၊ ဖြေဆို ၁၉၂ ပါး၊ အောင်မြင် ၁၃၇ ပါး၊ စုစုပေါင်း ၃၀၉ ပါးအောင်မြင်ပြီး ဖြေဆိုသည့် သံဃာပေါင်း ၅၂၂ပါးရှိကြောင်း သိရသည်။

မောင်မောင်သန်း(တောင်ကြီး)

09250132943

တောင်ကြီး ဧပြီ - ၁

new 757

စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန၊ ရှမ်းပြည်နယ်ကျေးလက်ဒေသဖွံ့ဖြိုးတိုးတက်ရေးဦးစီး ဌာနနှင့် UNICEF တို့ပူးပေါင်းကျင်းပသည့် WASH Bottleneck Analysis tool အလုပ်ရုံဆွေးနွေးပွဲကို ဧပြီ ၁ ရက် နံနက် ၉ နာရီက တောင်ကြီးမြို့၊ တောင်ကြီးဟိုတယ်၌ ကျင်းပသည်။

ရှမ်းပြည်နယ်အစိုးရအဖွဲ့၊ ပြည်နယ်ဝန်ကြီးချုပ် ဒေါက်တာလင်းထွဋ်က ကျေးလက်ဒေသရေရရှိရေး၊ ပတ်ဝန်းကျင်သန့်ရှင်းရေးနှင့် တစ်ကိုယ်ရေသန့်ရှင်းရေး (WASH) ကဏ္ဍဆိုင်ရာ လက်ရှိဆောင်ရွက်နေမှုအခြေအနေ များ၊ စိန်ခေါ်မှုများ၊ အခက်အခဲများ၊ ဆက်လက်ဆောင်ရွက်သွားမည့်အစီအစဉ်များနှင့်ပတ်သက်ပြီး အချက်အလက် များစာရင်း ကောက်ယူနိုင်ရန်အတွက် သက်ဆိုင်ရာဌာနများ၊ နှီးနွယ်ဆက်စပ်ဌာနများမှ ဝန်ထမ်းများကို WASH Bottleneck Analysis tool အကြောင်း သိရှိနိုင်ရန်အတွက် အလုပ်ရုံဆွေးနွေးပွဲကျင်းပရခြင်းဖြစ်ကြောင်း၊ ကျေးလက်ဒေသများ သောက်သုံးရေရရှိရေးအတွက် (Basic Water Services)အတွက်သာမက သန့်ရှင်းသော သောက်သုံးရေရရှိရေး (Safety Managed Drinking Water Services)၊ ကမ္ဘာ့ကုလသမဂ္ဂ၏ (SDG Goal-6) ပြည့်မီ စေရေးတို့ကို အကောင်အထည်ဖော်ဆောင်ရွက်မည့် ကျေးလက်ရေရရှိရေးဆိုင်ရာအချက်အလက်များ ကောက်ယူရာ တွင် WASH Bottleneck Analysis tool များစွာ အထောက်အကူဖြစ်စေမှာဖြစ်ပါကြောင်း၊ အလုပ်ရုံဆွေးနွေးပွဲသို့ တက်ရောက်လာကြသည့် ကိုယ်စားလှယ်များ ၃ ရက်တာကျင်းပမည့် WASH Bottleneck Analysis အကြောင်း ကောင်းမွန်စွာ သိရှိအသုံးချနိုင်ရေး အလေးပေးဆွေးနွေးတိုင်ပင်သွားကြရန် လိုအပ်ပြီး မိမိတို့၏ လုပ်ငန်းခွင်တွင် လက်တလောကြုံတွေ့နေရသော အခက်အခဲများ၊ စိန်ခေါ်မှုများကို ထည့်သွင်းဆွေးနွေးသွားကြရန်နှင့် ဆွေးနွေးပွဲမှ ရရှိလာသော အသိပညာများဖြင့် မိမိတို့တာဝန်ထမ်းဆောင်ရန်ဌာနများ၌ အကျိုးရှိစွာ ပြန်လည်အသုံးချသွားကြရန် ကျေးလက်ဒေသရေရရှိရေး၊ ပတ်ဝန်းကျင်နှင့် တစ်ကိုယ်ရေသန့်ရှင်းရေးဆိုင်ရာလုပ်ငန်းများတွင် အားတက်တရော ပါဝင်ဆောင်ရွက်သွားကြရန် ပြောကြားသွားသည်။

ဆက်လက်၍ ရှမ်းပြည်နယ်အစိုးရအဖွဲ့ ပြည်နယ်စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီး ဦးစိုင်းလုံကျော်နှင့် UNICEF တောင်ကြီးရုံးမှ တာဝန်ရှိသူတို့က အမှာစကားပြောကြားပြီး အဆိုပါအခမ်းအနားသို့ ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ်၊ ပြည်နယ်စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီး၊ လွှတ်တော်ကိုယ်စားလှယ်၊ ပြည်နယ်/ခရိုင်/ မြို့နယ်အဆင့်ဌာနဆိုင်ရာ တာဝန်ရှိသူများ၊ UNICEF မှ တာဝန်ရှိပုဂ္ဂိုလ် များနှင့် NGO အဖွဲ့များ တက်ရောက်ကြကြောင်း သိရှိရသည်။

မောင်မောင်သန်း (တောင်ကြီး)

09250132943

တောင်ကြီး      မတ်-၃၀

new 760

ရှမ်းပြည်နယ်(တောင်ပိုင်း) တောင်ကြီးမြို့ ပထမအကြိမ်အထူးဓမ္မသဘင်အောင်မြင်ခြင်း အထိမ်းအမှတ်ဂုဏ်ပြုပွဲကို မတ်(၃၀)ရက် ညနေ(၃)နာရီက မြို့တော်ခန်းမ၌ကျင်းပသည်။

ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ် ဒေါက်တာလင်းထွဋ်က ရှမ်းပြည်နယ် အတွင်းနေထိုင်ကြသော ပြည်သူများ၏ လူမှုစီးပွားဘဝဖွံ့ဖြိုးတိုးတက်ရေး ပြည်နယ်အေးချမ်း သာယာရေးနှင့် တရားဥပဒေစိုးမိုးရေး၊ ပြည်နယ်ဘက်စုံကဏ္ဍစုံဖွံ့ဖြိုးတိုးတက်စေရေးတို့ကို ရည်မှန်းချက်ထား၍ လုပ်ငန်းများ အကောင်အထည်ဖော်ဆောင်ရွက်လျက်ရှိကြောင်း ရှမ်းပြည်နယ်အတွင်း မှီတင်းနေထိုင်လျက်ရှိသော တိုင်းရင်းသားပြည်သူအပေါင်း ယုံကြည် ကိုးကွယ်လျက်ရှိသောဗုဒ္ဓဘာသာသာသနာနှင့်ပတ်သက်၍ ရှမ်းပြည်နယ်အစိုးရအဖွဲ့အနေဖြင့် ဖြည့်ဆည်းကူညီဆောင်ရွက်ပေးလျက်ရှိကြောင်း၊ စေတီပုထိုး ဘုရား ကျောင်းကန်စသည့် သာသနိကပစ္စည်းများ တည်ဆောက်ပြုပြင်ရေးကိစ္စများ ရာသီအလိုက်ဘာသာရေးပွဲတော်များ ကျင်းပပြုလုပ်ရေးကိစ္စများတွင်လည်း ဒေသခံစေတနာရှင်လုပ်သားပြည်သူများနှင့်အတူ ဦးဆောင်ပူးပေါင်းကူညီဆောင်ရွက်ပေးလျက်ရှိကြောင်း၊ ၂၀၁၉ခုနှစ်မတ်လ(၂၁)ရက်နေ့မှ (၂၅)ရက်နေ့ထိ (၅)ညတိုင်စည်ကားသိုက်မြိုက်စွာကျင်းပပြုလုပ်ခဲ့သည့် ပထမအကြိမ် တောင်ကြီးအထူးဓမ္မသဘင်အခမ်းအနားတွင် အထူးဓမ္မသဘင်ကျင်းပရေးဦးစီးကော်မတီဝင် များ စိတ်အားမငယ်ရအောင်လိုအပ်သည်များကိုလည်း ကူညီပံ့ပိုးခဲ့ပါကြောင်း ကျင်းပပြုလုပ် ပြီးခဲ့သည့် တောင်ကြီးအထူးဓမ္မသဘင်ပွဲကြီးတွင် တောင်ကြီးအထူးဓမ္မသဘင်ပွဲဖြစ်မြောက်ရေး ကော်မတီဝင်များအနေဖြင့် လိုလေသေးမရှိအောင် ကာယအား၊ ဉာဏအားငွေအားတို့ဖြင့် ပြည့်စုံစွာလှုပ်ရှားဆောင်ရွက်ပေးခဲ့ကြ၍လည်း ရှမ်းပြည်နယ်အစိုးရအဖွဲ့အနေဖြင့် အနည်းငယ် သာပံ့ပိုးကူညီဆောင်ရွက်ပေးခဲ့ရပါကြောင်း၊ တောင်ကြီးမြို့နေတိုင်းရင်းသားလုပ်သားပြည်သူ အပေါင်းတို့သည် တောင်ကြီးအထူးဓမ္မသဘင်ပွဲကြီးကို (၅)ညတိုင်စည်ကားသိုက်မြိုက်စွာ ပြုလုပ်နိုင်ခဲ့သည့်အတွက် ရှမ်းပြည်နယ်နှင့်မြန်မာပြည်တစ်ဝှမ်းလုံးသာမက တစ်ကမ်ဘာလုံးတိုင် အောင် မီးမောင်းထိုးပြဂုဏ်ယူနိုင်ပြီး ဖြစ်ကြောင်း၊ ယနေ့တက်ရောက်လာကြသည့် လူမှုရေး ပရဟိတအဖွဲ့အစည်းအသီးသီးမှပုဂ္ဂိုလ်များ၏ စိတ်ရောကိုယ်ပါတက်ကြွစွာဆောင်ရွက်ပေးခဲ့ ကြသည့်အတွက် ဂုဏ်ပြုထိုက်သူများအားလုံးကို ရှမ်းပြည်နယ်အစိုးရအဖွဲ့ကိုယ်စား ဂုဏ်ပြု မှတ်တမ်းတင်ပါကြောင်း ပြောကြားသွားသည်။

ဆက်လက်၍ဦးစီးကော်မတီဥက္ကဋ္ဌဦးခင်အောင်က အထူးဓမ္မသဘင်ကျင်းပခဲ့မှုနှင့် ပတ်သက်၍ ရှင်းလင်းပြောကြားပြီး ဂုဏ်ပြုမှတ်တမ်းလွှာများ ပေးအပ်ရာ ရှမ်းပြည်နယ်အစိုးရ အဖွဲ့ ပြည်နယ်ဝန်ကြီးချုပ် ဒေါက်တာလင်းထွဋ်၊ ပြည်နယ်တရားလွှတ်တော်တရားသူကြီးချုပ်၊ ပြည်နယ်ဝန်ကြီးများ၊ ပြည်နယ်စာရင်းစစ်ချုပ်တို့က အလှူရှင်များနှင့် ကော်မတီအသီးသီး တို့အား ဂုဏ်ပြုမှတ်တမ်းလွှာများပေးအပ်ခဲ့ကြသည်။ ထို့နောက်ဦးစီးကော်မတီဒုတိယဥက္ကဋ္ဌ ဦးသန်းကျော်မှကျေးဇူးတင်စကားပြောကြားကြောင်းသိရှိရသည်။

မောင်မောင်သန်း(တောင်ကြီး)

09250132943

နောက်ထပ်သတင်းများဖတ်မည်