We have 72 guests and no members online

တောင်ကြီး ဇူလိုင် - ၃၁

new 557

ရှမ်းပြည်နယ်(တောင်ပိုင်း)၊ တောင်ကြီးမြို့နယ်၊အေးသာယာမြို့၊ အခြေခံပညာအထက်တန်းကျောင်း (ခွဲ)မှ အခြေခံပညာအထက်တန်းကျောင်းအဖြစ် အဆင့်တိုးမြှင့်ခြင်းကို ဇူလိုင် ၃၁ ရက် နံနက် ၉ နာရီက အ.ထ.က (စက်မှုဇုန်) အေးသာယာမြို့၌ ကျင်းပသည်။

ဆက်လက်၍ ဖွင့်ပွဲကို ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ် ဒေါက်တာလင်းထွဋ်၊ ရှမ်းပြည်နယ်ပညာရေးညွှန်ကြားရေးမှူး ဦးဝင်းမောင်၊ စက်မှုဇုန်စီမံခန့်ခွဲရေးဥက္ကဌ ဦးဝင်းသော်တို့က ဖဲကြိုးဖြတ်ဖွင့်လှစ်ပေးပြီး ကျောင်းဆိုင်းဘုတ်အား ပြည်နယ်လူမှုရေးဝန်ကြီး ဒေါက်တာ မျိုးထွန်းက စက်ခလုတ်နှိပ်ဖွင့်လှစ်ပေးကာ ဆိုင်းဘုတ်အား ပြည်နယ်ဝန်ကြီးချုပ်၊ ပြည်နယ်ဝန်ကြီးများနှင့် တာဝန်ရှိသူ တို့က အမွေးနံသာများ ပတ်ဖျန်းပေးကြသည်။

အစီအစဉ်အရ အခမ်းအနား ဒုတိယအပိုင်းတွင် ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ် ဒေါက်တာလင်းထွဋ်က နိုင်ငံတော်နှင့် ပညာရေးကဏ္ဍကို အထူးအလေးပေးပြီး အမျိုးသားပညာရည် မြင့်မားရေးလုပ်ငန်းများကို အစီအစဉ်ချမှတ်၍ ကျောင်းနေအရွယ်ကလေးတိုင်း ကျောင်းနေနိုင်ရေး၊ နိုင်ငံသားတိုင်းအခြေခံပညာကို မူလတန်းအဆင့်မှ အလယ်တန်းအဆင့်၊ အထက်တန်းအဆင့်ပညာရပ်များ ဖြင့် အဆင့်ဆင့်သင်ကြားခွင့်ရရှိနိုင်ရေးကို အထူးအလေးထား ဆောင်ရွက်လျက်ရှိပါကြောင်း၊ ကျောင်းနေ အရွယ်ကလေးတိုင်း ပညာသင်ကြားနိုင်ရေးအတွက် နိုင်ငံတော်က မူလတန်းအဆင့် ကျောင်းသား/ ကျောင်းသူများအား ပုံနှိပ်စာအုပ်များ၊ ဗလာစာအုပ်များ၊ အလယ်တန်းနှင့် အထက်တန်းကျောင်းသား/ ကျောင်းသူများအား ပုံနှိပ်စာအုပ်များကို အခမဲ့ဝေငှပေးခဲ့ပါကြောင်း၊ ပြည်ထောင်စုသမ္မတမြန်မာနိုင်ငံတော် ၏ ပညာရေးအဆင့်အတန်းတိုးတက်မြင့်မားလာစေရေးအတွက် ဆောင်ရွက်လျက်ရှိရာ ၂၀၁၉-၂၀၂၀ ပညာ သင်နှစ်တွင် တောင်ကြီးမြို့နယ်အတွင်း အ.ထ.က (ခွဲ)မှ အ.ထ.က အဆင့်သို့ (၁)ကျောင်း၊ အ.လ.က မှ အ.ထ.က (ခွဲ)အဆင့်သို့ (၄)ကျောင်း၊ အ.လ.က(ခွဲ)မှ အ.လ.က အဆင့်သို့ (၇)ကျောင်း၊ မူလတန်းလွန် မှ အ.လ.က (ခွဲ)အဆင့်သို့ (၁၂)ကျောင်း၊ အ.မ.က မှ မူလတန်းလွန်အဆင့်သို့ (၇)ကျောင်း၊ အ.မ.က (ခွဲ)မှ အ.မ.က အဆင့်သို့ (၁)ကျောင်း၊ စုစုပေါင်း (၃၂)ကျောင်းကို အသီးသီးအဆင့်တိုးမြှင့်ပေးခဲ့ပါကြောင်း၊ ပညာရေးနှင့်ပတ်သက်၍ မိမိတို့နိုင်ငံ၏ လူသားအရင်းအမြစ်များ ဖွံ့ဖြိုးတိုးတက်ရန်အတွက်အဓိက အခရာကျသော ဆရာ၊ ဆရာမများအနေဖြင့် ပညာရေးဖွံ့ဖြိုးတိုးတက်မှုလုပ်ငန်းများကို ထိရောက်စွာ လက်တွေ့အကောင်အထည်ဖော်ဆောင်ရွက်သွားကြရန်နှင့် မိမိတို့၏ ကျောင်းဂုဏ်သတင်းများ တိုးတက် လာအောင် ဆရာ/ ဆရာမများ၊ ကျောင်းသား/ကျောင်းသူများ၊ မိဘဆရာအသင်းများနှင့် ရပ်မိရပ်ဖများ ပူးပေါင်းပါဝင်ဆောင်ရွက်သွားကြရန် ပြောကြားသွားသည်။

ထို့နောက် ပြည်နယ်ပညာရေးညွှန်ကြားရေးမှူး ဦးဝင်းမောင်မှ အမှာစကားပြောကြားပြီး စက်မှုဇုန် စီမံခန့်ခွဲရေးကော်မတီဥက္ကဌ ဦးဝင်းသော်က ကျေးဇူးတင်စကားပြန်လည်ပြောကြားကာ ကျောင်းအုပ် ဆရာမကြီး ဒေါ်ခင်မြင့်က ကျောင်းသမိုင်းနှင့်ပတ်သက်၍ ရှင်းလင်းတင်ပြပြီး အလှူရှင်များအား ပြည်နယ် ဝန်ကြီးချုပ် ဒေါက်တာလင်းထွဋ်က ဂုဏ်ပြုမှတ်တမ်းလွှာများ ပေးအပ်ကာ အ.ထ.က (စက်မှုဇုန်) ကျောင်းအုပ်ဆရာမကြီး ဒေါ်ခင်မြင့်က ဖွင့်ပွဲအထိမ်းအမှတ်အလံနှင့် လက်ဆောင်ပစ္စည်းများ ပေးအပ်ပြီး ပြည်နယ်ဝန်ကြီးချုပ်၊ ပြည်နယ်ဝန်ကြီးများနှင့် တာဝန်ရှိသူတို့က ပြခန်းများအား လှည့်လည်ကြည့်ရှု အားပေးကြကြောင်း သိရှိရသည်။

မောင်မောင်သန်း (တောင်ကြီး)

၀၉-၂၅၀၁၃၂၉၄၃