We have 41 guests and no members online

တောင်ကြီး မတ် - ၂၃

18
သာသနာတော်ဆိုင်ရာ ဘွဲ့တံဆိပ်တော် ဆက်ကပ်လှူဒါန်းပွဲ အခမ်းအနားကျင်းပနိုင်ရေးအတွက် အကြိုလုပ်ငန်း ညှိနှိုင်း အစည်းအဝေးကို မတ်(၂၃)ရက် နံနက်(၁၀)နာရီက တောင်ကြီးမြို့ ရှမ်းပြည်နယ်စီမံအုပ်ချုပ်ရေးကောင်စီရုံး အစည်းအဝေးခန်းမ ၌ကျင်းပသည်။
ရှမ်းပြည်နယ်စီမံအုပ်ချုပ်ရေးကောင်စီဥက္ကဋ္ဌ ဒေါက်တာကျော်ထွန်းက ယနေ့ကျင်းပသည့် အခမ်းအနားသည် မတ်လ (၂၇)ရက် တပေါင်းလပြည့်နေ့တွင် ကျင်းပမည့် နိုင်ငံတော်မှ ဆက်ကပ်သော အဘိဓဇ္ဇ မဟာဂုရုဘွဲ့တံဆိပ်တော်များကို နေပြည်တော်တွင် ဆက်ကပ်မည်ဖြစ်ပြီး လူပုဂ္ဂိုလ်နှင့် အဆင့်မြင့်များအတွက် ဘွဲ့တံဆိပ်တော်များကို နေပြည်တော်တွင် သွားရောက်ယူကြမည်ဖြစ်ကြောင်း၊ ကျန်သည့်သံဃာတော်(၄၂)ပါးကို မြို့တော်ခန်းမတွင် ကျင်းပနိုင်ရန် လျာထားပြီး ဖြစ်ကြောင်း၊ မတ်လ(၂၅)ရက်နေ့တွင် ရောက်ရှိလာမည့် ဆရာတော်ကြီးများနှင့် ကပ္ပိယများအတွက် တည်းခိုမည့်နေရာကိစ္စ၊ ဆွမ်းဆက်ကပ်ရေး၊ ကျန်းမာရေးပြုစု စောင့်ရှောက်မှု၊ သယ်ယူပို့ဆောင်ရေးကိစ္စ စသည်တို့ကို လုပ်ဆောင်နိုင်ရန် အကြိုညှိနှိုင်း အစည်းအဝေးတွင် သက်ဆိုင်ရာဌာနများမှ အကြံပြုဆွေးနွေးပေးကြရန် ပြောကြားသွားသည်။
ဆက်လက်၍ ရှမ်းပြည်နယ်စီမံအုပ်ချုပ်ရေးကောင်စီ အဖွဲ့ဝင်(၃) ဦးစိုင်းလိတ်၊ အဖွဲ့ဝင်(၂) ဦးခွန်သိန်းမောင်၊ အဖွဲ့ဝင်(၁) ဗိုလ်မှူးကြီးလှဦး၊ ရှမ်းပြည်နယ်စီမံအုပ်ချုပ်ရေးကောင်စီ အတွင်းရေးမှူးဦးနေလင်းနှင့် တက်ရောက်လာကြသည့် သက်ဆိုင်ရာ ဌာနဆိုင်ရာများမှ တင်ပြဆွေးနွေးကြပြီး ရှမ်းပြည်နယ်စီမံအုပ်ချုပ်ရေးကောင်စီဥက္ကဋ္ဌ ဒေါက်တာကျော်ထွန်းက နိဂုံးချုပ် အမှာစကားပြောကြားခဲ့ကြောင်း သိရှိရသည်။
မောင်မောင်သန်း(တောင်ကြီး)
၀၉-၂၅၀၁၃၂၉၄၃

တောင်ကြီး မတ် - ၂၂

17
တာချီလိတ်မြို့နယ်အတွင်းရှိ လယ်ယာမြေများအား လယ်ယာမြေအခြားနည်းအသုံးပြုခွင့်လျှောက်ထားသည့်ကိစ္စနှင့် ပတ်သက်၍ ဆောင်ရွက်မည့်စီမံကိန်းလုပ်ငန်းများကို ရှမ်းပြည်နယ်စီမံအုပ်ချုပ်ရေးကောင်စီသို့ လုပ်ငန်းရှင်များမှ လာရောက် ရှင်းလင်းမှုကို မတ်(၂၂)ရက် နံနက်(၁၀)နာရီက တောင်ကြီးမြို့ ရှမ်းပြည်နယ်စီမံအုပ်ချုပ်ရေးကောင်စီရုံး အစည်းအဝေးခန်းမ၌ ကျင်းပသည်။
ရှမ်းပြည်နယ်စီမံအုပ်ချုပ်ရေးကောင်စီဥက္ကဋ္ဌ ဒေါက်တာကျော်ထွန်းက ဖေဖော်ဝါရီလ(၁)ရက်မှစ၍ အစိုးရအသစ် အပြောင်းအလဲအုပ်ချုပ်မှုကာလတွင် ယခင်အစိုးရလက်ထက်က မပြီးပြတ်သေးသည့် စီမံကိန်းလုပ်ငန်းများ ရှိပါကြောင်း၊ စီမံကိန်းလုပ်ငန်းတွင် အများဆုံးသက်ဆိုင်မှုမှာ မြေယာကိစ္စများဖြစ်သည့် ငှားရမ်းမှု၊ အခြားနည်းသုံးစွဲမှုများပါဝင်သောကြောင့် ယင်းလုပ်ငန်းများအားစုစည်းကာ အချို့လုပ်ငန်းများကိုရှင်းလင်းပြီး Cabinet ကိုတင်ပြ၍ လိုအပ်သည်များကို ရှမ်းပြည်နယ် ကောင်စီအဖွဲ့ဝင်များကဆွေးနွေးကာ အမှုတွဲအားလုံးပြီးပြည့်စုံပါက သက်ဆိုင်ရာအထက်ကို ပြန်လည်ဆက်တင်ပြီး ပြန်ကျလာ ပါက ဆောင်ရွက်ရမည့် လုပ်ငန်းဖြစ်သည့်အတွက် တကယ်လုပ်မည့်လုပ်ငန်းရှင်ကြီးများကိုခေါ်ယူ၍ ရှင်းလင်းတင်ပြခြင်း ဆောင်ရွက်သွားမည်ဖြစ်ကြောင်း၊ ယနေ့အခမ်းအနားတွင် လုပ်ငန်းရှင်များမှ လာရောက်ရှင်းလင်းကြသည့်အတွက် ကျေးဇူး တင်ရှိပါကြောင်း ပြောကြားသွားသည်။
ဆက်လက်၍ စီမံကိန်းလုပ်ငန်းများအား ဆောင်ရွက်မည့်လုပ်ငန်းရှင်(၂)ဦးဖြစ်သော ဦးလော်ဒါး၊ ဒေါ်ဝါဝါနှင့် ဒေါ်မီဒေး ကိုယ်စား တာဝန်ရှိသူများက ရှင်းလင်းတင်ပြပြီး တက်ရောက်လာကြသည့် ရှမ်းပြည်နယ်စီမံအုပ်ချုပ်ရေးကောင်စီအဖွဲ့ဝင်နှင့် သက်ဆိုင်ရာဌာနများမှ ဆွေးနွေးကြကာ ရှမ်းပြည်နယ်စီမံအုပ်ချုပ်ရေးကောင်စီဥက္ကဋ္ဌ ဒေါက်တာကျော်ထွန်းက နိဂုံးချုပ် အမှာစကားပြောကြားကြောင်း သိရှိရသည်။
မောင်မောင်သန်း(တောင်ကြီး)
၀၉-၂၅၀၁၃၂၉၄၃

တောင်ကြီး မတ် - ၁၇

15
ရှမ်းပြည်နယ်စီမံအုပ်ချုပ်ရေးကောင်စီရုံးတွင် တာဝန်ထမ်းဆောင်နေသော ဝန်ထမ်းများအား စားနပ် ရိက္ခာထောက်ပံ့ပေးအပ်ခြင်းကို မတ်(၁၇)ရက် မွန်းလွဲ(၂)နာရီခွဲက တောင်ကြီးမြို့ ရှမ်းပြည်နယ်အထွေထွေ အုပ်ချုပ်‌ရေးဦးစီးဌာန အစည်းအဝေး ခန်းမ၌ ကျင်းပသည်။
ရှမ်းပြည်နယ်စီမံအုပ်ချုပ်ရေးကောင်စီ ဥက္ကဋ္ဌ ဒေါက်တာကျော်ထွန်းက ယနေ့ကျင်းပသည့် အခမ်းအနားတွင် ဝန်ထမ်း အားလုံးပေါင်း (၃၀၀)ကျော်ကို ထောက်ပံ့ပစ္စည်းပေးအပ်သွားမည်ဖြစ်ကြောင်း၊ ပစ္စည်းနည်းသော်လည်း တစ်စုံတစ်ခု အတိုင်းအတာဖြင့် အထောက်အကူပြုမည်ဖြစ်ကြောင်း၊ ယနေ့ တက်ရောက်လာကြသည့် အထွေထွေအုပ်ချုပ်ရေးဦးစီးဌာနမှ ဝန်ထမ်းများလည်း ပုံမှန်ရုံးတက်ပေးကြရန်နှင့် အခမ်းအနားတွင် ရှမ်းပြည်နယ်စီမံအုပ်ချုပ်ရေးကောင်စီရုံး အဖွဲ့ဝင်များနှင့် တက်ရောက်ပေးကြသည့် ဝန်ထမ်း များကို ကျေးဇူးတင်ရှိပါကြောင်း ပြောကြားသွားသည်။
ဆက်လက်၍ ရှမ်းပြည်နယ်စီမံအုပ်ချုပ်ရေးကောင်စီ ဥက္ကဋ္ဌ ဒေါက်တာကျော်ထွန်း၊ အဖွဲ့ဝင်များ ဖြစ်သော ဗိုလ်မှူးကြီး လှဦး၊ ဦးခွန်သိန်းမောင်၊ ဦးစိုင်းလိတ်၊ ပြည်နယ်လူဝင်မှုကြီးကြပ်ရေးနှင့် ပြည်သူ့အင်အား ဆိုင်ရာဦးစီးမှူးရုံး ပြည်နယ်ဦးစီးမှူး ဦးအောင်မြင့်၊ ရှမ်းပြည်နယ်စီမံအုပ်ချုပ်ရေးကောင်စီ အတွင်းရေးမှူး ဦးနေလင်းတို့မှ ဆန်၊ ဆီ၊ ကြက်ဥများ ထောက်ပံ့ပေးအပ် ခဲ့ကြသည်။
အဆိုပါ ထောက်ပံ့ပေးအပ်မှုတွင် ရှမ်းပြည်နယ်စီမံအုပ်ချုပ်‌ရေးကောင်စီရုံးတွင် တာဝန်ထမ်းဆောင် နေသော ဝန်ထမ်း (၃၃၁)ဦးအား ဆန်(၁၆၆)အိတ်နှင့် ဆီ၊ ကြက်ဥ၊ ကြက်သွန်ဖြူ၊ ကြက်သွန်နီ၊ အာလူး၊ ခရမ်းချဉ်သီး၊ သကြားများ ထောက်ပံ့ ပေးအပ်ခဲ့ကြောင်းသိရှိရသည်။

မောင်မောင်သန်း(တောင်ကြီး) ၀၉-၂၅၀၁၃၂၉၄၃

တောင်ကြီး မတ် - ၂၀

16

ရှမ်းပြည်နယ်စီမံအုပ်ချုပ်ရေးကောင်စီဥက္ကဋ္ဌ ဒေါက်တာ​ကျော်ထွန်း၊ အဖွဲ့ဝင်များ၊ သက်ဆိုင်ရာ ဌာနဆိုင်ရာများနှင့်အတူ မတ်(၁၉)ရက် နံနက်(၉)နာရီက တောင်ကြီးခရိုင် ရပ်စောက်မြို့ နယ် ပိန္နဲပင်ကျေးရွာတွင် ရှမ်းပြည်နယ်ကျေးလက်ဒေသ ဖွံ့ဖြိုးတိုးတက်ရေးဦးစီးဌာနမှ စက်ရေတွင်းတူးဖော်ပြီးစီးမှုအား သွားရောက်ကြည့်ရှုစစ်ဆေးကြကြောင်း သိရသည်။

ပိန္နဲပင်ကျေးရွာ စက်ရေတွင်း တူးဖော်ပြီးစီးမှုနှင့်ပတ်သက်၍ ရှမ်းပြည်နယ် ကျေးလက်ဒေသဖွံ့ဖြိုးတိုးတက်ရေးဦးစီးဌာန ညွှန်ကြားရေးမှူး ဦးမောင်မောင်ဝင်းမှ ရှင်းလင်းတင်ပြပြီး ရှမ်းပြည်နယ်စီမံအုပ်ချုပ်ရေးကောင်စီဥက္ကဋ္ဌ ဒေါက်တာကျော်ထွန်းနှင့် အဖွဲ့ဝင်များသည် ရေထွက်နေမှုအား ကြည့်ရှုကြကာ သဗ္ဗမင်္ဂလာကျောင်းဆောင်၌ ကျောင်းထိုင်ဆရာတော်အား ဖူးမျှော်၍ လှူဖွယ်ပစ္စည်းများ ဆက်ကပ်လှူဒါန်းကြပြီး ကျောင်းသား၊ ကျောင်းသူ(၇၀)ဦးတို့အား ဗလာစာအုပ်(၁၀၀)ဒါဇင်၊ ဘောပင်(၁၀၀) ဒါဇင်၊ ခဲတံ(၁၀၀)ဒါဇင်နှင့် စားစရာမုန့်၊ အချိုရည်ဗူးများ ထောက်ပံ့ပေးအပ်ခဲ့ကြောင်း သိရသည်။

အဆိုပါ ပိန္နဲပင်ကျေးရွာအတွက် နွေရာသီရေလုံလောက်စွာ သုံးစွဲနိုင်ရေးအတွက် ဂါလံ(၁၀၀၀၀)ဆံ့ ရေစုကန်နှင့် အိမ်ခြေ(၁၄၂)အိမ်၊ လူဦးရေ(၇၄၅) ရေပေးဝေနိုင်ပြီး ကုန်ကျငွေ(၂၀.၅၈၀)သန်း ကုန်ကျကြောင်းနှင့် မိုးစက်ကမ္ဘာ ဆောက်လုပ်ရေးကုမ္ပဏီမှ တာဝန်ယူဆောင်ရွက်ပေးကြောင်း သိရသည်။

ဆက်လက်၍ ရှမ်းပြည်နယ်စီမံအုပ်ချုပ်ရေးကောင်စီဥက္ကဋ္ဌ၊ အဖွဲ့ဝင်များနှင့် တာဝန်ရှိသူတို့သည် ရပ်စောက်မြို့နယ် နားခဲလေးကျေးရွာ ကုန်ထုတ်လမ်းနှင့် ကွန်ကရစ်တံတား တည်ဆောက်ခြင်းလုပ်ငန်းအား သွားရောက်ကြည့်ရှုစစ်ဆေးရာ ရှမ်းပြည်နယ် ကျေးလက်ဒေသဖွံ့ဖြိုးတိုးတက်ရေးဦးစီးဌာန ဦးညွန့်ဝင်း လက်ထောက်ညွှန်ကြားရေးမှူး(နည်း)မှ ရှင်းလင်း ကြောင်းနှင့် အဆိုပါနားခဲလေးကျေးရွာ ကုန်ထုတ်လမ်း (၁/၄)မိုင်နှင့် ကွန်ကရစ်တံတား(၁)စင်း တည်ဆောက်ခြင်း (၃၀´×၁၄´×၁၅´)ကို ချမ်းမြေ့ဇမ္ဗူကုမ္ပဏီမှ တာဝန်ယူတည်ဆောက်ပြီး ခွင့်ပြုငွေကျပ်(၇၆.၃၈၀)သန်းဖြစ်ကြောင်း သိရသည်။

ထို့နောက် ရှမ်းပြည်နယ်စီမံအုပ်ချုပ်ရေးကောင်စီဥက္ကဋ္ဌနှင့် အဖွဲ့ဝင်များသည် ဘန်းကွေးကျေးရွာ မြစိမ်းရောင်စီမံကိန်း ဖြင့်စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ကျေးလက်ဒေသဖွံ့ဖြိုးတိုးတက်ရေးဦးစီးဌာနမှ ဆောင်ရွက်နေသော စက်ရေတွင်း တူးဖော်နေမှုကို သွားရောက်ကြည့်ရှုပြီး ဗထူးတပ်ရှိ အမှတ်(၄)တပ်မတော် စစ်ဆေးရုံသို့ သွားရောက်ကာ ရှမ်းပြည်နယ် စီမံအုပ်ချုပ်ရေးကောင်စီဥက္ကဋ္ဌ ဒေါက်တာကျော်ထွန်းက အဖွင့်အမှာစကားပြောကြားပြီး ဆေးရုံအတွက် ငွေပဒေသာပင် ငွေကျပ်သိန်း(၂၀)၊ ဆေးဝယ်ယူရန် ငွေကျပ်သိန်း(၃၀)၊ ဆေးဝန်ထမ်းများအတွက် ငွေကျပ်(၉၅၀၀၀၀)သိန်းနှင့် စားစရာ ခေါက်ဆွဲခြောက်၊ ကြက်ဥတို့ကို ရှမ်းပြည်နယ်စီမံအုပ်ချုပ်ရေးကောင်စီဥက္ကဋ္ဌနှင့် အဖွဲ့ဝင်များမှ ပေးအပ်လှူဒါန်းရာ ဗထူးတပ်ဆေးမှူးမှ လက်ခံရယူ၍ ကျေးဇူးတင်စကား ပြန်လည်ပြောကြားပြီး ပြည်နယ်စီမံအုပ်ချုပ်ရေးကောင်စီဥက္ကဋ္ဌ၊ အရှေ့ပိုင်းတိုင်း စစ်ဌာနချုပ်တိုင်းမှူးနှင့် တာဝန်ရှိသူများက ဆေးရုံတက်ရောက်ကုသနေသော လူနာများအား သွားရောက် ကြည့်ရှုကာ ထောက်ပံ့ပစ္စည်းများ ပေးအပ်ခဲ့ကြောင်း သိရှိရသည်။

ထို့နောက် ရှမ်းပြည်နယ်စီမံအုပ်ချုပ်ရေးကောင်စီဥက္ကဋ္ဌ၊ အဖွဲ့ဝင်များနှင့် တာဝန်ရှိသူတို့သည် ဓနုကိုယ်ပိုင်ခွင့်ရဒေသ ပင်းတယမြို့နယ်၌ မိုးလုံလေလုံအားကစားတည်ဆောက်ခြင်း (၂၀၀´×၁၀၀´) ခွင့်ပြုငွေ(၃၅၂.၉၈)သန်းဖြင့် လျှံထူးအောင် ဆောက်လုပ်ရေးကုမ္ပဏီမှ တာဝန်တည်ဆောက်နေမှုကို သွားရောက်ကြည့်ရှုရာ ကုမ္ပဏီမှ တာဝန်ရှိသူတစ်ဦးက ရှင်းလင်းရာ ပြည်နယ်စီမံအုပ်ချုပ်ရေးကောင်စီဥက္ကဋ္ဌ ဒေါက်တာကျော်ထွန်းက လိုအပ်သည်များ ဖြည့်စွက်မှာကြားခဲ့ကြောင်း သိရသည်။

၎င်းနောက် ရှမ်းပြည်နယ်စီမံအုပ်ချုပ်ရေးကောင်စီဥက္ကဋ္ဌ ဒေါက်တာကျော်ထွန်းနှင့် အဖွဲ့ဝင်များသည် ဓနုကိုယ်ပိုင် အုပ်ချုပ်ခွင့်ရဒေသ စီမံအုပ်ချုပ်ရေးရုံး အစည်းအဝေးခန်းမတွင် ဓနုကိုယ်ပိုင်အုပ်ချုပ်ခွင့်ရဒေသ စီမံအုပ်ချုပ်ရေးအဖွဲ့နှင့် တွေ့ဆုံရာ ပြည်နယ်စီမံအုပ်ချုပ်ရေးကောင်စီဥက္ကဋ္ဌ ဒေါက်တာကျော်ထွန်းက အဖွင့်အမှာစကားပြောကြားပြီး ဓနုကိုယ်ပိုင် အုပ်ချုပ်ခွင့်ရဒေသ စီမံအုပ်ချုပ်ရေးအဖွဲ့ ဥက္ကဋ္ဌနှင့် အဖွဲ့ဝင်များက တစ်ဦးချင်းမိတ်ဆက်ကြပြီး ဒေသစီမံအုပ်ချုပ်ရေးအဖွဲ့ဥက္ကဋ္ဌ ဦးအာကာလင်းမှ ဒေသဆိုင်ရာအချက်အလက်များ၊ အုပ်ချုပ်ရေးဆိုင်ရာများ၊ လုံခြုံရေးဆိုင်ရာများ၊ စီးပွားရေးဆိုင်ရာများ၊ လူမှုရေးဆိုင်ရာများ၊ ဒေသဖွံ့ဖြိုးရေးဆိုင်ရာ အချက်အလက်များအား ရှင်းလင်းတင်ပြပြီး ရှမ်းပြည်နယ် စီမံအုပ်ချုပ်ရေးကောင်စီ ဥက္ကဋ္ဌဒေါက်တာကျော်ထွန်းက တင်ပြချက်များအပေါ် လိုအပ်သည်များ ဖြည့်စွက်ပြောကြားကာ နိဂုံးချုပ်အမှာစကား ပြောကြား ခဲ့ကြောင်း သိရှိရသည်။

မောင်မောင်သန်း(တောင်ကြီး)

09-250132943

တောင်ကြီး မတ် - ၁၆

14
ရှမ်းပြည်နယ်စီမံအုပ်ချုပ်ရေးကောင်စီ ဥက္ကဋ္ဌ၊ အဖွဲ့ဝင်များနှင့် ဌာနဆိုင်ရာများ လုပ်ငန်းညှိနှိုင်း အစည်းအဝေးကို မတ် (၁၆) ရက်၊ နံနက်(၁၀)နာရီက တောင်ကြီးမြို့ ရှမ်းပြည်နယ်စီမံအုပ်ချုပ်ရေးကောင်စီရုံး အစည်းအဝေးခန်းမ၌ ကျင်းပသည်။
ရှမ်းပြည်နယ်စီမံအုပ်ချုပ်ရေးကောင်စီ ဥက္ကဋ္ဌ ဒေါက်တာကျော်ထွန်းက ယခုလက်ရှိတွင် covid-19 ရောဂါ ကာကွယ်ဆေးများ ထိုးပေးနေကြောင်း၊ တောင်ကြီးမြို့ပေါ်တွင် ထိုးနှံရမည့် ဦးရေမှာ (၁၈၀၀၀)ဖြစ်ပြီး ယခုလက်ရှိ တွင် (၁၂၀၀၀) ထိုးနှံပြီးဖြစ်ကြောင်းနှင့် (၆၀၀၀) ကျန်ရှိနေပါသေးကြောင်း၊ စဝ်စံထွန်းဆေးရုံတွင် နေ့စဉ် ဖွင့်လှစ် ထားပေးပါကြောင်း၊ ဌာနဆိုင်ရာများအနေဖြင့် မထိုးရေသေးပါက သွားရောက်ထိုးပေးကြရန် မှာကြားလိုကြောင်း၊ ယခုလက်ရှိတွင် နိုင်ငံတော်၏ အခြေအနေကို အားလုံးအသိဖြစ်၍ ရှမ်းပြည်နယ်တွင် အခြေအနေပိုမိုကောင်း လာပါကြောင်း၊ ယနေ့အချိန်တွင် စဝ်စံထွန်းဆေးရုံ၌ ဆရာ/ဆရာမနှင့် အခြားဝန်ထမ်း (၁၂၅)ဦး ပြန်လည် တက်ရောက်နေပြီဖြစ်ကြောင်း၊ အမျိုးသမီးနှင့်ကလေးဆေးရုံကိုလည်း ပြန်လည်ဖွင့်လှစ်နိုင်ရန် ညှိနှိုင်းဆောင်ရွက် ပြီးဖြစ်ကြောင်း၊ အချို့ဝန်ထမ်းများ CDMလုပ်ဆောင်နေမှုအား ချက်ချင်းအမိန့်ထုတ်၍ CDM လုပ်မည်ဆိုပါက လက်ရှိဝန်ထမ်းအင်အားမှ စွန့်လွတ်ပေးရန် မှာကြားခဲ့ကြောင်း၊ အချို့ဝန်ထမ်းများမှာ ပြတ်ပြတ်သားသား ထွက်ခွာ သွားပြီး တစ်ချို့ဝန်ထမ်းများသည် ခြိမ်းခြောက်မှုခံနေရပြီး ကြောက်စိတ်ဖြင့် လုပ်ဆောင်နေရကြောင်း၊ ရုံးမထွက် လိုကြောင်းနှင့် ပြန်လည်တက်ရောက်လိုကြောင်းကို မိမိအား ဆက်သွယ်မှုများ ရှိခဲ့ပါကြောင်း၊ ယနေ့ ဌာနဆိုင်ရာ များကို ခေါ်ယူညှိနှိုင်းအစည်းအဝေး ပြုလုပ်ရခြင်းမှာ ရုံးဝန်ထမ်းများ ခြိမ်းခြောက်မှုခံရပြီး မှားယွင်းမှုများရှိခဲ့ သော်လည်း လုပ်ငန်းခွင်သို့ ပြန်လည်ဝင်ရောက်မည်ဆိုပါက ဌာနဆိုင်ရာများအနေဖြင့် ပြန်လည်လက်ခံပေးရန် မှာကြားလိုကြောင်း၊ ဝန်ထမ်းငယ်များသည် နေစရာကိုယ်ပိုင်အိမ်မရှိသောကြောင့် ဝန်ထမ်းအိမ်ရာ၌သာ မှီခို နေထိုင်ရကြောင်း၊ အချို့ဝန်ထမ်းများသည် အသိတရားဖြင့် ပြန်လည်ဝင်ရောက်လာပြီး တာဝန်ထမ်းဆောင်လိုပါက ဌာနဆိုင်ရာအကြီးအကဲအနေဖြင့် ပြန်လည်လက်ခံပေးနိုင်ရန်နှင့် အခြားဝန်ထမ်း များသည် မိမိခံစားချက်ဖြင့် CDM တွင် ပါဝင်နေပါက မိမိအနေဖြင့် ခွင့်လွတ်ပေးမည်မဟုတ်ကြောင်း၊ အားလုံးသည် အမှားနှင့်မကင်းနိုင်ကြောင်း၊ ခွင့်လွှတ်နိုင်သည့်အမှားနှင့် မခွင့်လွှတ်နိုင်သည့်အမှားများရှိပါကြောင်း၊ CDM တွင် ပါဝင်လာအောင် နည်းအမျိုးမျိုး ဖြင့် မဲဆွယ်သောကြောင့် ဝန်ထမ်းငယ်များပါလာကြောင်း၊ အချို့ဝန်ထမ်းငယ်များသည် ယနေ့စဝ်စံထွန်းဆေးရုံတွင် ပြန်လည်တက်ရောက်နေပြီဖြစ်ကြောင်း၊ ကမ္ဘောဇဘဏ်ဝန်ထမ်းများလည်း ပြန်လည်၍ လုပ်ငန်းများဆောင်ရွက် နေပြီဖြစ်ကြောင်း၊ မိမိတို့သည် အရပ်သားအုပ်ချုပ်ရေးဖြစ်သောကြောင့် အားလုံးကို ငြင်သာစွာဖြင့် ဌာနဆိုင်ရာ များနှင့် ပူးပေါင်းဆောင်ရွက်သွားမည်ဖြစ်ကြောင်း၊ CDM တွင်ပါဝင်နေသော ဝန်ထမ်းများအား အမှုဖွင့်လှစ်အရေးယူ ဆောင်ရွက်ပြီး ဝရမ်းပြေးအမိန့်ထုတ်ထားပါက တရားဥပဒေနှင့်အညီ ပိုင်ဆိုင်မှုပစ္စည်းများကို သိမ်းဆည်းသွားမည် ဖြစ်ကြောင်း၊ ဟိုတယ်ပိုင်ရှင်များလည်း ဟိုတယ်မဖွင့်ဘဲ CDM ဆောင်ရွက်နေပါက ၎င်း ဟိုတယ်အား ချိတ်ပိတ် သွားမည်ဖြစ်ကြောင်း၊ ပွင့်လင်းရာသီ ရောက်လာပြီဖြစ်၍ မီးသတ်ဦးစီးဌာနကို မှာကြားလိုသည်မှာ ရုံး၊ ရပ်ကွက် ပတ်ဝန်းကျင်တို့ကို ဂရုစိုက်ကာ မီးဘေးအန္တရာယ်ကို ကြိုးပမ်းဆောင်ရွက်ပေးစေလိုကြောင်း၊ မကြာခင် သင်္ကြန် ကာလ နီးလာပြီဖြစ်သောကြောင့် ယာဉ်စည်းကမ်းလမ်းစည်းကမ်းများကို ဆောင်ရွက်ပေးကြရန် ယာဉ်ထိန်းရဲများ ကို မှာကြားထားပြီးဖြစ်ကြောင်း ပြောကြားသွားသည်။
ဆက်လက်၍ ရှမ်းပြည်နယ်စီမံအုပ်ချုပ်ရေးကောင်စီ အဖွဲ့ဝင်(၁) ဗိုလ်မှူးကြီး လှဦး၊ အဖွဲ့ဝင်(၂) ဦးခွန်သိန်းမောင်နှင့် တက်ရောက်လာသော ဌာနဆိုင်ရာအကြီးအကဲများအသီးသီးမှ ဆွေးနွေးတင်ပြကြပြီး ရှမ်းပြည်နယ်စီမံအုပ်ချုပ်ရေးကောင်စီ ဥက္ကဋ္ဌ ဒေါက်တာကျော်ထွန်းက နိဂုံးချုပ်အမှာစကားပြောကြားခဲ့ကြောင်း သိရှိရသည်။


မောင်မောင်သန်း(တောင်ကြီး)
၀၉-၂၅၀၁၃၂၉၄၃

နောက်ထပ်သတင်းများဖတ်မည်